“ЁШ КИТОБХОН” КЎРИК-ТАНЛОВИНИНГ МАКТАБ БОСҚИЧИ ЎТКАЗИЛДИ
Китоб – инсонни нафақат маънавий етуклик сари ундайди, балки унинг дунёқарашини шакллантириб, қалбида эзгу ишларга рағбат уйғотади. Китоб билан ошно бўлган инсон қандай даврада бўлмасин ўзининг муомаласи ва маданияти билан бошқалардан ажралиб туради. Шунинг учун ҳам Президентимиз ёшлар ўртасида китобхонлик муҳитини яратиш, мутолаа маданиятини шакллантиришга алоҳида эътибор қаратиш зарурлигини маънавий-маърифий соҳанинг энг муҳим йўналиши сифатида эътироф этдилар. Шу боис, 5 та муҳим ташаббуснинг тўртинчиси ёшлар китобхонлигини ривожлантиришга қаратилди. Мамлакатимизда бу борада амалга оширилаётган ишлар ҳам ўз самарасини бераётгани қувонарли. Чунки бугунги кунда энг чекка қишлоқларда ҳам “Халқ кутубхоналари” фаолият олиб бормоқда ва бу кутубхоналарнинг аъзолари ҳам асосан ёшлардир.
Бизнинг 53-сонли умумтаълим мактабимизда ҳам ёшлар китобхонлигини ривожлантиришга алоҳида аҳамият берилаётгани боис, ўқувчи-ёшлар орасида китобхонлар сафи кун сайин ошиб бормоқда. Мактабимизнинг деярли 70-80 фоиз ўқувчилари мактаб кутубхонасининг фаол аъзолари бўлиш билан бирга ўз шахсий китоб жавонларини ҳам ташкил этишган.
Яқинда мактабимиз ўқувчилари ўртасида “Ёш китобхон” кўрик-танлови ўтказилди. Кўрик-танловга 5-11-синфлар ўқувчилари қамраб олинди. Ўқувчиларнинг мазкур кўрик-танловда фаол иштирок этишларини таъминлаш мақсадида ўқитувчилар Ўткирбек Жиянов ва Жўрабек Бекчановлар ЎзЁИ бошланғич ташкилоти етакчиси Икром Қурбонбоев ҳамда мактаб кутубхоначиси Манзура Отажоновалар билан ҳамкорликда иш олиб боришди. 5-синфдан 11-синфгача бўлган ўқувчилар ўртасида китобхонлик бўйича тарғибот-ташвиқот ишларини йўлга қўйишгани эса жуда яхши натижа берди. Бундан ташқари, туман Халқ таълими бўлими мудирининг ўринбосари Раҳматулла Матқурбонов “Ёш китобхон” кўрик-танловининг мактаб босқичини ташкил этишда яқиндан ёрдам кўрсатиб, тадбирнинг шаффоф ва адолатли ўтишини таъминлагани ғолиб китобхонларни аниқлашда муҳим аҳамиятга эга бўлди.
“Ёш китобхон” танловининг мактабда ўтказилган илк босқичи қизиқарли баҳсларга бой бўлди. Ёш китобхонлар кўрик-танловнинг барча шартларини зукколик билан бажаришга ҳаракат қилдилар. Берилган барча саволларга аниқ ва пухта жавоб берган, танлов шартларини аъло даражада уддалаган билимдон китобхонлар аниқланди. Ғолиблар кўрик-танлов ташкилотчилари томонидан муносиб тақдирландилар ва энг яхши китобхонга кўрик-танловнинг кейинги босқичига йўлланма берилди.
Баҳром Жиянов,
53-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
