ТУМАН СЭО МАРКАЗИ ХОДИМЛАРИ ТОМОНИДАН ЮҚУМЛИ КАСАЛЛИКЛАРГА ҚАРШИ ПРОФИЛАКТИК ДЕЗИНФЕКЦИЯ ТАДБИРИ ЎТКАЗИЛДИ

Жаҳон Соғлиқни сақлаш ташкилотининг маълумотига кўра, Хитой Халқ Республикасида эпидемик тус олган янги коронавирус касаллигини юқтириб олганлар дунёнинг кўплаб нуқталарида қайд этилмоқда. Жорий йилнинг 14 февраль санасига қадар 63935 ҳолатда ушбу касалликни юқтириб олган фуқаролар рўйхатга олинган бўлиб, уларнинг 1381 нафари ушбу касалликдан вафот этган.

Мамлакатимизда коронавирус инфекцияси ва мавсумий юқумли касалликлар бўйича эпидемиологик вазиятнинг барқарорлигини таъминлаш мақсадида Ўзбекистон Республикаси Соғлиқни сақлаш Вазирлиги томонидан аниқ ва пухта режа асосида профилактик тадбирлар олиб борилмоқда. Ўзбекистон ҳаво йўллари, Ўзбекистон темир йўллари ва автомобиль йўллари орқали мамлакатимизга кириб келувчи хорижий ва Ўзбекистон фуқаролари қатъий назорат пунктларида текширувдан ўтказилиб, тиббий-эпидемиологик ва карантин таҳлиллари олинмоқда ҳамда 14 кун давомида махсус стационарларда тиббий назоратда  қолдирилмоқда.

Кўрилаётган чора-тадбирлар натижаларидан маълум бўлишича, Ўзбекистонда коронавирус инфекциясини юқтириб олган фуқаролар қайд этилмади. Республикамиз ҳудудида ҳозирги кунда ушбу хасталик билан касалланганлар кузатилмади, лекин хорижий давлатлар билан иқтисодий-сиёсий алоқаларнинг ривожланиши, туризм, спорт ва бошқа сабаблар билан хориж давлатларида бўлиши ёки чет эллик фуқароларнинг бизнинг давлатимизга келиши туфайли, касаллик чақирувчи вируснинг республикамиз ҳудудига кириб келиш хавфи мавжуд.

Халқимизда “ўзингни, ўз уйингни ўзинг асра!” деган ҳикматли иборани бежиз айтишмайди. Халқ саломатлигини, санитария-эпидемиологик осойишталигини муҳофаза қилиш мақсадида Қорақалпоғистон Республикаси Санитария-эпидемиологик осойишталик марказининг 2020 йил 15 февраль санасидаги 5-12-0462-сонли топшириқномасига асосан туманимизда бу борада тизимли ишлар олиб борилмоқда.

Туман Санитария-эпидемиологик осойишталик маркази ходимлари томонидан жорий йилнинг 15-16-17 февраль кунлари жамоат  жойларида, умумтаълим мактаблари, мактабгача таълим ташкилотлари, умум овқатланиш ҳамда маиший хизмат кўрсатиш шохобчаларида, умум савдо дўконлари, тўйхоналар ва жамоат транспорт воситаларида юқумли респиратор касалликларнинг олдини олишга қаратилган профилактик дизенфекция тадбирлари ўтказилди. Шу қаторда мазкур муассаса, корхона-ташкилотларда ишловчи ходимларга хизмат жойлари ва хонадонларида шахсий гигиена қоидаларига доимий амал қилиш тавсия этилиб, касалликдан сақланиш чора-тадбирлари ҳақида кенг тарзда маълумотлар ҳам берилди.

Бундан ташқари, овул ва маҳаллалар аҳолиси ўртасида тозаликка, шахсий гигиена қоидаларига амал қилиш, ободонлаштириш ишларини самарали  олиб бориш, хонадонларда боқиладиган уй ҳайвонлари билан мулоқотда бўлишда эҳтиёт чораларини кўриш, шунингдек, маиший хоналарга тез-тез хлорли ишлов бериш бўйича тушунтириш-тарғибот ишлари олиб борилди. Чунки ҳар қандай касалликни даволашдан кўра, олдини олиш афзалдир.

Р.ЙЎЛДОШЕВА.