ҚЎЛИ ЕНГИЛ ЁШ ШИФОКОР

Дунёда шундай инсонлар бўладики, улар ўзларининг қилган барча эзгу ишлари билан кишилар калбида бир умрга мухрланиб коладилар. Агар унинг фаолияти инсон саломатлиги билан боғлик бўлса, бундай шахс одамлар юрагидан муносиб жой олади.

Ўз билим ва кучини туманимиз аҳолисининг дардига дармон бўлишдек хайрли ишга бағишлашга аҳд қилган ёш шифокор Ғуломжон Мавлонов фидойилиги, хушмуомалалиги билан эл аро эътибор топаётганлардан.

Ўзи ёш бўлишига қарамасдан қанчадан-қанча беморларнинг дардига дармон бўлиб, уларнинг дуосини олиб, беминнат хизмат қилиб келаётган Ғуломжон Мавлонов 1987 йилнинг 2 майида Хоразм вилояти, Гурлан туманида туғилган. У оилада 3 ўғил ва 2 қиз фарзанднинг тўртинчиси эди. Отаси фарзандлари тарбиясига жуда эътиборли бўлиб, уларнинг илм олиши, ҳунар ўрганишлари учун шароитлар яратиб берди. Болаларига бўш вақтларини мазмунли ташкил этишни ва фойдали меҳнат билан шуғулланишни ўргатди. Ана шундай тарбиявий муҳитда улгайган фарзандларнинг барчаси олий маълумотли инсонлар бўлиб, бугунги кунда халққа хизмат қилишмоқда. Ғуломжон аканинг акаси Музаффар Мавлонов ҳам Амударё туман Тиббиёт бирлашмаси шошилинч тез тиббий ёрдам бўлимида шифокор бўлиб ишлайди.

Ғуломжон Мавлонов мактабни аъло баҳолар билан тугатиб, умумий ўрта таълим олгач, 2005 йилда Тошкент Тиббиёт Академиясига давлат гранти асосида ўқишга қабул қилинди ва 2012 йилда мазкур олийгоҳнинг Тиббий педагогика факультетини муваффақиятли тамомлади. Шу йилнинг сентябрь ойидан Республика шошилинч тез тиббий ёрдам илмий марказида анестезиология ва реаниматология йўналиши мутахассислиги буйича икки йиллик клиник ординатурага қабул қилинди ва 2014 йилда клиник ординатурани тамомлаб, шу йилнинг октябрь ойидан Амударё туман Тиббиёт бирлашмасининг жонлантириш бўлимида ўз иш фаолиятини бошлади. 2014 йилдан ҳозирги кунга қадар у мазкур бўлимда анестезист-реаниматолог шифокор лавозимида ишлаб келмоқда. Иш бошлаганига ҳали кўп бўлмаса-да, ўтган вақт ичида Ғ.Мавлонов кўплаб инсонларнинг дардига дармон бўлиб, халқ дуосини олишга эришди.

Устозлари Барно Соатова ва Шуҳрат Чоршамовлардан олган тажрибалари ҳамда ўзининг билими натижасида унинг муолажаси туфайли соғайган беморлар ва уларнинг яқинлари Ғуломжон акага раҳматлар айтишиб, дуолар қилишади. Айрим шоиртабиат беморлари Ғуломжон акани оқ кўнгил ва қўли енгил шифокор, деб миннатдорчилик шеърлари ҳам ёзишган.

Ғуломжон аканинг беморлари унинг навбатчилик куни келишини интиқлик билан кутишади. Чунки Ғуломжон ака ҳар бир беморининг муолажасига ўта масъулият билан қарайди. Улар билан шунчаки бемор эмас, ўз яқинидек муомалада бўлади.

Ҳаёт ширин, дунёнинг ноз-нематларини, ҳузур-ҳаловатини татиб яшаш одамзод учун бундан-да ширин. Бахт-у саодатли бўлиб кун кечиришимиз учун бизга биринчи навбатда саломатлик керак. Бошқа инсонларга саломатлик бахш этишдек хайрли ишга қўл урган ёш шифокорга:

– Халқимиз хизматида бўлишдан асло чарчаманг ва келгусида касбингиздан камол топиб, эл-юрт дуосига сазовор бўлинг, – дея тилак билдирамиз.

Ирода Ердошева.