“Чордара” маҳалласида депутатлар иштирокида сайёр қабул ўтказилиб, аҳоли муаммолари ўрганилди

Ўзбекистон Республикаси Олий мажлис Қонунчилик палатаси, Қорақалпоғистон Республикаси Жўқорғи Кенгеси ва маҳаллий Кенгашлар депутатлари жойларга бориб, аҳоли билан учрашувлар ўтказишмоқда.  Уларни қийнаётган муаммоларни ўрганиб, ўз ваколатлари доирасида ҳал қилишга ва тегишли жойларга етказишга ҳаракат қилишмоқда.

Тадбиркорлар ва ишбилармонлар ҳаракати - Ўзбекистон Либерал демократик партияси туман Кенгаши депутатлик гуруҳи аъзолари томонидан ҳам тумандаги “Чордара” маҳалласида мавжуд муаммоларни ўрганиш, уларнинг ечимини топишда ва бартараф этилишида кўмаклашиш мақсадида фуқаролар учун сайёр қабул ташкил этилди.

Сайёр қабулда партиянинг туман Кенгаши аппарат раҳбари Муқаддас Бекназарова,  депутатлик гуруҳи аъзолари, туман Кенгаши депутати Муяссар Раҳматуллаева, Жўқорғи Кенгес депутати Қувонч Боймуродовлар қатнашдилар. Шунингдек, туман Aдлия бўлими бошлиғи Мўминжон Матюсупов ҳам иштирок этди.

Сайёр қабулда туман Aдлия бўлими бошлиғи Мўминжон Матюсупов аҳолига дастлаб янги даврнинг муҳим талаби сифатида инсон ҳуқуқ ва эркинликларини, унинг қонуний манфаатларини таъминлаш – бугунги кундаги ислоҳотларнинг бош  ғоясига айланганини таъкидлади. Шунингдек, фуқароларнинг ҳуқуқий онг ва маданиятини юксалтириш жараёнида уларда қонунларга нисбатан ҳурмат ҳиссини мустаҳкамлаш, ҳар бир фуқаро ўз ҳуқуқлари билан бирга ҳуқуқий мажбуриятларини ҳам бажариши лозимлигини тушунтириб ўтди. Шунингдек, фуқароларнинг ҳуқуқ ва бурчлари, мажбуриятлари, мурожаат қилиш тартиби тўғрисида ҳам маълумотлар бериб ўтди.

Сайёр қабулда иштирок этаётган партиянинг туман Кенгаши депутатлик гуруҳи аъзолари ҳам мамлакатнинг тараққиёти мазкур давлат ҳудудида истиқомат қилувчи фуқароларнинг қонунлардан ва бошқа норматив-ҳуқуқий ҳужжатлардан қанчалик хабардорлиги ва ушбу қонунларга нисбатан муносабатига боғлиқлигини, аҳолининг ҳуқуқий маданиятини доимий равишда юксалтириб бориш, республикамиздаги барча давлат органларининг асосий вазифаларидан бири эканлигини эътироф этишди.

Ҳамкорликда ўтказилган сайёр қабулда фуқаролардан кўплаб таклиф ва мурожаатлар тушди.
Ушбу ҳудуд аҳолиси асосан газ босими пастлиги муаммо бўлаётганини билдиришди ва амалий ёрдам сўраб мурожаат қилишди. Ҳудуддаги муаммоларнинг ечимини топишда кўмак бериш мақсадида иштирок этаётган туман Электр тармоқлари корхонаси, “Қорақалпоқгаз” туман филиали мутасаддилари бу борада аҳолини қийнаётган саволларга жавоблар беришди.

Сайёр қабул давомида аҳоли фикрлари, таклифлари ўрганилиб, амалий натижа учун чоралар кўриладиган бўлди.
Юқоридаги муаммоларни ижобий ҳал этиш мақсадида депутат томонидан тегишли ташкилотларга депутатлик сўровлари юборилди.
Жойларда давом этаётган бу каби сайёр қабулларда кўплаб муаммолар ижобий ҳал этилмоқда. Давлат органлари раҳбарларининг аҳоли билан юзма-юз учрашиб, мулоқот қилиши уларнинг ҳуқуқий маданиятини юксалтириш, ҳаётдан рози бўлиб яшашида муҳим омил бўлмоқда.

Озода Худойберганова.