“Chordara” mahallasida deputatlar ishtirokida sayyor qabul oʻtkazilib, aholi muammolari oʻrganildi

Oʻzbekiston Respublikasi Oliy majlis Qonunchilik palatasi, Qoraqalpogʻiston Respublikasi Joʻqorgʻi Kengesi va mahalliy Kengashlar deputatlari joylarga borib, aholi bilan uchrashuvlar oʻtkazishmoqda.  Ularni qiynayotgan muammolarni oʻrganib, oʻz vakolatlari doirasida hal qilishga va tegishli joylarga yetkazishga harakat qilishmoqda.

Tadbirkorlar va ishbilarmonlar harakati - Oʻzbekiston Liberal demokratik partiyasi tuman Kengashi deputatlik guruhi aʼzolari tomonidan ham tumandagi “Chordara” mahallasida mavjud muammolarni oʻrganish, ularning yechimini topishda va bartaraf etilishida koʻmaklashish maqsadida fuqarolar uchun sayyor qabul tashkil etildi.

Sayyor qabulda partiyaning tuman Kengashi apparat rahbari Muqaddas Beknazarova,  deputatlik guruhi aʼzolari, tuman Kengashi deputati Muyassar Rahmatullayeva, Joʻqorgʻi Kenges deputati Quvonch Boymurodovlar qatnashdilar. Shuningdek, tuman Adliya boʻlimi boshligʻi Moʻminjon Matyusupov ham ishtirok etdi.

Sayyor qabulda tuman Adliya boʻlimi boshligʻi Moʻminjon Matyusupov aholiga dastlab yangi davrning muhim talabi sifatida inson huquq va erkinliklarini, uning qonuniy manfaatlarini taʼminlash – bugungi kundagi islohotlarning bosh  gʻoyasiga aylanganini taʼkidladi. Shuningdek, fuqarolarning huquqiy ong va madaniyatini yuksaltirish jarayonida ularda qonunlarga nisbatan hurmat hissini mustahkamlash, har bir fuqaro oʻz huquqlari bilan birga huquqiy majburiyatlarini ham bajarishi lozimligini tushuntirib oʻtdi. Shuningdek, fuqarolarning huquq va burchlari, majburiyatlari, murojaat qilish tartibi toʻgʻrisida ham maʼlumotlar berib oʻtdi.

Sayyor qabulda ishtirok etayotgan partiyaning tuman Kengashi deputatlik guruhi aʼzolari ham mamlakatning taraqqiyoti mazkur davlat hududida istiqomat qiluvchi fuqarolarning qonunlardan va boshqa normativ-huquqiy hujjatlardan qanchalik xabardorligi va ushbu qonunlarga nisbatan munosabatiga bogʻliqligini, aholining huquqiy madaniyatini doimiy ravishda yuksaltirib borish, respublikamizdagi barcha davlat organlarining asosiy vazifalaridan biri ekanligini eʼtirof etishdi.

Hamkorlikda oʻtkazilgan sayyor qabulda fuqarolardan koʻplab taklif va murojaatlar tushdi.
Ushbu hudud aholisi asosan gaz bosimi pastligi muammo boʻlayotganini bildirishdi va amaliy yordam soʻrab murojaat qilishdi. Hududdagi muammolarning yechimini topishda koʻmak berish maqsadida ishtirok etayotgan tuman Elektr tarmoqlari korxonasi, “Qoraqalpoqgaz” tuman filiali mutasaddilari bu borada aholini qiynayotgan savollarga javoblar berishdi.

Sayyor qabul davomida aholi fikrlari, takliflari oʻrganilib, amaliy natija uchun choralar koʻriladigan boʻldi.
Yuqoridagi muammolarni ijobiy hal etish maqsadida deputat tomonidan tegishli tashkilotlarga deputatlik soʻrovlari yuborildi.
Joylarda davom etayotgan bu kabi sayyor qabullarda koʻplab muammolar ijobiy hal etilmoqda. Davlat organlari rahbarlarining aholi bilan yuzma-yuz uchrashib, muloqot qilishi ularning huquqiy madaniyatini yuksaltirish, hayotdan rozi boʻlib yashashida muhim omil boʻlmoqda.

Ozoda Xudoyberganova.