Shogirdlar yutugʻi ustozga faxr va iftixor baxsh etadi

Buyuk  mutafakkir bobomiz  Alisher  Navoiy “Haq  yoʻlida  kim  senga   bir  harf  oʻqitmish  ranj  ila, aylamak boʻlmas ado oning haqin yuz ganj ila”, deya ustozning ming mashaqat bilan  bergan bilimlarini ming boylik va pullar bilan ado qilib boʻlmaydi, deya taʼriflaganlar. Ha, shogirdi kamoli uchun jon kuydirib mehnat qiladigan ustozlarni har qancha taʼriflasak ham oz.

46-sonli  maktabning  ingliz  tili  fani  oʻqituvchisi Nodira Yoʻldosheva  bilan  mana  bir necha  yildirki, shu  dargohda  birga  ishlab  kelmoqdamiz. U Beruniy  tumanidan  Qilichboy qishlogʻimizga  kelin boʻlib tushdi. Oilali, uchta farzandning mehribon onajoni. Oʻtgan yillar davomida u maktabimizda ingiz tili fanidan dars berish bilan birga oʻquvchilarning sevimli ustoziga aylanishga ulgurdi.

Albatta, yoshlikda koʻpchilik oʻzining oʻqituvchilariga havas  qiladi. Chunki  oʻqituvchilar oʻquvchilar uchun dunyodagi barcha yaxshi fazilatlarni oʻzida  mujassamlashtirgan, fidoyi  va  kamtarin  inson, shu bilan birga mukammallik  timsoli boʻlib tuyuladi.
- Men ham oʻqituvchilarimga havas qilib, shu kasbni tanladim, - deydi  Nodira  Yoʻldosheva.

Tarixdan  maʼlumki, buyuk  ajdodlarimiz  va  allomalarimiz  koʻp  tilni  oʻrganish  orqali  dunyoviy  bilimlar  rivojiga  munosib  hissa   qoʻshgan.  Til  bilgan – el  biladi, deydi  dono xalqimiz.  Shu boisdan ham chet  tillarni  oʻrganish  tizimini  yanada takomillashtirish boʻyicha butun mamlakatimizda boʻlgani kabi bizning tumanimizdagi maktablarda ham koʻpgina chora-tadbirlar amalga oshirilayapti. Fan xonalari  qaytadan  jihozlanib, AKT vositalari, koʻrgazmali qurollar bilan taʼminlandi. Darslar  ham soʻnggi  pedagogik  texnologiya, multimediya  vositalari asosida  qiziqarli qilib  oʻtilmoqda. Fidoyi ingliz tili fani oʻqituvchisi Nodira  Yoʻldosheva esa bunday imkoniyatlardan foydalanib, munosib shogirdlar yetishtirmoqda. Maktabning 10-sinf  oʻquvchisi Chinora  Tojiboyeva  uning umidli shogirdlaridan biri.

U ingliz  tili darsiga juda qiziqadi. Uyga  berilgan  vazifalarni  mukammal  bajarishga intiladi, fan toʻgaragiga muntazam qatnashadi. Tajribali   muallima Nodira esa oʻquvchisining chet tilini yanada chuqur egallashi  uchun  qoʻshimcha  adabiyotlar, test  savollari, badiiy  adabiyotlar  olib  berib, u bilan alohida  shugʻullanadi.  

Ustoz va shogirdning  mehnatlari oʻz samarasini berib kelmoqda. Chinora ingliz tili fanidan oʻtkazilib kelinayotgan “Bilimlar bellashuvi”, ”Fanlar   olimpiadasi”da yuqori natijalarga erishib kelmoqda. Oʻtgan oʻquv  yilida u  9-sinflar oʻrtasida ”Fanlar   olimpiadasi”ning saralash bosqichida gʻolib boʻldi. Tuman  bosqichida 86 ball bilan  faxrli birinchi oʻrinni egalladi va Respublika bosqichida  ishtirok  etdi. Bu yilgi oʻquv yilida ham tuman bosqichida 82,9 ball bilan ikkinchi oʻrinni egallab, Respublika bosqichida qatnashishga yoʻllanma oldi. Albatta, bu natijalar ortida ustozning  zahmatli mehnatlari bor.

Shogird  yutugʻini koʻrish, ulardan  zavq olish – ustozga faxr va iftixor baxsh  etadi. Nodira va uning shogirdi Chinoraxonga yutuqlari bardavom boʻlishini tilab  qolamiz.

Gulxumor  ShOMURODOVA,
46-sonli maktab oʻqituvchisi.