ОИЛА ҚЎРҒОНИНИНГ ПОЙДЕВОРИ ТАРБИЯДИР
Оила дея аталгувчи муқаддас қўрғоннинг тинч-осойишталиги, аҳиллиги, бир-бирига дўст, оқибатлилиги ушбу иморатнинг асосий устуни ҳисобланмиш ота-она ҳаракатига боғлиқ. Бу аканг, бу опанг, уканг, улар сенинг туғишганларинг, ҳаётдаги суянчиқларинг бўлишади, суянчиғинг кўп, мустаҳкам бўлса, сен бақувват инсон бўласан. Шунинг учун уларни авайла, қадрла, бобонг, бувинг ҳаммамизнинг маслаҳатгўйимиз, уларнинг кўнглига қара, дея тарбия берилган бола кўнглида яқинларига меҳр улғайгани сари кучайиб боради. Бу борада аввало ота-онанинг ўзи фарзандларига ибрат бўлмоғи лозим. Чунки кичкинтойлар эшитганидан эмас, кўпроқ ҳаётда кўрганларидан намуна олади. Бундан шундай хулоса қилиш мумкинки, ўз ҳаётининг давомчилари яхши инсонлар бўлиб етишишлари учун ота-она унга кичкиналигидан мукаммал тарбия беришга интилмоғи лозим.
Эрта баҳор кунлари эди. Хизматчилик юзасидан бир оиладаги нотинчликни ўрганиш, керакли ҳуқуқий маслаҳатлар бериш ва ҳаёти изга тушиб кетишига кўмаклашиш учун ўша оила истиқомат қиладиган маҳалла оқсоқоли, фаоллари билан бирга бордик. Суриштириб билсак, жанжал келиннинг сўнгги русумдаги мавсумий кийими йўқлигидан келиб чиқибди, айтишича, у кийимлари кўп бўлсада, урфдан қолгани учун кийишга уялиб, уйидан чиқа олмай ўтирган экан. Келиннинг зарда билан қайнаб, тўкиб ташлаган аламли сўзларидан кулишни ҳам, куйишни ҳам билмайсан, одам. Кўпчилик бўлиб келинни раъйидан қайтаришга, кийим, зеб-зийнат оиладаги тотувликдан афзал эмаслигини тушунтиришга ҳаракат қилдик. Имкони бўлганида кийим олинаверади, бироқ шуларни деб ўз ҳурматингни йўқотма, кийим учун жанжал қилма, дедик. Афсуски, келин сўзларимизни ўйлаб, фикр қилиш тугул эшитишни ҳам истамади.
Шунда маҳалла фаоли бўлган кекса отахон:
– Ўғилми, қизми – ёшлигидан оиласида ота-онаси тарбияламаса, суяги қотганидан сўнг ўзгартириш қийин, Яратганнинг ўзи инсоф берсин, – деди бизга тасалли бериб.
Отахон айтган хулосанинг исботига ҳаётда ҳаммамиз гувоҳ бўлиб юрибмиз. Демак, кимки фарзандлари бахтиёр, тинч-тотув яшашини истаса, туғилганиданоқ шунга тайёрлаши лозим. Шу ўринда бир ривоят эсимга тушди.
Бир улуғ алломага таълим-тарбия бериш учун фарзандини олиб келган отадан аллома: “Болангиз неча кунлик?” деб сўрабди.
– 40 кунлик, – жавоб берибди ота.
– Унда фарзандингизнинг тарбиясида 40 кун кечикибсиз, – деган экан аллома...
М.Примбетова, Амударё тумани ФҲДЁ бўлими иш юритувчиси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
