Туманимизда яна бир хусусий тиббий клиника иш бошлади

Тиббиёт инсон саломатлигини асрашдек эзгу мақсадларга хизмат қилади. Шу боис мазкур соҳани ривожлантириш, замонавий технологиялар билан жиҳозланган тиббий муассасалар ташкил этиш нафақат аҳолига қулайлик яратади, балки халқимизнинг умумий саломатлик даражасини оширишда ҳам муҳим роль ўйнайди.

Амударё туманининг Чордара маҳалласида янгидан иш бошлаган “Фахриддин клиникаси” номли хусусий тиббиёт муассасаси маъмурияти ҳам аҳолига юқори сифатли ва замонавий тиббий хизматларни тақдим этишни бош мақсад қилиб қўйган. Клиникада малакали мутахассислар жамоаси томонидан замонавий технологиялар орқали аҳолига мақбул нархларда намунали тиббий хизматларни кўрсатиш йўлга қўйилган.

25 январь куни мазкур муассасанинг очилиш маросими ўтказилди. Тадбирда туман ҳокими ўринбосарлари Фахриддин Юсупов, Нодирбек Камолов, “Нуроний” жамғармаси туман бўлими раиси Бекман Аллаберганов, тиббиёт соҳаси мутасаддилари, маҳалла фаоллари ва аҳоли вакиллари иштирок этдилар.

Тантанали тадбирда туман ҳокими ўринбосари Нодирбек Камолов сўзга чиқиб, мазкур муассасанинг фаолияти туманимиз тиббиёти ривожи йўлида муҳим аҳамиятга эга эканлигини, клиника нафақат замонавий тиббий технологиялар, балки малакали мутахассислар орқали аҳоли саломатлигини яхшилашга хизмат қилишини таъкидлади. Шунингдек, клиника раҳбари Фахриддин Ибодуллаевнинг тиббиёт соҳасидаги кўп йиллик тажрибасини эътироф этиб, келгуси фаолиятида муваффақиятларга тилакдошлик билдирди.

Шунингдек, “Нуроний” жамғармаси туман бўлими раиси Бекман Аллаберганов ўз сўзида янги клиниканинг, аҳоли, айниқса кексалар учун аҳамиятини эътироф этиб, яратилган қулай шароитлар ва замонавий тиббий технологиялар кексаларнинг соғлигини тиклаш ва ҳаёт сифатини, давомийлигини оширишга ёрдам беришини алоҳида таъкидлади.

Клиника муассиси Фахриддин Ибодуллаев ташриф буюрган меҳмонларга самимий миннатдорчилик билдириб, мамлакатимизда тиббиёт соҳасида амалга оширилаётган ислоҳотлар ва тадбиркорларга яратилаётган қулай шарт-шароитлар хусусий тиббий муассасаларнинг ривожида муҳим омил бўлаётганини таъкидлади. Қайд этилганидек, мазкур муассасанинг бош мақсади аҳолига замонавий ва сифатли тиббий хизмат кўрсатиш орқали уларнинг соғлом ҳаётга қайтишларига ёрдам беришдан иборат.

“Фахриддин клиникаси”да юрак-қон томир касалликларини диагностика қилиш ва даволашга ихтисослашган кардиология, асаб тизими муаммоларини аниқлаш ва бартараф этишга ихтисослашган неврология, эндокрин тизими касалликлари даволанувчи эндокринология, шунингдек, даволаш ва реабилитация жараёнларида замонавий усулларни қўлланиладиган физиотерапия каби бўлимлар мавжуд.

Клиникада стационар тартибда даволаниш имконияти яратилган бўлиб, бир вақтнинг ўзида 35 нафар беморни қабул қилиш қувватига эга. Шунингдек, кундузги стационар ва амбулатор хизматлар ҳам мавжуд.

Тиббиёт муассасаси илғор тиббий технологиялар билан жиҳозланган бўлиб, ультратовуш ташхиси, электрокардиограф ускуналари, бир қатор физиотерапия ускуналари, бел чурраларини даволаш учун махсус мосламалар ҳамда реабилитация жараёнлари учун небулайзер ва бошқа ускуна ва қурилмалар мавжуд. Барча жиҳозлар беморларга касалликларни аниқлаш, даволаш ва соғлом ҳаётга қайтаришда кўмак беради.

Клиника муассиси, кардиолог Фахриддин Ибодуллаев, тиббиёт соҳасида 20 йилдан ортиқ тажрибага эга. У Тошкент Тиббиёт академиясининг Урганч филиалида таҳсил олган бўлиб, сўнгра кардиология ва неврология бўйича малака оширган.

Клиникада ҳозирча 10 нафар малакали ходим ишламоқда. Шифокорлар орасида кўп йиллик тажриба ва чуқур билимга эга бўлган кардиолог, невропатолог, эндокринолог ҳамда бошқа тор доирадаги малакали мутахассислар бор. Янги тиббий муассаса ва ундаги замонавий технологиялар ҳамда таклиф этилаётган хизматлар нафақат касалликларни даволаш, балки уларни эрта ташхислаш ва олдини олиш, шу орқали аҳолининг саломатлигини янада мустаҳкамлашга ҳисса қўшиши шубҳасиз.

Шоҳзод Қурбонбоев