ChEGARA HUDUD AHOLISI BILAN YIGʻILISh OʻTKAZILDI

Qilichboy ovul fuqarolar yigʻinida mahallada ijtimoiy-maʼnaviy muhitni sogʻlomlashtirish hamda chegara oldi hududida yashash tartib qoidalarini aholiga yetkazish  masalalariga bagʻishlangan yigʻilish  boʻlib oʻtdi.

Yigʻilishda ovul fuqarolar yigʻini masʼul xodimlari, Davlat xavfsizlik xizmati Amudaryo tuman boʻlinmasi xodimi A.Qoʻchqorov, tuman hokimining  chegara masalalari boʻyicha oʻrinbosari O.Shomurodov,  tuman hokimligi jamoat va diniy tashkilotlar bilan aloqalar boʻyicha bosh mutaxassisi J.Yoʻldoshev, Davlat xavfsizlik xizmatiga qarashli  9202 “K” harbiy qism komandiri A.Ravshanov, tuman bosh imom-xatibi A.Matsapayev, shuningdek, ovul faollari, koʻcha boshchilari va yoshlari ishtirok etdilar.
Yigʻilishni Qilichboy ovul fuqarolar yigʻini raisi Bahrom Qodirov ochdi va olib bordi. U oʻz soʻzida soʻnggi yillarda Muhtaram Prezidentimiz tomonidan aholi farovonligini oshirish boʻyicha bir qancha qaror va farmonlar qabul qilinib, hayotga tatbiq etilayotganini, natijada yurtdoshlarimiz turmush tarzi tobora obodlashib borayotganini taʼkidladi. Shunday sharoitda  yoshlar taʼlim-tarbiyasiga jiddiy eʼtibor qaratish bugungi kundagi dolzarb masalalardan biri ekanligini, yoshlar qalbida vatanparvarlik tuygʻularini, milliy, maʼnaviy-madaniy qadriyatlarni mustahkamlash, “Jaholatga qarshi – maʼrifat” gʻoyasi asosida jamiyatda ijtimoiy-maʼnaviy muhit barqarorligini taʼminlash, insonparvarlik, ezgulik va tinchlikni qadrlash hamda diniy bagʻrikenglik va millatlararo totuvlikni yanada mustahkamlash asosiy vazifalardan biri ekanligi haqida toʻxtalib oʻtdi.

Soʻngra, soʻzga tuman hokimining chegara masalalari boʻyicha yordamchisi O.Shomurodov chiqib, shaxslarning chegara oldi zonasiga kirishi, undan chiqishi va oʻtishi, u yerda boʻlishi va yashashi, agar qonun hujjatlarida boshqacha tartib belgilangan boʻlmasa, ichki ishlar organlarining ruxsatnomasi asosida amalga oshirilishi, chegara oldi mintaqasiga kirish va undan chiqish, oʻtish, u yerda vaqtincha boʻlish, yashash, harakatlanish va ishlar bajarish chegara qoʻshinlarining ruxsatnomasi asosida amalga oshirilishi toʻgʻrisida aytib, aholini “Oʻzbekiston Respublikasining Davlat chegarasi toʻgʻrisida” Qonuni tartib-qoidalariga rioya etishga chaqirdi.

Tuman  hokimligi jamoat va diniy tashkilotlar bilan aloqalar boʻyicha bosh mutaxassisi J.Yoʻldoshev  bugungi kunda Muhtaram Prezidentimiz tomonidan yoshlar taʼlim-tarbiyasiga alohida eʼtibor qaratilayotganligini aytib, aholi, ayniqsa, yoshlarning mutaassib gʻoyalarga berilish holatlarining oldini olish maqsadida boʻsh vaqtlarini mazmunli oʻtkazish maqsadida  hududdagi madaniyat va istirohat bogʻlarida mahalliy xonandalar, badiiy havaskorlik jamoalari, bolalar musiqa va sanʼat maktablari, dorbozlik va tsirk sanʼati ustalarining kontsert dasturlarini oʻtkazish, oʻquvchi-yoshlar va keng jamoatchilik oʻrtasida ijtimoiy tarmoqlarda tarqatilayotgan turli gʻarazli yot gʻoyalarga qarshi mafkuraviy immunitetni shakllantirish orqali yoshlar qalbida vatanparvarlik tuygʻularini, milliy, maʼnaviy-madaniy qadriyatlarni mustahkamlash, maʼnaviy muhit barqarorligini taʼminlashda barcha birdek masʼul ekanligini taʼkidlab oʻtdi. Soʻngra, soʻzga tuman bosh imom-xatibi A.Matsapayev chiqib, mutaassiblik, ekstremizm va terrorizmga qarshi targʻibotni yanada kuchaytirish, maʼnaviy-maʼrifiy tadbirlarda ijtimoiy-iqtisodiy hamda din sohasidagi olib borilayotgan islohotlar mazmun-mohiyatini aholiga yetkazish kerakligini aytib, soʻngi yillarda Muhtaram Prezidentimiz tomonidan diniy soha faoliyatini takomillashtirish boʻyicha amalga oshirilayotgan ishlar toʻgʻrisida toʻxtalib oʻtdi.

Yigʻilish soʻnggida soʻzga Qilichboy ovul fuqarolar yigʻini profilaktika inspektori M.Duysenboyev hududda jinoyatchilik va huquqbuzarliklarning oldini olish borasidagi ishlarni yanada jadallashtirish, yoshlarning tungi paytlarda ota onasi yoki ularning oʻrnini bosuvchi shaxslarsiz yurishlarining oldini olish hamda chet davlatlarga ishlash uchun chiqib ketayotgan fuqarolarning turli yot gʻoyalar taʼsiriga tushib qolishlarining oldini olish kerakligini taʼkidlab oʻtdi.

 Yigʻilishda kun tartibidagi masala yuzasidan bildirilgan taklif va mulohazalarni inobatga olib,  tegishli qaror qabul qilindi.

   
O. RAJABOVA.