ТУМАНИМИЗ БУҒДОЙЗОPЛАPИДА МЎЛ PИЗҚ-PЎЗИМИЗ ЯPАТИЛМОҚДА
Буғдой ризқ-рўзимиз, дастурхонимизнинг, турмушимизнинг тўкинлигини кўрсатиб турувчи азиз неъмат. Кекса онахонларимиз буғдой машаққатли, ҳалол меҳнатлар эвазига етиштирилгани учун ҳам нондан хуштаъм, тўйимли неъмат йўқ, дея уқтиришади.
Ҳа, деҳқончилик – заҳматли бўлишига қарамасдан соҳадаги кўпгина тадбирлар бугунги кунда техникалар зиммасига юкланганлиги сабабли мўл ҳосил олишга имкон яратилди.
2019 йилда буғдойзорларда туман бўйича ўртача 30 центнердан ҳосил йиғиштириб олинишига эришилган эди. Ўтган йилнинг кузида ҳам 2020 йил ҳосили учун 3300 гектар ерга буғдой экилиб, тўлиқ ниҳол олинди. Кўп йиллик тажрибаларига суянган туманимиз деҳқонлари жорий йилда ҳам ғаллазорлардан мўл-кўл ҳосил етиштиришга астойдил интилмоқдалар.
Боғ маҳалласида фаолият юритаётган “Қадамбой Пўлат” фермер хўжалигининг 71 гектарга яқин экин майдони бор. Ўтган йилда шунинг 40 гектарига пахта, 7 гектарига буғдой ва турли сабзавот, полиз экинлари экилиб, мўл ҳосил етиштирилган эди. Куз фаслида яна 2020 йил ҳосили учун 7 гектар майдонга буғдой экилди ва бир текис ниҳол олишга эришилди.
Айни кунларда мазкур буғдойзорларда ниҳоллар дуркун ўсиб ривожланмоқда. Барча буғдой далалари маҳаллий ва минерал ўғитлар билан озиқлантирилиб, суғорилмоқда.
Шуни айтиш керакки, ҳар йили барча экинлардан мўл ҳосил етиштирилаётгани хўжалик моддий-техник базаси мустаҳкамланишига асос бўлди. Олинган даромадлар ҳисобига ерларни суриш, экин экиш ва парваришлашда ишлатиладиган техникалар харид қилиниб, самарали фойдаланилмоқда. Куз-қиш мавсумида мавжуд техникалар кучи билан буғдойзорларга маҳаллий ўғитлар сочилиб, ниҳолларнинг яхши ривожланишига замин яратилди.
Хўжалик раиси Мансур Тожимов иш юритувчи Обод Худановлар ҳозирги кунда буғдойзорларнинг сифатли суғорилишини тинимсиз назорат қилмоқдалар. Чунки деҳқончиликда ҳар бир тадбирнинг ўз вақтида ва сифатли бажарилиши экиндан кўзланган ҳосилни етиштиришда муҳим аҳамиятга эга.
Маълумки, жорий йил бошида туманимизда ғаллачилик кластери тузилиб, фаолиятини бошлаган эди. Эндиликда ғаллачилик кластери ўрнатилган тартибга кўра, 2020 йил ҳосилидан бошлаб, бошоқли донни фермер хўжаликларидан шартнома бўйича харид қилади ва қайта ишлаб, туманимиз аҳолисига, барча истеъмолчиларга тайёр маҳсулот, яъни ун қилиб сотади. Табиийки, бу ғалла етиштирувчилар даромади юқори бўлишини таъминлайди.
Мамлакатимиз аҳолисининг кўпчилик қисми асосан қишлоқ хўжалиги юмушлари билан банд бўлиб, шу орқали оиласи учун даромад топади. Айни пайтда қишлоқ хўжалигига жорий этилаётган мазкур ислоҳотлар экин майдонларидан янада самарали фойдаланиб, ҳосилдорликни оширишга ва пировардида соҳада банд бўлган аҳолининг даромадлари юқори, турмуши фаровон бўлишига эришишга қаратилмоқда.
О.PАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
