"Mikrokreditbank" ATBning tuman boʻlimi samarali faoliyat olib bormoqda

"Mikrokreditbank" kichik biznes, xususiy tadbirkorlik hamda fermerlikni rivojlantirish, yakka tartibdagi mehnat faoliyatini, oilaviy biznes va kasanachilikni faollashtirish yoʻli bilan yangi ish oʻrinlarini yaratish, ayniqsa, qishloq joylarida aholi keng tabaqalarining mikromoliyaviy xizmatlardan bahramand boʻlishini taʼminlash uchun moliyaviy mablagʻlar berishni yanada kengaytirishga yoʻnaltirilgan aktsiyadorlik tijorat banki hisoblanadi.

Mamlakatimizni ijtimoiy-iqtisodiy rivojlantirish maqsadida amalga oshirilayotgan islohotlar, belgilab berilgan topshiriqlar ijrosi yuzasidan “Mikrokreditbank” tuman boʻlimi samarali ishlar amalga oshirmoqda. Bugungi kunda “Mikrokreditbank” ATBning tuman boʻlimi tomonidan tumandagi jami 2071 ta kichik biznes va tadbirkorlik subʼektlariga turli xil bank xizmatlari koʻrsatilmoqda. Shundan 520 nafar mijoz oʻz faoliyatini uzluksiz  ravishda amalga oshirib kelmoqda.
Bank tomonidan aholi va tadbirkorlik subʼektlarini imtiyozli shartlar asosida moliyaviy qoʻllab-quvvatlash izchil davom ettirilmoqda. Ijtimoiy dasturlar doirasida jalb qilingan 9,7 mlrd. soʻmlik resurs mablagʻlari hisobidan bank tomonidan 258 dan ortiq aholi va tadbirkorlik subʼektlariga imtiyozli kreditlar ajratildi hamda 290 dan ortiq yangi ish oʻrinlari yaratildi. Jumladan, “Har bir oila – tadbirkor” dasturi doirasida 249 nafar mijoz imtiyozli kreditlar olib, oʻz tadbirkorlik faoliyatini yoʻlga qoʻyib oldi.

Tumanimizda “Mikrokreditbank” ATBdan kredit mablagʻlari olib oʻzining yangi tadbirkorlik faoliyatini yuritayotgan yurtdoshlarimiz talaygina. Hamyurtimiz Hakimjon Ahmedov rahbarligida 2017-yilda oʻz faoliyatini boshlagan, mebel ishlab chiqarishga ixtisoslashgan “Maʼrifat Usmanovich” MChJga “Har bir oila – tadbirkor” dasturi doirsida yangi mebel ishlab chiqarish asbob-uskunasini sotib olish uchun bank tomonidan 104 mln. soʻm miqdorida kredit mablagʻi ajratilgan edi. Hozirda ushbu 5 ish oʻrniga ega boʻlgan tadbirkorlik subektida turli koʻrinishdagi yotoqxona mebel jihozlari ishlab chiqarilmoqda. Tsexda karantin tartibi yumashatilganidan keyin yangi ish oʻrinlari yaratilib, yoshlar bandligini taʼminlash rejalashtirilgan.
Shuningdek, tadbirkorlik sohasidagi tashabbuskor yurtdoshlarimizdan biri Erkin Rasulovning parrandachilik sohasini rivojlantirish loyihasi uchun bank tomonidan 223 mln. soʻm miqdorida kredit mablagʻi ajratildi. Ushbu mablagʻ hisobidan “Qoraqalpoq mahsulotlari” masʼuliyati cheklangan jamiyati tashkil etildi. Natijada tadbirkor 3 ta yangi ish oʻrnini yaratib, yoshlar bandligini taʼminlashga hissa qoʻshdi. Hozirda “Qoraqalpoq mahsulotlari” MChJ tumanimizda parrandachilik sohasini yanada rivojlantirishda oʻz ahamiyatiga ega boʻlgan tadbirkorlik subʼektiga aylanib ulgurdi. Tsexda yiliga 11 mingga yaqin joʻja hamda 40 mingdan ziyod tovuq goʻshti mahsulotlari ishlab tayyorlanadi. Tumanimizda yetishtirilayotgan ushbu mahsulotlar Mangʻit Dehqon bozori hamda “Matrasul” xususiy doʻkonida sotish yoʻlga qoʻyilgan boʻlib, aholi ehtiyojini taʼminlamoqda .

“Mikrokreditbank” ATB tomonidan ajratilgan kredit mablagʻi evaziga Olmazor mahallasi Islomobod koʻchasida yangidan sport maydonchasi bunyod etildi. Sanjar Qozoqboyevning aholiga maishiy xizmat koʻrsatish maqsadida bolalar mini futbol sport maydonchasini tashkil qilish loyihasi uchun bank tomonidan 223 mln. kredit mablagʻi ajratildi. Ushbu loyiha orqali tashkil qilingan “Diyor Best Kompleks” MChJda 3 ta yangi ish oʻrni yaratildi. Yaqin kunlarda ushbu sport maydonchasining ochilish marosimi oʻtkazilib, maydonchada turli sport oʻyinlari oʻtkazilishi yoʻlga qoʻyiladi.

Aytish joizki, tumanimizda hunarmandchilikning tikuvchilik yoʻnalishi kundan kunga rivojlanib bormoqda. “Amu-Fayz-Tekstil ZF” MChJ ham ushbu sohani yanada rivojlantirishga hissa qoʻshmoqda. “Mikrokreditbank” tijorat banki tuman filiali esa ana shunday istiqbolga intilayotgan tadbirkorlik subektlarini qoʻllab-quvvatlab kelmoqda. Yosh tadbirkor Sanjar Jumamurodovning yangi tadbirkorlik loyihasi uchun yangi tikuv mashinalari sotib olishiga bank tomonidan 300 mln. miqdorda imtiyozli kredit mablagʻi ajratildi. Yostiq, koʻrpa, koʻrpacha va ularning qoplamalari, adyol kabi tikuvchilik mahsulotlari ishlab chiqarishga ixtisoslashgan MChJda yosh tadbirkor tashabbusi bilan 5 ta yangi ish oʻrni yaratildi. Ushbu jamiyat ishlab chiqarilgan sifatli mahsulotlari bilan tuman bozori, markaziy shifoxona, qolaversa, Nukus shahridagi bozor va shifoxonalarni taʼminlab kelmoqda.

Charos Arslonova.