ҚУТУРИШ КАСАЛЛИГИ ПРОФИЛАКТИКАСИГА ОИД КЎРГАЗМА БЎЛИБ ЎТДИ

Мамлакатимизда чорвачиликни бугунги кун талаби ва халқаро тажрибалар, илм-фан ютуқлари асосида ривожлантириш, аҳолининг сифатли гўшт ва сут маҳсулотларига бўлган эҳтиёжини тўлароқ таъминлаш борасида кўпгина саъй-ҳаракатлар олиб борилаяпти. Чорвачилик маҳсулотлари етиштиришни кўпайтириш йўналишидаги ишларни илмий асосда ташкил этиш, наслчилик ишларини тўғри йўлга қўйиш ва пировардида қорамоллар маҳсулдорлиги ошишига эришиш асосий мақсадлардандир. Бу борада  туманимизга четдан наслдор қорамоллар келтирилиб, озуқа тайёрлаш қайта ишлаш ва озиқлантириш технологиясига амал қилинмоқда. Ўз навбатида касалликларнинг олдини олишга жиддий эътибор берилиб, тегишли чора-тадбирлар кўрилмоқда.

Туман Ветеринария ва чорвачиликни ривожлантириш бўлими томонидан Ўрта қалъа овул фуқаролар йиғини биноси олдида уй ҳайвонларида учрайдиган ўткир юқумли касаллик – қутуриш касаллиги профилактикасига бағишланган  кўргазма бўлиб ўтди. Тадбирда фуқаролар йиғини масъул ходимлари ҳамда овул аҳолиси иштирок этдилар.

Кўргазмада дастлаб туман Ветеринария ва чорвачиликни ривожлантириш бўлимининг ҳайвонлар соғлиғини сақлаш бўлинмаси мутахассиси Турсунбой Абдуллаев, туман Санитария эпидемиологик осойишталик маркази шифокори Аҳмад Явбосаровлар аҳолига чорва молларини, шунингдек, ит, мушук каби уй ҳайвонларини юқумли касалликлардан, хусусан қутуриш касаллигидан қандай ҳимоя қилиш мумкинлиги, бунда касалликка қарши эмлатиш жуда муҳим тадбир эканлиги хусусида маърузалар қилдилар.

Маърузаларда таъкидланганидек, қутуриш ўта юқумли ва охири ўлим билан тугайдиган касаллик бўлиб, у ҳайвондан ҳайвонга, одамга сўлак орқали юқади. Шу боисдан ҳам касалликнинг олдини олишга масъул бўлган Ички ишлар, Ветеринария ва Чорвачиликни ривожлантириш бўлимлари, туман Санитария-эпидемиологик осойишталик маркази, Ободонлаштириш бошқармаси ҳамкорлигида шу йилнинг  3 февралидан 3 мартигача бўлган даврни “Қутуриш касаллигига қарши курашиш ойлиги” деб эълон қилинди ва мазкур касалликка қарши кўпгина профилактик тадбирлар амалга оширилмоқда. Ўтган йилда 9000 бош, жорий йил январь ойида эса 1170 та ит қутуриш касаллигига қарши эмланди ва эмлаш давом эттирилмоқда.

Мутахассислар аҳолига хонадонларида уй ҳайвонларини, чорва молларини сақлаш қоидаларига амал қилиш, қутуриш касаллигидан ҳимоя қилиниш йўл-йўриқлари ҳусусида ҳам тавсиялар бердилар.

Тадбирда ҳудуд ветеринария ходимларига уй ҳайвонларини қутуриш касаллигига қарши эмлаш учун вакциналар тарқатилди.
Кўргазмада аҳолини қизиқтирган саволларга батафсил жавоблар берилди.

Уй ҳайвонларини, чорва молларини қутуриш касаллигидан сақлаш мавзусида ўтказилган мазкур кўргазма орқали аҳолининг бу касалликдан хабардорлиги, ҳимояланиш борасидаги билимлари оширилди.

Ойгул Ражабова.