"Микрокредитбанк" АТБнинг туман бўлими самарали фаолият олиб бормоқда

"Микрокредитбанк" кичик бизнес, хусусий тадбиркорлик ҳамда фермерликни ривожлантириш, якка тартибдаги меҳнат фаолиятини, оилавий бизнес ва касаначиликни фаоллаштириш йўли билан янги иш ўринларини яратиш, айниқса, қишлоқ жойларида аҳоли кенг табақаларининг микромолиявий хизматлардан баҳраманд бўлишини таъминлаш учун молиявий маблағлар беришни янада кенгайтиришга йўналтирилган акциядорлик тижорат банки ҳисобланади.

Мамлакатимизни ижтимоий-иқтисодий ривожлантириш мақсадида амалга оширилаётган ислоҳотлар, белгилаб берилган топшириқлар ижроси юзасидан “Микрокредитбанк” туман бўлими самарали ишлар амалга оширмоқда. Бугунги кунда “Микрокредитбанк” АТБнинг туман бўлими томонидан тумандаги жами 2071 та кичик бизнес ва тадбиркорлик субъектларига турли хил банк хизматлари кўрсатилмоқда. Шундан 520 нафар мижоз ўз фаолиятини узлуксиз  равишда амалга ошириб келмоқда.
Банк томонидан аҳоли ва тадбиркорлик субъектларини имтиёзли шартлар асосида молиявий қўллаб-қувватлаш изчил давом эттирилмоқда. Ижтимоий дастурлар доирасида жалб қилинган 9,7 млрд. сўмлик ресурс маблағлари ҳисобидан банк томонидан 258 дан ортиқ аҳоли ва тадбиркорлик субъектларига имтиёзли кредитлар ажратилди ҳамда 290 дан ортиқ янги иш ўринлари яратилди. Жумладан, “Ҳар бир оила – тадбиркор” дастури доирасида 249 нафар мижоз имтиёзли кредитлар олиб, ўз тадбиркорлик фаолиятини йўлга қўйиб олди.

Туманимизда “Микрокредитбанк” AТБдан кредит маблағлари олиб ўзининг янги тадбиркорлик фаолиятини юритаётган юртдошларимиз талайгина. Ҳамюртимиз Ҳакимжон Aҳмедов раҳбарлигида 2017 йилда ўз фаолиятини бошлаган, мебель ишлаб чиқаришга ихтисослашган “Маърифат Усманович” МЧЖга “Ҳар бир оила – тадбиркор” дастури доирсида янги мебел ишлаб чиқариш асбоб-ускунасини сотиб олиш учун банк томонидан 104 млн. сўм миқдорида кредит маблағи ажратилган эди. Ҳозирда ушбу 5 иш ўрнига эга бўлган тадбиркорлик субьектида турли кўринишдаги ётоқхона мебель жиҳозлари ишлаб чиқарилмоқда. Цехда карантин тартиби юмашатилганидан кейин янги иш ўринлари яратилиб, ёшлар бандлигини таъминлаш режалаштирилган.
Шунингдек, тадбиркорлик соҳасидаги ташаббускор юртдошларимиздан бири Эркин Расуловнинг паррандачилик соҳасини ривожлантириш лойиҳаси учун банк томонидан 223 млн. сўм миқдорида кредит маблағи ажратилди. Ушбу маблағ ҳисобидан “Қорақалпоқ маҳсулотлари” масъулияти чекланган жамияти ташкил этилди. Натижада тадбиркор 3 та янги иш ўрнини яратиб, ёшлар бандлигини таъминлашга ҳисса қўшди. Ҳозирда “Қорақалпоқ маҳсулотлари” МЧЖ туманимизда паррандачилик соҳасини янада ривожлантиришда ўз аҳамиятига эга бўлган тадбиркорлик субъектига айланиб улгурди. Цехда йилига 11 мингга яқин жўжа ҳамда 40 мингдан зиёд товуқ гўшти маҳсулотлари ишлаб тайёрланади. Туманимизда етиштирилаётган ушбу маҳсулотлар Манғит Деҳқон бозори ҳамда “Матрасул” хусусий дўконида сотиш йўлга қўйилган бўлиб, аҳоли эҳтиёжини таъминламоқда .

“Микрокредитбанк” AТБ томонидан ажратилган кредит маблағи эвазига Олмазор маҳалласи Исломобод кўчасида янгидан спорт майдончаси бунёд этилди. Санжар Қозоқбоевнинг аҳолига маиший хизмат кўрсатиш мақсадида болалар мини футбол спорт майдончасини ташкил қилиш лойиҳаси учун банк томонидан 223 млн. кредит маблағи ажратилди. Ушбу лойиҳа орқали ташкил қилинган “Диёр Бест Комплекс” МЧЖда 3 та янги иш ўрни яратилди. Яқин кунларда ушбу спорт майдончасининг очилиш маросими ўтказилиб, майдончада турли спорт ўйинлари ўтказилиши йўлга қўйилади.

Aйтиш жоизки, туманимизда ҳунармандчиликнинг тикувчилик йўналиши кундан кунга ривожланиб бормоқда. “Aму-Файз-Текстил ЗФ” МЧЖ ҳам ушбу соҳани янада ривожлантиришга ҳисса қўшмоқда. “Микрокредитбанк” тижорат банки туман филиали эса ана шундай истиқболга интилаётган тадбиркорлик субьектларини қўллаб-қувватлаб келмоқда. Ёш тадбиркор Санжар Жумамуродовнинг янги тадбиркорлик лойиҳаси учун янги тикув машиналари сотиб олишига банк томонидан 300 млн. миқдорда имтиёзли кредит маблағи ажратилди. Ёстиқ, кўрпа, кўрпача ва уларнинг қопламалари, адёл каби тикувчилик маҳсулотлари ишлаб чиқаришга ихтисослашган МЧЖда ёш тадбиркор ташаббуси билан 5 та янги иш ўрни яратилди. Ушбу жамият ишлаб чиқарилган сифатли маҳсулотлари билан туман бозори, марказий шифохона, қолаверса, Нукус шаҳридаги бозор ва шифохоналарни таъминлаб келмоқда.

Чарос Арслонова.