ЧЕГАРА ҲУДУД АҲОЛИСИ БИЛАН ЙИҒИЛИШ ЎТКАЗИЛДИ

Қиличбой овул фуқаролар йиғинида маҳаллада ижтимоий-маънавий муҳитни соғломлаштириш ҳамда чегара олди ҳудудида яшаш тартиб қоидаларини аҳолига етказиш  масалаларига бағишланган йиғилиш  бўлиб ўтди.

Йиғилишда овул фуқаролар йиғини масъул ходимлари, Давлат хавфсизлик хизмати Амударё туман бўлинмаси ходими А.Қўчқоров, туман ҳокимининг  чегара масалалари бўйича ўринбосари О.Шомуродов,  туман ҳокимлиги жамоат ва диний ташкилотлар билан алоқалар бўйича бош мутахассиси Ж.Йўлдошев, Давлат хавфсизлик хизматига қарашли  9202 “К” ҳарбий қисм командири А.Равшанов, туман бош имом-хатиби А.Матсапаев, шунингдек, овул фаоллари, кўча бошчилари ва ёшлари иштирок этдилар.
Йиғилишни Қиличбой овул фуқаролар йиғини раиси Баҳром Қодиров очди ва олиб борди. У ўз сўзида сўнгги йилларда Муҳтарам Президентимиз томонидан аҳоли фаровонлигини ошириш бўйича бир қанча қарор ва фармонлар қабул қилиниб, ҳаётга татбиқ этилаётганини, натижада юртдошларимиз турмуш тарзи тобора ободлашиб бораётганини таъкидлади. Шундай шароитда  ёшлар таълим-тарбиясига жиддий эътибор қаратиш бугунги кундаги долзарб масалалардан бири эканлигини, ёшлар қалбида ватанпарварлик туйғуларини, миллий, маънавий-маданий қадриятларни мустаҳкамлаш, “Жаҳолатга қарши – маърифат” ғояси асосида жамиятда ижтимоий-маънавий муҳит барқарорлигини таъминлаш, инсонпарварлик, эзгулик ва тинчликни қадрлаш ҳамда диний бағрикенглик ва миллатлараро тотувликни янада мустаҳкамлаш асосий вазифалардан бири эканлиги ҳақида тўхталиб ўтди.

Сўнгра, сўзга туман ҳокимининг чегара масалалари бўйича ёрдамчиси О.Шомуродов чиқиб, шахсларнинг чегара олди зонасига кириши, ундан чиқиши ва ўтиши, у ерда бўлиши ва яшаши, агар қонун ҳужжатларида бошқача тартиб белгиланган бўлмаса, ички ишлар органларининг рухсатномаси асосида амалга оширилиши, чегара олди минтақасига кириш ва ундан чиқиш, ўтиш, у ерда вақтинча бўлиш, яшаш, ҳаракатланиш ва ишлар бажариш чегара қўшинларининг рухсатномаси асосида амалга оширилиши тўғрисида айтиб, аҳолини “Ўзбекистон Республикасининг Давлат чегараси тўғрисида” Қонуни тартиб-қоидаларига риоя этишга чақирди.

Туман  ҳокимлиги жамоат ва диний ташкилотлар билан алоқалар бўйича бош мутахассиси Ж.Йўлдошев  бугунги кунда Муҳтарам Президентимиз томонидан ёшлар таълим-тарбиясига алоҳида эътибор қаратилаётганлигини айтиб, аҳоли, айниқса, ёшларнинг мутаассиб ғояларга берилиш ҳолатларининг олдини олиш мақсадида бўш вақтларини мазмунли ўтказиш мақсадида  ҳудуддаги маданият ва истироҳат боғларида маҳаллий хонандалар, бадиий ҳаваскорлик жамоалари, болалар мусиқа ва санъат мактаблари, дорбозлик ва цирк санъати усталарининг концерт дастурларини ўтказиш, ўқувчи-ёшлар ва кенг жамоатчилик ўртасида ижтимоий тармоқларда тарқатилаётган турли ғаразли ёт ғояларга қарши мафкуравий иммунитетни шакллантириш орқали ёшлар қалбида ватанпарварлик туйғуларини, миллий, маънавий-маданий қадриятларни мустаҳкамлаш, маънавий муҳит барқарорлигини таъминлашда барча бирдек масъул эканлигини таъкидлаб ўтди. Сўнгра, сўзга туман бош имом-хатиби А.Матсапаев чиқиб, мутаассиблик, экстремизм ва терроризмга қарши тарғиботни янада кучайтириш, маънавий-маърифий тадбирларда ижтимоий-иқтисодий ҳамда дин соҳасидаги олиб борилаётган ислоҳотлар мазмун-моҳиятини аҳолига етказиш кераклигини айтиб, сўнги йилларда Муҳтарам Президентимиз томонидан диний соҳа фаолиятини такомиллаштириш бўйича амалга оширилаётган ишлар тўғрисида тўхталиб ўтди.

Йиғилиш сўнггида сўзга Қиличбой овул фуқаролар йиғини профилактика инспектори М.Дуйсенбоев ҳудудда жиноятчилик ва ҳуқуқбузарликларнинг олдини олиш борасидаги ишларни янада жадаллаштириш, ёшларнинг тунги пайтларда ота онаси ёки уларнинг ўрнини босувчи шахсларсиз юришларининг олдини олиш ҳамда чет давлатларга ишлаш учун чиқиб кетаётган фуқароларнинг турли ёт ғоялар таъсирига тушиб қолишларининг олдини олиш кераклигини таъкидлаб ўтди.

 Йиғилишда кун тартибидаги масала юзасидан билдирилган таклиф ва мулоҳазаларни инобатга олиб,  тегишли қарор қабул қилинди.

   
О. РАЖАБОВА.