AMUDARYo TUMANIDA HAM “AQLLI” ELEKTR HISOBLAGIChLAR OʻRNATILMOQDA

Tejamkorlik – barcha sohalar taraqqiyotini taʼminlashda muhim ahamiyat kasb etadi. Ayniqsa, elektr energiyasi taʼminotida tejamkorlikka erishish mamlakat ishlab chiqarishining barcha yoʻnalishlarida barqaror rivojlanishni taʼminlaydi. Shu bois, mamlakatimizda energiya-tejamkor resurslardan unumli foydalanish bilan birga, sohaga innovatsion texnologiyalarni keng joriy etish, sarflangan elektr energiyasining aniq hisob-kitobini yuritish, isteʼmolchilarni elektr energiyasi bilan taʼminlashda elektr energiyasini hisobga olish va nazorat qilishning avtomatlashtirilgan tizimini keng joriy etish orqali ularga zamonaviy shart-sharoitlar yaratish borasida tizimli ishlar olib borilmoqda.

Maʼlumki, Prezidentimizning 2018-yil 23-oktyabrda “Elektr energiyasi tarmogʻini jadal rivojlantirish va moliyaviy barqarorligini taʼminlash chora-tadbirlari toʻgʻrisida”gi Qarori qabul qilingan edi. Unga asosan “Hududiy elektr tarmoqlari” aktsionerlik jamiyati tomonidan 2020-yil yakunigacha mamlakatimizda 7 mln.dan ortiq isteʼmolchilarning barchasi elektr energiyasini hisobga olish va nazorat qilishning avtomatlashtirilgan tizimiga ulanishi belgilab berilib, bu borada tizimli ishlar amalga oshirila boshlandi.

Mazkur tizimning afzalliklari shundaki, tizimga ulangan isteʼmolchilar elektr taʼminoti korxonasi yoki banklar eshigida navbatga turishmaydi, hisoblagich oʻrnatilgach, tizimga ulanadi va kod kiritilib, hisob raqam ochiladi. Isteʼmolchilarga barcha maʼlumotlar SMS xabar orqali avtomatik tarzda yetkazib turiladi, hisoblagichdagi maʼlumotlarni kompyuter qatʼiy nazorat qiladi.

Ayni kunlarda Qoraqalpogʻiston Respublikasining eng yirik tumanlaridan biri hisoblangan Amudaryo tumanida ham aholi xonadonlariga va yuridik subʼektlariga zamonaviy hisoblagichlar oʻrnatish va elektr energiyasini hisobga olish va nazorat qilishning avtomatlashtirilgan tizimiga ulash ishlari olib borilmoqda. Tuman elektr taʼminoti korxonasi tomonidan energiya resurslarini hisobga olish va nazorat qilish uskunalari oʻrnatish boʻyicha ishlar boshlanishidan oldin joylardagi fuqarolarning oʻzini oʻzi boshqarish organlari orqali maishiy isteʼmolchilarni bu borada xabardor qilish ishlari amalga oshirilmoqda. Bundan tashqari, joylarda tuman elektr taʼminoti korxonasi mutaxassislari tomonidan yangi hisoblagichning afzalliklari, undan foydalanish yoʻl-yoʻriqlari haqida aholiga keng tushunchalar berilayotgani bois, isteʼmolchilar bilan taʼminotchi korxona oʻrtasida hech qanday tushunmovchilik va muammo boʻlmayapti.

Shuni alohida taʼkidlash joizki, 2020-yil oxirigacha tumandagi 38 ming isteʼmolchi elektr energiyasini hisobga olish va nazorat qilishning avtomatlashtirilgan tizimiga ulanishi koʻzda tutilgan. Yil oxirigacha tumandagi 35 ming 600 ta aholi xonadonlariga 100 foiz, yuridik subʼektlarga esa 2400 ta yangi elektr hisoblagichlar oʻrnatiladi. Buning uchun 38 mingta yangi hisoblagich uskunalari keltirilib, ayni  paytda ushbu hisoblagichlarni aholi xonadonlariga oʻrnatish ishlari boshlab yuborildi.

Amudaryo tumanida ayni paytda hisoblagichlar maxsus mutaxassis xodimlar tomonidan Oybek, Navoiy, Beruniy nomli, Olmazor, Boʻston, Chordara mahallalaridagi xonadonlarga oʻrnatilib, boshqa mahallalarda, ovullarda ham davom ettirilmoqda. Shu qatorda aholiga yangi hisoblagichlarning ishlash tizimi toʻgʻrisida keng tushunchalar ham berib borilmoqda. Yangi elektr hisoblagichlar isteʼmolchilarga “Hududiy elektr tarmoqlari” aktsiyadorlik jamiyati mablagʻlari hisobidan bepul oʻrnatilmoqda.

Shu oʻrinda yurtdoshlarimizdan mutaxassislarning elektr energiyasini hisoblash qurilmalarini oʻrnatishlariga imkon yaratish maqsadida oʻz mahallasiga yoki koʻchasiga elektr taʼminoti korxonasi vakillari tashrif buyurganida uyida boʻlishlarini soʻraymiz. Shuni ham unutmaslik kerakki, yangi hisoblash qurilmasini tizimga bepul ulatishga qarshilik koʻrsatgan yoki bunga beparvo qaragan imteʼmolchilar tarmoqdan ajratiladi va keyinchalik elektr hisoblagichlarni oʻz hisobidan oʻrnatishlariga toʻgʻri keladi.

Robiya YOʻLDOShEVA.