“YoSh KITOBXON” KOʻRIK-TANLOVINING MAKTAB BOSQIChI OʻTKAZILDI

Kitob – insonni nafaqat maʼnaviy yetuklik sari undaydi, balki uning dunyoqarashini shakllantirib, qalbida ezgu ishlarga ragʻbat uygʻotadi. Kitob bilan oshno boʻlgan inson qanday davrada boʻlmasin oʻzining muomalasi va madaniyati bilan boshqalardan ajralib turadi. Shuning uchun ham Prezidentimiz yoshlar  oʻrtasida kitobxonlik muhitini yaratish, mutolaa madaniyatini shakllantirishga alohida eʼtibor qaratish zarurligini maʼnaviy-maʼrifiy sohaning eng muhim yoʻnalishi sifatida eʼtirof etdilar. Shu bois, 5 ta muhim tashabbusning toʻrtinchisi yoshlar  kitobxonligini rivojlantirishga qaratildi. Mamlakatimizda bu borada amalga oshirilayotgan ishlar ham oʻz samarasini berayotgani quvonarli. Chunki bugungi kunda eng chekka qishloqlarda ham “Xalq kutubxonalari” faoliyat olib bormoqda va bu kutubxonalarning aʼzolari ham asosan yoshlardir.

Bizning 53-sonli umumtaʼlim maktabimizda ham yoshlar kitobxonligini rivojlantirishga alohida ahamiyat berilayotgani bois, oʻquvchi-yoshlar orasida kitobxonlar safi kun sayin oshib bormoqda. Maktabimizning deyarli 70-80 foiz oʻquvchilari maktab kutubxonasining faol aʼzolari boʻlish bilan birga oʻz shaxsiy kitob javonlarini ham tashkil etishgan.

Yaqinda maktabimiz oʻquvchilari oʻrtasida  “Yosh kitobxon” koʻrik-tanlovi oʻtkazildi. Koʻrik-tanlovga 5-11-sinflar oʻquvchilari qamrab olindi. Oʻquvchilarning mazkur koʻrik-tanlovda faol ishtirok etishlarini taʼminlash maqsadida oʻqituvchilar Oʻtkirbek Jiyanov va Joʻrabek Bekchanovlar OʻzYoI boshlangʻich tashkiloti yetakchisi Ikrom Qurbonboyev hamda maktab kutubxonachisi Manzura Otajonovalar bilan hamkorlikda ish olib borishdi. 5-sinfdan 11-sinfgacha boʻlgan oʻquvchilar oʻrtasida kitobxonlik boʻyicha targʻibot-tashviqot ishlarini yoʻlga qoʻyishgani esa juda yaxshi natija berdi. Bundan tashqari, tuman Xalq taʼlimi boʻlimi mudirining oʻrinbosari Rahmatulla Matqurbonov “Yosh kitobxon” koʻrik-tanlovining maktab bosqichini tashkil etishda yaqindan yordam koʻrsatib, tadbirning shaffof va adolatli oʻtishini taʼminlagani gʻolib kitobxonlarni aniqlashda muhim ahamiyatga ega boʻldi.

“Yosh kitobxon” tanlovining maktabda oʻtkazilgan ilk bosqichi qiziqarli bahslarga boy boʻldi. Yosh kitobxonlar koʻrik-tanlovning barcha shartlarini zukkolik bilan bajarishga harakat qildilar. Berilgan barcha savollarga aniq va puxta javob bergan, tanlov shartlarini aʼlo darajada uddalagan bilimdon kitobxonlar aniqlandi. Gʻoliblar koʻrik-tanlov tashkilotchilari tomonidan munosib taqdirlandilar va eng yaxshi kitobxonga koʻrik-tanlovning keyingi bosqichiga yoʻllanma berildi.

Bahrom Jiyanov,
53-sonli maktab oʻqituvchisi.