Шогирдлар ютуғи устозга фахр ва ифтихор бахш этади

Буюк  мутафаккир бобомиз  Алишер  Навоий “Ҳақ  йўлида  ким  сенга   бир  ҳарф  ўқитмиш  ранж  ила, айламак бўлмас адо онинг ҳақин юз ганж ила”, дея устознинг минг машақат билан  берган билимларини минг бойлик ва пуллар билан адо қилиб бўлмайди, дея таърифлаганлар. Ҳа, шогирди камоли учун жон куйдириб меҳнат қиладиган устозларни ҳар қанча таърифласак ҳам оз.

46-сонли  мактабнинг  инглиз  тили  фани  ўқитувчиси Нодира Йўлдошева  билан  мана  бир неча  йилдирки, шу  даргоҳда  бирга  ишлаб  келмоқдамиз. У Беруний  туманидан  Қиличбой қишлоғимизга  келин бўлиб тушди. Оилали, учта фарзанднинг меҳрибон онажони. Ўтган йиллар давомида у мактабимизда ингиз тили фанидан дарс бериш билан бирга ўқувчиларнинг севимли устозига айланишга улгурди.

Албатта, ёшликда кўпчилик ўзининг ўқитувчиларига ҳавас  қилади. Чунки  ўқитувчилар ўқувчилар учун дунёдаги барча яхши фазилатларни ўзида  мужассамлаштирган, фидойи  ва  камтарин  инсон, шу билан бирга мукаммаллик  тимсоли бўлиб туюлади.
- Мен ҳам ўқитувчиларимга ҳавас қилиб, шу касбни танладим, - дейди  Нодира  Йўлдошева.

Тарихдан  маълумки, буюк  аждодларимиз  ва  алломаларимиз  кўп  тилни  ўрганиш  орқали  дунёвий  билимлар  ривожига  муносиб  ҳисса   қўшган.  Тил  билган – эл  билади, дейди  доно халқимиз.  Шу боисдан ҳам чет  тилларни  ўрганиш  тизимини  янада такомиллаштириш бўйича бутун мамлакатимизда бўлгани каби бизнинг туманимиздаги мактабларда ҳам кўпгина чора-тадбирлар амалга оширилаяпти. Фан хоналари  қайтадан  жиҳозланиб, АКТ воситалари, кўргазмали қуроллар билан таъминланди. Дарслар  ҳам сўнгги  педагогик  технология, мултимедия  воситалари асосида  қизиқарли қилиб  ўтилмоқда. Фидойи инглиз тили фани ўқитувчиси Нодира  Йўлдошева эса бундай имкониятлардан фойдаланиб, муносиб шогирдлар етиштирмоқда. Мактабнинг 10-синф  ўқувчиси Чинора  Тожибоева  унинг умидли шогирдларидан бири.

У инглиз  тили дарсига жуда қизиқади. Уйга  берилган  вазифаларни  мукаммал  бажаришга интилади, фан тўгарагига мунтазам қатнашади. Тажрибали   муаллима Нодира эса ўқувчисининг чет тилини янада чуқур эгаллаши  учун  қўшимча  адабиётлар, тест  саволлари, бадиий  адабиётлар  олиб  бериб, у билан алоҳида  шуғулланади.  

Устоз ва шогирднинг  меҳнатлари ўз самарасини бериб келмоқда. Чинора инглиз тили фанидан ўтказилиб келинаётган “Билимлар беллашуви”, ”Фанлар   олимпиадаси”да юқори натижаларга эришиб келмоқда. Ўтган ўқув  йилида у  9-синфлар ўртасида ”Фанлар   олимпиадаси”нинг саралаш босқичида ғолиб бўлди. Туман  босқичида 86 балл билан  фахрли биринчи ўринни эгаллади ва Республика босқичида  иштирок  этди. Бу йилги ўқув йилида ҳам туман босқичида 82,9 балл билан иккинчи ўринни эгаллаб, Республика босқичида қатнашишга йўлланма олди. Албатта, бу натижалар ортида устознинг  заҳматли меҳнатлари бор.

Шогирд  ютуғини кўриш, улардан  завқ олиш – устозга фахр ва ифтихор бахш  этади. Нодира ва унинг шогирди Чинорахонга ютуқлари бардавом бўлишини тилаб  қоламиз.

Гулхумор  ШОМУРОДОВА,
46-сонли мактаб ўқитувчиси.