МТТ ТАРБИЯЛАНУВЧИЛАРИ ХОРИЖИЙ ТИЛЛАРНИ ЎРГАНИШМОҚДА

Мамлакатимизда 6 ёшли болаларни МТТларнинг мактабгача таълим гуруҳларига тўлиқ қамраб олган ҳолда уларни мактаб таълимига тайёрлаш, билимга интилиш кўникмаларини ҳосил қилиш, алоҳида қобилиятларини ривожлантириш мақсадида олиб борилаётган ишлар ўз натижаларини бермоқда. Мактаб таълимига тайёрлаш гуруҳлари тарбияланувчилари алифбе сабоқларини қунт билан ўрганиб, ҳатто математик амалларни ёддан бажаришга интилаётгани МТТлар томонидан ташкил этилаётган тадбирларда ўз ифодасини топмоқда.

Туманимиздаги 31-сонли мактабгача таълим ташкилоти тарбияланувчилари иштирокида ўтказилган тадбирда ҳам сўз ўйинлари, тез айтишлар, рус ва инглиз тилларидаги саволларга тез жавоб топиш ҳамда бири-биридан мазмундор шеър ва қўшиқларни болажонлар мароқ билан ижро этишди.

“Келинг, тил ўрганамиз!” деб номланган очиқ дарс-машғулотида дастлаб ташкилотнинг мактабга тайёрлаш гуруҳи ўқитувчиси Бозоргул Шомуродова томонидан тайёрланган сценарий асосида рус тили бўйича болажонларнинг билим даражаси синовдан ўтказилди. Болаларнинг рус тилида саломлашиш одоби билан бошланган очиқ дарс-машғулоти савол-жавоблар асосида давом этди.

Болажонлар ўз ота-оналарини 8 март – Халқаро хотин-қизлар куни билан рус тилида табриклаб, шеърлар айтишди. Ота-оналари ва бувижонларига ҳафта кунларини бирма-бир таърифлаб беришди. Ўқитувчи раҳбарлигида янги  мавзуни ўрганишди. Яъни, уй ҳайвонларининг номларини рус тилида такрорлаб, бу борадаги билимларини расмлар орқали мустаҳкамладилар.

Очиқ дарс-машғулоти давомида болажонларни чарчаш ҳолатидан чиқариш мақсадида тетиклантирувчи машқларга кенг ўрин берилгани айни муддао бўлди. Кайфияти кўтарилган болажонларнинг фаоллиги ошиб, биргаликда қўшиқ куйладилар. “Ҳар доим бўлсин, қуёш” қўшиғини рус тилида куйлаб, рақсга тушдилар, шу билан бирга ушбу машҳур болалар қўшиғининг мазмун-моҳияти хусусида тушунчага  эга бўлдилар.

Очиқ дарс-машғулоти якунида дарсда фаол қатнашган  болажонларга ташкилот маъмурияти томонидан фахрий ёрлиқлар тақдим этилиб, уй вазифаси топширилди.
Шу куни мазкур ташкилотда Азима Ўрозбоева томонидан инглиз тили бўйича очиқ дарс-машғулотида ҳам болажонлар инглиз тилида саломлашиш, савол-жавоблар асосида ўтилган дарс мавзуси – йил фаслларига доир сўзларни такрорлаш ҳамда ёз, куз, қиш, баҳор ойлари ҳақида инглиз тилида гап тузиш бўйича ўз билим ва кўникмаларини намойиш этдилар.

Фаслларга оид ҳаракатларни ифода этувчи ўйинлар, жисмоний машқларни бажаришди.
Шундан сўнг, ўқитувчи болажонларни янги мавзуга доир янги сўзлар билан таништирди. Болажонлар бу сўзларни тўғри талаффуз қилишни ўргандилар ва янги сўзларни ҳаракатлар орқали ифодалаб бердилар. Дарс-машғулот жараёнида чарчоқни босиш мақсадида шўх ҳаракатлар билан ижро этиладиган инглизча қўшиқлар куйлашди. Шунингдек, фасллар ва об-ҳаво мавзусига доир ўйинлар ўйнаш, ўтилган дарс юзасидан савол-жавоблар орқали очиқ дарс-машғулоти мавзуси янада мустаҳкамланди.

Шуниси эътиборлики, бўлиб ўтган очиқ дарс-машғулоти болажонларнинг хорижий тилларни ўрганишга қизиқувчанлигини янада оширди. Инглиз тилида саволларга аниқ ва пухта жавоб берган билағон болажонлар ташкилот маъмурияти томонидан рағбатлантирилди.

Дарс-машғулоти якунида болажонларга уйда бажариб келишлари учун янги топшириқ берилди. “Фаслларга монанд об-ҳавони сурат чизиш орқали тасвирлаш” вазифаси бўйича ўқитувчи тушунчалар бериб, мавзуни инглиз тилида қайта-қайта такрорлаш орқали болажонларда зарур  тушунчалар уйғотишга эришди.
31-сонли МТТда мактабга тайёрлаш гуруҳи тарбияланувчилари бўлиб ўтган дарс-машғулотларида фаоллик кўрсатишди.

Р.ЙЎЛДОШЕВА.