Sayyor sud majlislari huquqbuzarliklar va jinoyatlarning kamayishiga xizmat qilmoqda

Mamlakatimizda huquqiy demokratik davlat, fuqarolik jamiyati barpo etish jarayonida qonun va adolat ustuvorligini taʼminlash eng muhim vazifalardan biriga aylangan. Shu maqsadda sudni adolat qoʻrgʻoniga aylantirishga qaratilgan saʼy-harakatlar izchil davom ettirilmoqda.

Sudyalar tomonidan aholi bilan ochiq muloqotlar tashkil etilib, mahalla, korxona va tashkilotlarda sayyor sud majlislari oʻtkazish yoʻlga qoʻyilgan. Bu esa sud tizimining ochiqligini taʼminlash bilan birga, aholining tizimga, adolatga, davlatga ishonchini oshirishga xizmat qilmoqda.

13-fevral kuni, Jinoyat ishlari boʻyicha tuman sudi tomonidan Gulzor mahalla fuqarolar yigʻini maʼmuriyati binosida sayyor sud majlisini oʻtkazildi.
Jinoyat ishlari boʻyicha tuman sudi raisi Sultonmurod Davletmurodovning boshchiligida oʻtkazilgan sayyor sud majlisida Jinoyat kodeksi 169-moddasi 2-qismining «g» bandlari bilan ayblangan fuqaroning jinoyat ishi koʻrib chiqildi.

Shu oʻrinda taʼkidlash kerakki, yurtimiz boʻylab sudlarning ommaviy sayyor qabullari odatiy tus oldi. Bunda Oliy sud raisidan tortib, uning oʻrinbosarlari, hayʼat raislari va joylardagi sudyalargacha — barcha birdek faol va muntazam ishtirok etmoqda. Ana shunday ezgu saʼy-harakatlar huquqbuzarlik va jinoyatlarning kamayishiga sabab boʻlmoqda.

Natijada odamlarni qiynayotgan muammolar yechimi hamjihatlikda izlanmoqda va eng maqbul choralar topilmoqda. Qolaversa, sayyor qabullarda targʻibot va tashviqotga alohida eʼtibor qaratilmoqda. Aholi bilan yuzma-yuz uchrashuv va ochiq muloqotlar, ayniqsa, ommaviy axborot vositalari bilan hamkorlik aloqalari tiklanayotgani ayni muddao boʻlmoqda.

Sayyor sud majlisida sud tomonidan sudlanuvchining shaxsini, uning yoshligini, sodir etgan jinoyatining ijtimoiy xavflilik darajasini va jinoyatning xususiyatini eʼtiborga olib, uni jamiyatdan ajratilmagan holda axloqan qayta tarbiyalash yoʻli bilan tuzatish mumkin deb hisoblanib, sudlanuvchining tayinlangan jazoni oʻtamasdan turib ham uning xulqini nazorat qilish orqali tuzatish mumkin degan qatʼiy fikrga kelindi. Unga yuqorida bayon etilgan holatlarni inobatga olgan holda shartli jazo tayinlash va sinov muddati davrida tegishli majburiyatlarni yuklatish lozim deb topildi.

Aytish joizki, davlatimiz rahbarining tashabbusi bilan yurtimizdagi bir qator jamoat tashkilotlari, xususan, Yoshlar ittifoqi, Xotin-qizlar qoʻmitasi, "Nuroniy" jamgʻarmasi, ushbu tashkilotlarning joylardagi boʻlim va boʻlinmalari, mahalliy oʻzini oʻzi boshqarish organlariga sudlanayotgan shaxsni jinoyat yoʻliga qayta kirmasligi uchun kafillikka olish, shu asnoda oilasi bagʻrida qoldirilgan fuqarolarni qayta tarbiyalash vakolati berildi.

Bunday ezgu islohotlar aksariyat yurtdoshlarimizning qalbida kechirimlilik va rahmdillik tuygʻularini yanada mustahkamlab, kishilarni insonparvarlik hamda bagʻrikenglikka chorlamoqda. Zero, bu oliyjanob tuygʻular har qanday insonni yangi ezgu amallarga, ibratli saʼy-harakatlarga undaydi.

Charos Arslonova, tuman hokimligining Axborot xizmati.