Туман ҳокимлигида коронавирус пандемияси тарқалишининг олдини олишга бағишланган йиғилиш ўтказилди

Мамлакатимизда бугунги кунда бутун дунёни саросимага солаётган коронавирус пандемияси тарқалишининг олдини олиш мақсадида зарур чора-тадбирлар амалга оширилмоқда.

Шу мақсадда барча ўқув муассасаларида карантин ҳолати жорий қилинди, республика аҳолисига заруриятсиз уйдан чиқмаслик тавсия этилди. Кўчалар ва жамоат жойларида ниқоб тақиб юриш мажбурийлиги белгиланди. Хорижий давлатлар билан ҳаво ва автомобиль ташишлар чекланди, чегара ўтказиш пунктлари ёпилди. 23 мартдан бошлаб эса пойтахтимиздаги барча корхона ва муассасалар, асосий фаолиятини олиб боришни сақлаб қолган ҳолда, ходимларни меҳнат таътилига ёки масофадан туриб ишлаш режимига ўтказишлари тавсия этилди. Ишлашни давом эттирадиганлар учун эса иш пайтида ниқоб кийиб юришлари шартлиги белгиланди. Қоидабузарларга интизомий жазо чоралари қўлланилиши кўрсатиб ўтилди.

Бундан ташқари, сўнгги кунларда чет элдан келган ва касалликни юқтирган фуқаролар билан алоқада бўлган шахсларни изоляция қилиш ва карантин ҳолатида ушлаб туриш учун барча профилактика муассасалари ва санитария-эпидемиология назорати органлари сафарбар қилинди, шифокорлар касалхоналарда 24 соат навбатчилик қилишмоқда.

Бу борада туманимизда ҳам қатор чоралар амалга оширилмоқда. Жорий йилнинг 23 март санасида туман ҳокимлигининг мажлислар залида пандемияга қарши курашиш бўйича чора-тадбирлар ҳамда қилиниши лозим бўлган вазифаларни белгилаб олиш мақсадида йиғилиш ўтказилди.

Aйтиш жоизки, туман ҳокими – Фуқаро муҳофазаси бошлиғининг туман Эпидемияга қарши курашиш фавқулодда комиссиясининг мажлис баёнига асосан туман ҳудудига коронавирус инфекцияси кириб келишининг олдини олиш чора-тадбирлари дастурини тайёрлаш ҳамда идора-ташкилотларнинг фаолиятини мувофиқлаштириш штаби таркиби тасдиқланиб, ўз ишини бошлаган эди.

Йиғилишда Қорақалпоғистон Республикаси Фавқулодда вазиятлар бошқармасининг бўлим бошлиғи Улуғбек Машарипов, туман ҳокими Султонбой Йўлдашев, ҳоким ўринбосарлари, ҳокимлик масъуллари ҳамда ташкил этилган штаб аъзолари иштирок этдилар. Туман ҳокими ҳамда махсус штаб билан бирга эпидемияга қарши курашиш бўйича чора-тадбирлар белгилаб олинди.

Йиғилишда сўзга чиққанлар таъкидлаганидек, юртимизда аҳоли ўртасида коронавирус инфекцияси бўйича эпидемиологик барқарорликни таъминлашга йўналтирилган барча профилактик ва эпидемияга қарши тадбирлар халқаро тиббий санитария талаблари асосида амалга оширилмоқда.

Мамлакатимиз бўйлаб ўтказилаётган карантин чоралари касалликнинг кескин ўсиб кетишининг олдини олишга, шунингдек, тиббий ёрдамга муҳтож одамларнинг соғлиқни сақлаш тизими имкониятларидан тўлақонли фойдалана олишлари учун имкон яратади. Карантинга риоя қилмаслик – нафақат ўзи, балки оила аъзолари, яқинлари, атрофидагилари учун касалликни юқтириб олиш хавфини келтириб чиқаради.

Aйтиш керакки, юртимиз аҳолисининг санитария-эпидемиологик осойишталиги ва хавфсизлигини таъминлаш, коронавирус инфекцияси тарқалишининг олдини олишда мутасадди давлат ва хўжалик бошқаруви органлари ҳамда ташкилотларнинг фаолияти мувофиқлаштирилган ҳолда ташкил этилмоқда. Мамлакатимиз фуқароларининг ҳаёти ва соғлиғини муҳофаза қилиш мақсадида Ўзбекистон Республикаси Вазирлар Маҳкамасининг “Коронавирус инфекцияси тарқалишига қарши қўшимча чора-тадбирлар тўғрисида”ги қарори ва бошқа қонун ҳужжатларида белгилаб берилган чора-тадбирлар амалга оширилмоқда. Ўз навбатида аҳоли вакиллари ҳам жорий этилган карантин ҳолатларига амал қилиши, ушбу эпидемия тарқалишининг олдини олишга барча бирдек ўз ҳиссасини қўшиши лозимлигини ҳис қилиши керак.

Шуни таъкидлаш лозимки, нафақат коронавирус, балки барча юқумли касалликларнинг олдини олишнинг энг самарали усули бу – шахсий ва жамоат гигиенаси қоидаларига қатьий амал қилиш, аҳоли ўртасида санитария-тарғибот ишларини ташкил этишдан иборатдир.

Юқумли касалликларнинг олдини олиш, нафақат тиббиёт ходимларининг вазифаси, балки ўзини, оила-аъзоларини, Ватанимизнинг эртанги куни, келажаги бўлмиш фарзандларимизнинг соғлиғи учун қайғурган барча фуқароларимизнинг шарафли бурчидир.

Чарос Aрслонова, туман ҳокимлигининг Aхборот хизмати раҳбари.