ТУМАНИМИЗДА КОPОНАВИPУСНИНГ ОЛДИНИ ОЛИШГА ҚАPАТИЛГАН ЧОPА-ТАДБИPЛАP КУЧАЙТИPИЛМОҚДА

Коронавирус пандемияси бугунги кунда бутун дунёда катта тезликда тарқалиб, янги-янги ҳудудларни қамраб олмоқда. Ушбу касаллик 2020 йилнинг 20 мартига қадар дунёнинг 180 та мамлакатига кириб борди. Афсуски, бу юқумли хасталик мамлакатимизни ҳам четлаб ўтмади.

15 март куни Парижда саёҳатда бўлиб қайтган шифокорда илк марта касаллик вируси аниқланган бўлса, 20 мартга келиб жами коронавирусга чалинганлар 33 нафарга етди. Касаллик юртдошимизда аниқлангани муносабати билан  муҳтарам Президентимиз топшириғига мувофиқ Pеспублика махсус комиссияси тузилиб, касалликнинг кенг тарқалишига қарши тезкор чора-тадбирлар амалга оширилмоқда. Бу борада сўз кетганида 16 мартдан бошлаб, юртимизда карантин ҳолати жорий этилиб, мактабгача таълим, мактаб, олий таълим муассасалари вақтинча ёпилгани, одамлар гавжум жойларда оммавий тадбирлар чеклангани, аҳоли орасида ушбу касалликни юқтириб олмаслик йўл-йўриқлари кенг тарғиб қилинаётганини айтиш ўринли.

Бутун мамлакатимизда бўлгани каби коронавирус кириб келиши ва кенг тарқалишининг олдини олиш учун туманимизда йил бошиданоқ кескин чора-тадбирлар амалга оширила бошланган эди. Январь ойидан бери хорижда бўлиб қайтган фуқаролар уй карантинига олиниб, уларнинг кундалик ҳолати туман Санитария эпидемиологик осойишталик маркази ходимлари томонидан мунтазам назорат қилиб борилди. Март ойи бошидан бери туманимиз ҳудудида ва мамлакатимизнинг турли вилоятларига, Тошкент шаҳрига қатнайдиган жамоат транспортлари ҳар тўрт соатда дезинфекция қилинаяпти. Шунингдек, аҳоли гавжум жойларда, мактабгача таълим, халқ таълими муассасаларида ҳам дезинфекциялаш ишлари амалга оширилди ва касалликдан сақланиш қоидалари ёзилган плакатлар тарқатилди.

Касаллик кириб келганидан кейин бу чора-тадбирлар яна  ҳам кучайтирилиб, туман Тиббиёт бирлашмаси ходимлари фавқулодда иш режимига ўтказилди. Улар касалликни тезкор аниқлаш ва аниқланган ҳолатда қандай йўл тутиши лозимлиги бўйича ўқитилди.

Шу йилнинг 20 март куни туман Санитария эпидемилогик осойишталик маркази ва туман Тиббиёт бирлашмаси шифокорлари ҳамкорлигида касалликнинг олдини олишга хизмат қилувчи дезинфекциялаш ишлари давом эттирилди. Шу куни “Асл сифат” оилавий корхонасига қарашли дўкон, ошхона, “Pўзметов Темур” оилавий корхонаси ошхонаси ва дўкони, “Ватан” кафеси ва “Худойберган” тўйхонаси, шунингдек, туманимизнинг турли ҳудудларига қатнайдиган автобуслар ва маршрутли таксилар дезинфекция қилинди. Ундан ташқари, туман ҳудудидаги карантинда бўлган мактабгача таълим ташкилотларида ҳам тўлақонли дезинфекция ишлари амалга оширилди.

Давлатимиз томонидан пандемияга айланган коронавирус касаллиги тарқалишининг олдини олишга  қанчалик кўп ҳаракат қилинмасин, қанчалик кўп маблағ сарфланмасин, барибир юртдошларимизнинг  бу хавфга оқилона муносабатда бўлиши, зарурат бўлмаганда жамоат жойларига боришдан тийилиб, уйда бўлиши ва санитария-гигиена қоидаларига қатъий амал қилиши кутилган натижага эришишда асосий роль ўйнайди.

Юртимиз шифокорлари ўзларининг жонини аямай касалликка  қарши курашга, аҳолини бу хавфдан талафотларсиз олиб чиқишга бел боғлаб, фуқароларимизга “Биз сиз учун ишга чиқдик, сиз биз учун уйда қолинг”, дея мурожаат қилишмоқда.

Дарвоқе, инсон соғ-омон бўлса, ҳаётида яхши кунлар кўп бўлади. Демоқчимизки, вақтинча тўй-базмларни, турли тантаналарни  тўхтатиб, мамлакатимизда коронавирус пандемияси тарқалиб кетишининг олди олинишига ҳар ким шахсий ҳисса қўшиши, ваҳимага берилмасдан ҳамжиҳатликда бу синовни енгиб ўтишга ҳаракат қилиши лозим.

Ойгул PАЖАБОВА.