Қиличбойлик ёшлар хорижий тилларни ўрганиш учун туман марказига қатнамайдиган бўлишди
Мустақиллик йилларида мамлакатимизда ёшлар тадбиркорлигини, уларнинг ғоя ва ташаббусларини қўллаб-қувватлаш, ишбилармонлик кўникмаларини ривожлантиришга қаратилган изчил чора-тадбирлар туфайли ҳар йили минглаб ёшлар ўз бизнес-ғояларини муваффақиятли амалга оширмоқдалар. Айниқса, уларнинг стартап ва инновацион ғояларини рўёбга чиқаришларига кўмаклашиш, касб-ҳунар, рақамли технологиялар ҳамда хорижий тилларни чуқур эгаллашлари учун зарур шарт-шароитлар яратиб берилаётгани ёшларнинг замонавий билимларни қунт билан ўрганишларида муҳим омил бўлмоқда. Ўзбекистон Республикаси Президентининг 2025 йил 14 февралдаги “Ёшлар тадбиркорлигини ривожлантириш ҳамда уларнинг бандлигини таъминлашга қаратилган бизнес-лойиҳаларни қўллаб-қувватлаш тизимини такомиллаштириш чора-тадбирлари тўғрисида”ги қарорига асосан Ёшлар ишлари агентлиги ҳузурида “Ёшлар тадбиркорлигини ривожлантириш давлат мақсадли жамғармаси” ташкил этилиб, мазкур жамғарма ҳисобидан “Кўмак” лойиҳаси амалга оширилаётгани ёшлар учун кенг имкониятлар сари йўл очди.
Ушбу лойиҳа хорижий тиллар бўйича С1 даражадаги миллий ёки халқаро даражадаги сертификатга эга ҳамда чекка ҳудудларда хорижий тилларга ихтисослашган ўқув маркази фаолиятини йўлга қўйиш ниятидаги ёшлар учун мўлжалланган бўлиб, бу имтиёздан амударёлик ёшлар ҳам самарали фойдаланишмоқда. Лойиҳанинг афзаллик томони шундаки, таълим йўналишида ўз бизнесини бошлаётган ёшларга 3 йил муддатга, 6 ойлик имтиёзли давр билан 130 млн сўмгача ссуда (фоизсиз қарз) берилади.
Амударё туманининг Қиличбой овулида туғилиб-ўсган Сардорбек Имомиддинов ахборот технологиялари соҳаси бўйича олий маълумотли мутахассис. У Қиличбой ҳудудидаги олис қишлоқ ва маҳаллалардан 35-40 чақирим йўл босиб, туман марказидаги хорижий тилларни ўргатиш бўйича ўқув курсларига қатнаб, таълим олаётган ҳамқишлоқларига шароит яратишни кўпдан орзу қиларди. Ана шу эзгу орзусини амалга ошириш, қолаверса, ёзнинг жазирама иссиғи-ю изғиринли қиш кунларида туман марказига қатнаб, қимматли вақтларини беҳуда сарфлаётган қиличбойлик ёшларни қўллаб-қувватлаш мақсадида чет тилларни ўқитишга ихтисослашган ўқув марказини ташкил этишга қарор қилди. Шу ниятда ўз бизнес ғояси билан Ёшлар ишлари агентлиги томонидан ташкиллаштирилган “Ўқув марказлари форуми”да иштирок этди ва 130 млн сўмлик ссуда учун ваучерни қўлга киритиб, қиличбойлик ёшлар учун хорижий тилларни ўқитишга ихтисослашган ўқув маркази фаолиятини йўлга қўйди.
Орзулари йўлидаги илк қадамни ўқув маркази биносини энг замонавий ахборот технологиялари билан жиҳозлаш, малакали чет тили ўқитувчиларини танлов асосида ишга қабул қилишдан бошлаган Сардорбек Имомиддинов раҳбарлигидаги чет тилларни ўқитишга ихтисослашган таълим муассасасида айни пайтда 2 сменада 250 нафар илмга чанқоқ ёшлар катта қизиқиш билан хорижий тилларни ўрганишмоқда. Эътиборли томони шундаки, мазкур ўқув марказининг очилиши нафақат ўқувчи-ёшлар учун, балки уларнинг ота-оналари учун ҳам аввало қулайлик, қолаверса, йўл харажатларини тежаш имконини берди.
Айни пайтда ўқув марказида Сардорбек Имомиддиновнинг шахсий ташаббуси билан компьютер саводхонлиги бўйича бепул машғулотлар ўтказиш ҳам йўлга қўйилганидан қиличбойликлар мамнун.
Билимдон, изланувчан, ташаббускор ёшлар — мамлакатимизнинг суянч тоғларидир. Чунки ҳар қандай давлатнинг жадал ривожланиши, дунё миқёсида муайян ютуқларга эришиши, халқнинг фаровон ҳаёти ёш авлод таълим-тарбияси ҳамда уларнинг келажагини кўзлаб қилинган эзгу ишларга боғлиқ. Сардорбек Имомиддиновнинг ўсиб келаётган қиличбойлик ёш авлодни қўллаб-қувватлаш мақсадидаги саъй-ҳаракатлари мазмун-моҳиятида ҳам она Ватан келажагига дахлдорлик ҳисси билан яшаб, меҳнат қилишдек эзгу ниятлар мужассам. Биз таълим соҳасидаги ёш фидойи тадбиркор Сардорбек Имомиддиновга мустаҳкам соғлик ва муваффақиятлар тилаймиз.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
