Tuman hokimligida koronavirus pandemiyasi tarqalishining oldini olishga bagʻishlangan yigʻilish oʻtkazildi

Mamlakatimizda bugungi kunda butun dunyoni sarosimaga solayotgan koronavirus pandemiyasi tarqalishining oldini olish maqsadida zarur chora-tadbirlar amalga oshirilmoqda.

Shu maqsadda barcha oʻquv muassasalarida karantin holati joriy qilindi, respublika aholisiga zaruriyatsiz uydan chiqmaslik tavsiya etildi. Koʻchalar va jamoat joylarida niqob taqib yurish majburiyligi belgilandi. Xorijiy davlatlar bilan havo va avtomobil tashishlar cheklandi, chegara oʻtkazish punktlari yopildi. 23-martdan boshlab esa poytaxtimizdagi barcha korxona va muassasalar, asosiy faoliyatini olib borishni saqlab qolgan holda, xodimlarni mehnat taʼtiliga yoki masofadan turib ishlash rejimiga oʻtkazishlari tavsiya etildi. Ishlashni davom ettiradiganlar uchun esa ish paytida niqob kiyib yurishlari shartligi belgilandi. Qoidabuzarlarga intizomiy jazo choralari qoʻllanilishi koʻrsatib oʻtildi.

Bundan tashqari, soʻnggi kunlarda chet eldan kelgan va kasallikni yuqtirgan fuqarolar bilan aloqada boʻlgan shaxslarni izolyatsiya qilish va karantin holatida ushlab turish uchun barcha profilaktika muassasalari va sanitariya-epidemiologiya nazorati organlari safarbar qilindi, shifokorlar kasalxonalarda 24 soat navbatchilik qilishmoqda.

Bu borada tumanimizda ham qator choralar amalga oshirilmoqda. Joriy yilning 23-mart sanasida tuman hokimligining majlislar zalida pandemiyaga qarshi kurashish boʻyicha chora-tadbirlar hamda qilinishi lozim boʻlgan vazifalarni belgilab olish maqsadida yigʻilish oʻtkazildi.

Aytish joizki, tuman hokimi – Fuqaro muhofazasi boshligʻining tuman Epidemiyaga qarshi kurashish favqulodda komissiyasining majlis bayoniga asosan tuman hududiga koronavirus infektsiyasi kirib kelishining oldini olish chora-tadbirlari dasturini tayyorlash hamda idora-tashkilotlarning faoliyatini muvofiqlashtirish shtabi tarkibi tasdiqlanib, oʻz ishini boshlagan edi.

Yigʻilishda Qoraqalpogʻiston Respublikasi Favqulodda vaziyatlar boshqarmasining boʻlim boshligʻi Ulugʻbek Masharipov, tuman hokimi Sultonboy Yoʻldashev, hokim oʻrinbosarlari, hokimlik masʼullari hamda tashkil etilgan shtab aʼzolari ishtirok etdilar. Tuman hokimi hamda maxsus shtab bilan birga epidemiyaga qarshi kurashish boʻyicha chora-tadbirlar belgilab olindi.

Yigʻilishda soʻzga chiqqanlar taʼkidlaganidek, yurtimizda aholi oʻrtasida koronavirus infektsiyasi boʻyicha epidemiologik barqarorlikni taʼminlashga yoʻnaltirilgan barcha profilaktik va epidemiyaga qarshi tadbirlar xalqaro tibbiy sanitariya talablari asosida amalga oshirilmoqda.

Mamlakatimiz boʻylab oʻtkazilayotgan karantin choralari kasallikning keskin oʻsib ketishining oldini olishga, shuningdek, tibbiy yordamga muhtoj odamlarning sogʻliqni saqlash tizimi imkoniyatlaridan toʻlaqonli foydalana olishlari uchun imkon yaratadi. Karantinga rioya qilmaslik – nafaqat oʻzi, balki oila aʼzolari, yaqinlari, atrofidagilari uchun kasallikni yuqtirib olish xavfini keltirib chiqaradi.

Aytish kerakki, yurtimiz aholisining sanitariya-epidemiologik osoyishtaligi va xavfsizligini taʼminlash, koronavirus infektsiyasi tarqalishining oldini olishda mutasaddi davlat va xoʻjalik boshqaruvi organlari hamda tashkilotlarning faoliyati muvofiqlashtirilgan holda tashkil etilmoqda. Mamlakatimiz fuqarolarining hayoti va sogʻligʻini muhofaza qilish maqsadida Oʻzbekiston Respublikasi Vazirlar Mahkamasining “Koronavirus infektsiyasi tarqalishiga qarshi qoʻshimcha chora-tadbirlar toʻgʻrisida”gi qarori va boshqa qonun hujjatlarida belgilab berilgan chora-tadbirlar amalga oshirilmoqda. Oʻz navbatida aholi vakillari ham joriy etilgan karantin holatlariga amal qilishi, ushbu epidemiya tarqalishining oldini olishga barcha birdek oʻz hissasini qoʻshishi lozimligini his qilishi kerak.

Shuni taʼkidlash lozimki, nafaqat koronavirus, balki barcha yuqumli kasalliklarning oldini olishning eng samarali usuli bu – shaxsiy va jamoat gigiyenasi qoidalariga qatiy amal qilish, aholi oʻrtasida sanitariya-targʻibot ishlarini tashkil etishdan iboratdir.

Yuqumli kasalliklarning oldini olish, nafaqat tibbiyot xodimlarining vazifasi, balki oʻzini, oila-aʼzolarini, Vatanimizning ertangi kuni, kelajagi boʻlmish farzandlarimizning sogʻligʻi uchun qaygʻurgan barcha fuqarolarimizning sharafli burchidir.

Charos Arslonova, tuman hokimligining Axborot xizmati rahbari.