TUMAN SEO MARKAZI XODIMLARI TOMONIDAN YuQUMLI KASALLIKLARGA QARShI PROFILAKTIK DEZINFEKTsIYa TADBIRI OʻTKAZILDI
Jahon Sogʻliqni saqlash tashkilotining maʼlumotiga koʻra, Xitoy Xalq Respublikasida epidemik tus olgan yangi koronavirus kasalligini yuqtirib olganlar dunyoning koʻplab nuqtalarida qayd etilmoqda. Joriy yilning 14-fevral sanasiga qadar 63935 holatda ushbu kasallikni yuqtirib olgan fuqarolar roʻyxatga olingan boʻlib, ularning 1381 nafari ushbu kasallikdan vafot etgan.
Mamlakatimizda koronavirus infektsiyasi va mavsumiy yuqumli kasalliklar boʻyicha epidemiologik vaziyatning barqarorligini taʼminlash maqsadida Oʻzbekiston Respublikasi Sogʻliqni saqlash Vazirligi tomonidan aniq va puxta reja asosida profilaktik tadbirlar olib borilmoqda. Oʻzbekiston havo yoʻllari, Oʻzbekiston temir yoʻllari va avtomobil yoʻllari orqali mamlakatimizga kirib keluvchi xorijiy va Oʻzbekiston fuqarolari qatʼiy nazorat punktlarida tekshiruvdan oʻtkazilib, tibbiy-epidemiologik va karantin tahlillari olinmoqda hamda 14 kun davomida maxsus statsionarlarda tibbiy nazoratda qoldirilmoqda.
Koʻrilayotgan chora-tadbirlar natijalaridan maʼlum boʻlishicha, Oʻzbekistonda koronavirus infektsiyasini yuqtirib olgan fuqarolar qayd etilmadi. Respublikamiz hududida hozirgi kunda ushbu xastalik bilan kasallanganlar kuzatilmadi, lekin xorijiy davlatlar bilan iqtisodiy-siyosiy aloqalarning rivojlanishi, turizm, sport va boshqa sabablar bilan xorij davlatlarida boʻlishi yoki chet ellik fuqarolarning bizning davlatimizga kelishi tufayli, kasallik chaqiruvchi virusning respublikamiz hududiga kirib kelish xavfi mavjud.
Xalqimizda “oʻzingni, oʻz uyingni oʻzing asra!” degan hikmatli iborani bejiz aytishmaydi. Xalq salomatligini, sanitariya-epidemiologik osoyishtaligini muhofaza qilish maqsadida Qoraqalpogʻiston Respublikasi Sanitariya-epidemiologik osoyishtalik markazining 2020-yil 15-fevral sanasidagi 5-12-0462-sonli topshiriqnomasiga asosan tumanimizda bu borada tizimli ishlar olib borilmoqda.
Tuman Sanitariya-epidemiologik osoyishtalik markazi xodimlari tomonidan joriy yilning 15-16-17-fevral kunlari jamoat joylarida, umumtaʼlim maktablari, maktabgacha taʼlim tashkilotlari, umum ovqatlanish hamda maishiy xizmat koʻrsatish shoxobchalarida, umum savdo doʻkonlari, toʻyxonalar va jamoat transport vositalarida yuqumli respirator kasalliklarning oldini olishga qaratilgan profilaktik dizenfektsiya tadbirlari oʻtkazildi. Shu qatorda mazkur muassasa, korxona-tashkilotlarda ishlovchi xodimlarga xizmat joylari va xonadonlarida shaxsiy gigiyena qoidalariga doimiy amal qilish tavsiya etilib, kasallikdan saqlanish chora-tadbirlari haqida keng tarzda maʼlumotlar ham berildi.
Bundan tashqari, ovul va mahallalar aholisi oʻrtasida tozalikka, shaxsiy gigiyena qoidalariga amal qilish, obodonlashtirish ishlarini samarali olib borish, xonadonlarda boqiladigan uy hayvonlari bilan muloqotda boʻlishda ehtiyot choralarini koʻrish, shuningdek, maishiy xonalarga tez-tez xlorli ishlov berish boʻyicha tushuntirish-targʻibot ishlari olib borildi. Chunki har qanday kasallikni davolashdan koʻra, oldini olish afzaldir.
R.YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
