Иқтидорли битирувчилар олтин ҳамда кумуш медаллари билан тақдирланди

Мамлакатимиз бўйлаб жорий ойда “Ёшлар ойлиги” ўтказилмоқда. Ойлик доирасида 20 июнь санасида Амударё тумани ҳокими тумандаги фаол ёшлар билан учрашди.

Мазкур учрашув мобайнида туманимиздаги иқтидорли, ўз билими, хулқ-атвори билан бошқаларга наъмуна бўлаётган, ташаббускор, ижодкор, ўз устида тинмай ишлайдиган, интилувчан, жамоат ишларида фаол бўлган мактаб битирувчилари туман ҳокими Султонбой Йўлдашев томонидан олтин ҳамда кумуш медаллари билан тақдирландилар.

Туманимиздаги 11-синф битирувчилар ушбу медаллар эгалари бўлдилар. Туман Халқ таълими бўлимига қарашли 1-сонли мактаб битирувчиси Камрон Ўринбоев, 56-сонли мактаб битирувчиси Исломбек Файзуллаевлар олтин медаллар билан тақдирландилар.

Шунингдек, 28-сонли мактаб битирувчиси Баҳодир Ендиров, 87-сонли мактаб битирувчилари Дилдора Исмоилова, Дурдона Собирова, Юлдузхон Йўлдашевалар кумиш медаллари соҳиблари бўлдилар.

Маълумот тариқасида келтириш жоизки, Ўзбекистон Республикаси Вазирлар Маҳкамаси “Умумий ўрта таълим муассасалари ва академик лицейларнинг иқтидорли битирувчиларини олтин ва кумуш медаллар билан тақдирлаш тартиби тўғрисида низом”га асосан умумий ўрта таълим муассасалари, шу жумладан, ихтисослаштирилган мактаблар, ихтисослаштирилган санъат ва маданият мактаб-интернатлар, спорт йўналишидаги ихтисослаштирилган мактаб-интернатлар ҳамда академик лицейларнинг иқтидорли битирувчиларини олтин ва кумуш медаллар билан тақдирлаш тартиби белгиланган.

Унга кўра олтин медал умумий ўрта таълим муассасаларининг 9-синфини битирганлик тўғрисидаги аъло даражали шаҳодатномаси мавжуд бўлган, умумий ўрта таълим муассасаларининг 10- ва 11-синфларида барча фанлар бўйича якуний назоратлар, чорак ва йиллик баҳолари аъло бўлган ёки академик лицейларнинг барча курсларида барча фанлар бўйича якуний назоратлар, ярим йиллик ва йиллик баҳолари аъло бўлган, намунали хулқ-атворли ва жамоат ишларида фаоллик кўрсатган битирувчиларга берилади.

Кумуш медал умумий ўрта таълим муассасаларининг 9-синфини битирганлик тўғрисидаги аъло даражали шаҳодатномаси мавжуд бўлган, умумий ўрта таълим муассасаларининг 10- ва 11-синфларида ёки академик лицейларнинг барча курсларида барча фанлар бўйича йиллик баҳолари аъло бўлган, намунали хулқ-атворли ва жамоат ишларида фаоллик кўрсатган битирувчиларга берилади.

Туман ҳокими туманимизнинг келажаги яратувчилари бўлган ёшларни мазкур медалларни олганликлари билан самимий табриклаб, уларни тарбия қилиб вояга етказган ота-оналари ҳамда таълим-тарбия берган устозларига раҳматлар айтди. Султонбой Йўлдашев ўз сўзи якунида олтин ҳамда кумуш медаллари эгалари бўлган битирувчиларга келгусидаги ўқиш ва ишларида омад ҳамда муваффақиятлар тилаб, юксак ишонч билдирди.

Шунингдек, тадбир доирасида туман ҳокими томонидан Ўзбекистон Ёшлар иттифоқи туман Кенгаши қошидаги Сардорлар кенгаши аъзолари ҳам ўзларининг жамоат ишларида фаоллиги, ташаббускорлиги, сардорлик фаолиятида эришаётган ютуқлари учун эсдалик совғалари билан рағбатлантирилди.

Учрашув якунида туман ҳокими ёшларни келгусида ватан равнақига, тараққиётига ҳисса қўшиш ҳамда жонажон Ўзбекистонимиз номини бутун дунёга танитиб, уларга билдирилаётган ишончни оқлашга ҳамда ватанга муносиб фарзанд бўлишга чорлади. Бунинг учун эса, албатта, тинимсиз ўз устида ишлаш, илф-фан сирларини мукаммал ўрганиш, фақат олға интилиш лозимлигини таъкидлади.

Туман ҳокимлигининг Ахборот хизмати.