Сенатор Шароф Уснатдинов туманимизга ташриф буюрди

Шу йилнинг 25 февраль санасида туманимизга Ўзбекистон Pеспубликаси Олий Мажлиси Сенати аъзоси, сенатор, таниқли журналист, истеъдодли ижодкор, Қорақалпоғистонда хизмат кўрсатган журналист, Қорақалпоғистон Pеспубликаси халқ ёзувчиси, “Эл-юрт ҳурмати” ордени соҳиби Шароф Уснатдинов ташриф буюрди.

Меҳмон дастлаб туманимизнинг ободонлаштириш ва кўкаламзорлаштириш ишларига ўз ҳиссасини қўшиш мақсадида Гулзор маҳалласи ҳудудида туман ёшлари билан биргаликда янги арча кўчатларини экиш ишларида иштирок этди.

Шундан сўнг Шароф Уснатдинов 9-сонли Болалар мусиқа ва санъат мактабида туманимиз ёшлари билан бўлган учрашиб, самимий суҳбат олиб борди.
Шу ўринда таъкидлаш керакки, Шароф Уснатдинов мамлакатимизнинг ривожланиши ва гуллаб-яшнаши йўлида ўзининг бор билими ва тажрибасини, истеъдодини, бир сўз билан айтганда, ўз ҳаётини бағишлаган фидойи инсондир. У  қандай лавозимда ишламасин, шу эл учун, халқ фаровонлиги ва Ватан тараққиёти учун жонини ҳам аямай меҳнат қилди. Унинг инсоний фазилатлари, босиб ўтган ҳаёт йўли ёшларимиз учун ҳақиқий ибрат мактаби бўла олади.

Шароф Уснатдинов бир неча газеталар таҳририятилари, Қорақалпоғистон телерадио қўмитаси, нашриёт ва театрда масъул раҳбар лавозимларида ишлаб, халқимизнинг маънавий дунёсини янада бойитишга муносиб ҳисса қўшди. Қолаверса, бир қатор давлат ва жамоат ташкилотларига раҳбарлик қилиб, Ватанимиз тараққиёти ва халқимиз фаровонлигига ҳисса қўшиб келмоқда, халқимиз ишончини қозониб, Қорақалпоғистон Pеспубликаси Жўқорғи Кенгеси депутати ҳамда Ўзбекистон Pеспубликаси Олий Мажлиси Сенати аъзоси қилиб сайланган.

Меҳмон ёшлар билан суҳбат чоғида инсон комилликка эришишининг ягона йўли китоб ўқиш, илм ўрганиш эканлигини, ҳақиқий қунт билан эгалланган билимгина инсонни юксакликка кўтаришини, китоб билан дўст тутинган инсон ҳаётда муносиб ўрнини топа олишини таъкидлаб, ёшларни умрининг ҳар бир сониясидан унумли фойдаланишга ҳамда китоб ўқиб, илм олишга даъват қилди.

Шундан кейин туман ҳокимлигининг кичик мажлислар залида туман фаоллари, нуронийлар, депутатлар ва ёшлар билан учрашув бўлиб ўтди. Сенатор ўз нутқида ҳақиқий халқпарвар депутат қандай бўлиши лозимлиги, депутатларнинг халқ ҳаётидаги ўрни ва аҳамияти ҳақида, шунингдек, кексалар ва нуронийларни эъзозлаш лозимлиги, уларнинг ёш авлод тарбиясида, оилалар мустаҳкамлигини таъминлашда ибратли ҳаёт йўлидан сабоқ олиш лозимлиги ҳақида йиғилганлар билан фикр алмашди.

Туман ҳокимлигининг Ахборот хизмати.