Сайёр суд мажлислари ҳуқуқбузарликлар ва жиноятларнинг камайишига хизмат қилмоқда

Мамлакатимизда ҳуқуқий демократик давлат, фуқаролик жамияти барпо этиш жараёнида қонун ва адолат устуворлигини таъминлаш энг муҳим вазифалардан бирига айланган. Шу мақсадда судни адолат қўрғонига айлантиришга қаратилган саъй-ҳаракатлар изчил давом эттирилмоқда.

Судялар томонидан аҳоли билан очиқ мулоқотлар ташкил этилиб, маҳалла, корхона ва ташкилотларда сайёр суд мажлислари ўтказиш йўлга қўйилган. Бу эса суд тизимининг очиқлигини таъминлаш билан бирга, аҳолининг тизимга, адолатга, давлатга ишончини оширишга хизмат қилмоқда.

13 февраль куни, Жиноят ишлари бўйича туман суди томонидан Гулзор маҳалла фуқаролар йиғини маъмурияти биносида сайёр суд мажлисини ўтказилди.
Жиноят ишлари бўйича туман суди раиси Султонмурод Давлетмуродовнинг бошчилигида ўтказилган сайёр суд мажлисида Жиноят кодекси 169-моддаси 2-қисмининг «г» бандлари билан айбланган фуқаронинг жиноят иши кўриб чиқилди.

Шу ўринда таъкидлаш керакки, юртимиз бўйлаб судларнинг оммавий сайёр қабуллари одатий тус олди. Бунда Олий суд раисидан тортиб, унинг ўринбосарлари, ҳайъат раислари ва жойлардаги судяларгача — барча бирдек фаол ва мунтазам иштирок этмоқда. Aна шундай эзгу саъй-ҳаракатлар ҳуқуқбузарлик ва жиноятларнинг камайишига сабаб бўлмоқда.

Натижада одамларни қийнаётган муаммолар ечими ҳамжиҳатликда изланмоқда ва энг мақбул чоралар топилмоқда. Қолаверса, сайёр қабулларда тарғибот ва ташвиқотга алоҳида эътибор қаратилмоқда. Aҳоли билан юзма-юз учрашув ва очиқ мулоқотлар, айниқса, оммавий ахборот воситалари билан ҳамкорлик алоқалари тикланаётгани айни муддао бўлмоқда.

Сайёр суд мажлисида суд томонидан судланувчининг шахсини, унинг ёшлигини, содир этган жиноятининг ижтимоий хавфлилик даражасини ва жиноятнинг хусусиятини эътиборга олиб, уни жамиятдан ажратилмаган ҳолда ахлоқан қайта тарбиялаш йўли билан тузатиш мумкин деб ҳисобланиб, судланувчининг тайинланган жазони ўтамасдан туриб ҳам унинг хулқини назорат қилиш орқали тузатиш мумкин деган қатъий фикрга келинди. Унга юқорида баён этилган ҳолатларни инобатга олган ҳолда шартли жазо тайинлаш ва синов муддати даврида тегишли мажбуриятларни юклатиш лозим деб топилди.

Aйтиш жоизки, давлатимиз раҳбарининг ташаббуси билан юртимиздаги бир қатор жамоат ташкилотлари, хусусан, Ёшлар иттифоқи, Хотин-қизлар қўмитаси, "Нуроний" жамғармаси, ушбу ташкилотларнинг жойлардаги бўлим ва бўлинмалари, маҳаллий ўзини ўзи бошқариш органларига судланаётган шахсни жиноят йўлига қайта кирмаслиги учун кафилликка олиш, шу аснода оиласи бағрида қолдирилган фуқароларни қайта тарбиялаш ваколати берилди.

Бундай эзгу ислоҳотлар аксарият юртдошларимизнинг қалбида кечиримлилик ва раҳмдиллик туйғуларини янада мустаҳкамлаб, кишиларни инсонпарварлик ҳамда бағрикенгликка чорламоқда. Зеро, бу олийжаноб туйғулар ҳар қандай инсонни янги эзгу амалларга, ибратли саъй-ҳаракатларга ундайди.

Чарос Aрслонова, туман ҳокимлигининг Ахборот хизмати.