Куюк кўпир овулида ободонлаштириш ва кўкаламзорлаштириш ишлари ўтказилди

Халқимизда азал-азалдан баҳор келиши билан ота-боболаримиз томонидан улуғ қадриятларимизни асраш ва улуғ айём шодиёна кунларини яхши ният билан кутиб олиш, атроф - муҳитни кўкаламзорлаштириш, ободонлаштириш ва хайр-у саховат йўлидаги эзгу ишларни амалга ошириш одат тусини олган. Жорий йилда ҳам баҳор келиши билан юртимизда ободонлаштириш ва кўкаламзорлаштириш ишлари аллақачон бошлаб юборилди.

Туманимизда янгиланиш, яшариш фасли – кўкламнинг кириб келиши билан маҳаллаларда, кўча-кўйларда, барча ишхоналарда ободонлаштириш, кўкаламзорлаштириш ишлари айни пайтга келиб қизғин тус олди. Aна шундай хайрли тадбир Куюк кўпир овулида уюшқоқлик билан амалга оширилди.

Овул ҳудудидаги кўчалар, йўл бўйлари ва маҳаллаларда гул кўчатлари, манзарали дарахтлар экиш, дарахтларни буташ ва оҳаклаш, кўча ва йўлларни тартибга келтириш каби хайрли ишларга аҳоли кенг турда жалб қилинди. Шунингдек, бу жараёнда чиқиндиларни тартибли равишда олиб ташлаш, қабристонларни, ариқ ва зовурларни тартибга келтириш билан бир қаторда кекса ва ногиронлар, боқувчисини йўқотганлар, якка-ёлғиз инсонларнинг ҳолидан хабар олинди.

Шу ўринда таъкидлаш керакки, ташкил этилаётган бундай тадбирлар жараёнида халқимизнинг яратувчилик салоҳиятини кенг намойиш этишга, тозалик, озодалик ва саранжом-саришталикнинг инсон саломатлигини асрашдаги аҳамиятини ёшлар онг-шуурига янада чуқурроқ сингдиришга алоҳида эътибор қаратилади. Бундай хайрли ишларда, айниқса, ёшлар фаоллик кўрсатишади. Ободонлаштириш, кўкаламзорлаштириш ишларини амалга ошириб, атрофга янада файз киритишади. Жамият ҳаётида фаол иштирок этиб, айни пайтда кексалик гаштини сураётган кексалар, ногиронлар, якка-ёлғиз яшовчилар ҳолидан хабар олиб, уларнинг ҳам кўнглини обод қилишади.

Куюк кўпир овулидаги Деҳқон ва Буюм бозорларининг ҳудуди, атрофлари тозаланиб, дарахтлар  оҳакланди. Маиший чиқиндиларни чиқариб ташлашда  ҳудуддаги тадбиркорлар катта ёрдам қилишди. Бу хайрли ишда тадбиркорлар ўзларида мавжуд бўлган техникаларни жалб қилиб, яқиндан кўмак бердилар. Ободонлаштириш ишларида тракторчилардан Баҳодир Шомуродов, Шуҳрат Нурманов, Шуҳрат Самандаров, Шокир Холбоевлар жонбозлик кўрсатиб, фаол қатнашишди.

Ушбу хайрли тадбир доирасида туман Санитария- эпидемиология маркази ҳамда 5-сонли қишлоқ оилавий поликлиникаси ишчи-ходимлари ҳамкорлигида овул аҳолиси ўртасида тозалик ва санитария қоидаларига риоя этилиши юзасидан тушунтириш-тарғибот ишлари ҳам ўтказилди.

Кўкаламзорлаштириш тадбирида овулда катта йўл бўйларидаги, кўчалардаги барча ариқлар тозаланди, ҳудудддаги муассаса ва корхоналар ҳовлиларига, аҳоли хонадонлари томорқаларига, кўчалар ва йўл четларига ҳар хил, мевали ва манзарали дарахтлар, гуллар кўчатлари экилди.

Доно халқимизнинг “Савоб ишни ҳар ким, ҳар кун қилиши керак” нақли бежизга айтилмаган. Бундай хайрли ишларни инсон ҳар куни ўз уйида, маҳалласида қилишининг ўзи ҳам бир савобдир. Зеро, тоза ва озода, саранжом-саришта бўлган жойдагина қут-барака бўлади.

Чарос Aрслонова, туман ҳокимлигининг Aхборот хизмати.