Бобур номли овулда “Ёш келин-куёвлар инновацион мактаби”нинг кўчма ўқув машғулоти ўтказилди

Ўзи илдиз қўйган заминдан узилиб, тамоман бошқа муҳит ва иқлим шароитига мослашиш учун ниҳолга алоҳида эътибор ва парвариш талаб этилади. Янги бунёд бўлган оила ҳам мисоли янгидан ўтқазилган ниҳолга ўхшайди. Таъбир жоиз бўлса, ёш оилага ниҳол каби катта эътибор ва рағбат зарур. Икки ёшнинг тил топишиб, аҳил-иноқликда ўз оила қўрғонларини мустаҳкамлашлари учун энг аввало уларга атрофидагиларнинг меҳр-муҳаббати, оила тутумлари, анъана ва қадриятлари юзасидан маслаҳат ва ўгитлари жуда зарур.

“Оила” илмий-амалий тадқиқот марказининг туман бўлими қошида ташкил этилган “Ёш келин-куёвлар инновацион мактаби”да янги оила қураётган ёшларни оила ҳаётига тайёрлаш мақсадида уларни қийнаб келаётган муаммолар юзасидан мутахассисларни жалб қилган ҳолда режавий машғулотлар олиб борилади. Бундан тўрт ой муқаддам, 2019 йилнинг октябрь ойида ўз фаолиятини бошлаган “Ёш келин-куёвлар инновацион мактаби” тингловчилари кун сайин ошиб бормоқда. Ўтган вақт давомида 4 та гуруҳда салкам 100 нафарга яқин ёшлар оила қадриятлари, одоб-ахлоқ меъёрлари юзасидан сабоқ олдилар.

Яқинда яна туманимизнинг Бобур номли овулидаги 86-сонли умумтаълим мактаби биносида “Ёш келин-куёвлар инновацион мактаби”ни кўчма ўқув-машғулотлари ўтказилди. Унда овулнинг 20 нафар  ёшлари иштирок этишди.

Кўчма ўқув-машғулотида Ҳожи Эшон бобо жомъе масжиди имом-хатиби Ражаббой махсум Ҳабибуллаев “Ислом динида оила аъзоларининг ўрни ва мавқеи, никоҳ, талоқ, кўп хотинлилик масаласи ҳамда  оилавий низоларнинг олдини олиш, фарзанд тарбиясида ота-онанинг бурчи” мавзусида маъруза қилди. Очиқ дарс шаклида ўтказилган ўқув-машғулоти давомида тингловчилар ўзларини қизиқтирган саволлар билан мурожаат қилдилар. Ўз навбатида Ражаббой махсум Ҳабибуллаев улуғ аждодларимиз томонидан муқаддас тутилган оила қадриятлари, эрнинг оила ва рафиқа олдидаги, рафиқанинг эри ва қайнота-қайнонага муносабат масаласидаги бурч ва маъсулиятлари, мажбуриятлари ҳақида кенг тушунчалар берди. Айниқса, ота-оналаримиз амал қилган оила анъаналари, миллий менталитетимизга мос урф-одатлар, маънавий қадриятлар, шунингдек, замонавий оилада шакллантирилиши лозим бўлган ахлоқий қадриятларга кенг тўхталди.

Ўқув-машғулотида “Оила” илмий-амалий тадқиқот маркази туман бўлими раҳбари Гулшод Юсупова “Оиладаги ижтимоий-маънавий муҳитни соғломлаштириш орқали оилавий муаммоларни бартараф этишда маҳалланинг ўрни ҳамда ёш оилалар билан ишлашишда “Оила” маркази зиммасидаги вазифалар” юзасидан қўшимча дарс ўтди. Гулшод Юсупова ўз дарси давомида ҳар бир тингловчининг фаоллигини таъминлашга алоҳида эътибор қаратди. Хусусан, ёш келин-куёвларнинг диний, ахлоқий ҳамда оила қадриятлари юзасидан билим ва кўникмалари ўқув-машғулотидан олган таассуротлари билан қизиқди.

Қизғин савол-жавоблар, мунозарали фикрлар асосидаги дарслар тез-тез ўтказилиб турилиши лозимлигини таъкидладилар. Тингловчилар ҳаётда ҳамиша асқотадиган оила  масалалари бўйича ҳақиқий исломий билимлар, маънавий-ахлоқий мавзудаги машғулотлар ёш оилалар учун ҳақиқий турмуш сабоқлари бўлиб хизмат қилишини билдирдилар.

Р.ЙЎЛДОШЕВА.