“INDIGO” оилавий нодавлат мактабгача таълим ташкилоти тарбияланувчилари орасида индиго болалар улғаймоқда
“INDIGO” нодавлат мактабгача таълим ташкилоти ўз фаолиятини бошлаганига ҳали кўп вақт бўлгани йўқ. 2019 йилнинг 14 октябрь санасида, Манғит шаҳрининг Гулзор маҳалласида, тадбиркор Гулширин Исмоилова раҳбарлигида илк тарбияланувчиларни ўз бағрига олган мазкур нодавлат МТТда айни кунда 25 нафар кичкинтойлар тарбияланмоқда. Гулзор маҳалласи ҳудудидаги намунавий лойиҳа асосида бунёд этилган уй биносида жойлашган НМТТда барча шароитларга эга болалар ўйин майдончаси, машғулотлар хонаси, зарур анжомлар билан жиҳозланган болалар оромхоналари кўрган кўзни қувнатади. Айниқса, турли байрам саналари муносабати билан ҳар хил тадбирлар ўтказишга мўлжалланган кенг ва ёруғ зал, турфа хил ўйинчоқлар жамланмаларининг мавжудлиги болажонларнинг яйраб ўсишлари учун хизмат қилмоқда.
Яшил арча атрофидаги Янги йил байрами томошаларида болажонларимиз роса яйрашди, - дейди НМТТ раҳбари Гулширин Исмоилова. – Ҳатто билағон болажонларимиз бувиларидан, тарбиячиларидан эшитган эртаклар асосида боғча опалари билан ўзлари саҳна кўринишлари тайёрлашди. Тарбияланувчиларимиз орасида алоҳида қобилиятли болалар кўп.
Ҳақиқатан ҳам ўз номига монанд “INDIGO” НМТТда тарбияланаётган кичкинтойлар орасида адашмай сонларни ёддан қўшиб-айирадиган, шеърларни бир-икки такрорлашдаёқ ёдлаб оладиган қобилиятли болажонлар анчагина.
- Ажаб эмас, - дейди тарбиячи Умида Худойберганова, - улар ичидан келажакда олимлар, машҳурлар чиқишса. – Тарбиявий-таълимий машғулотларни жуда тез ўзлаштирадиган болакайларни кўриб қувониб кетаман.
НМТТда ўз ишининг фидойилари бўлган жамоа шаклланган. Ёрдамчи тарбиячи Дилноза Худойберганова, ошпаз Саломат Ўрозметова, ҳамшира Раъно Қозоқовалар ҳар бир болага алоҳида эътибор қаратишади. Уларнинг соғлом овқатланишлари, онгу шуурида эзгу, яхши ишларга рағбат ва мойиллик уйғотиши, ўз хоҳиш-иродаларини, қобилиятларини намоён этишлари учун ҳамиша масъулиятни ҳис этиб ишлаш НМТТ ходимларининг бурчига, фаолиятининг асосий мезонига айланган.
Ишонамизки, НМТТ тарбияланувчилари орасидан, албатта, амударёлик индиго болалар етишиб чиқадилар. Чунки яхши ният – эзгу ишларга қанотдир.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
