Фан ойлиги давомида ўқувчиларнинг тарих ва ҳуқуқ фанлари бўйича билимлари мустаҳкамланди

Юртимиз тарихи, миллий қадриятларимиз, шунингдек, ҳуқуқий билимларни янада ошириш мақсадида таълим муассасаларида ҳар йили тарих ва ҳуқуқ фани ойлиги ўтказилади. Фан ойлиги давомида ўқувчиларнинг тарих ва ҳуқуқ фанлари бўйича билимлари мустаҳкамланади. Шунингдек, уларда ватанпарварлик туйғулари янада юксалтирилиб, ҳуқуқий маданият шакллантирилади.

Январь ойи тарих ва ҳуқуқ фанлари ойлиги этиб белгиланганлиги боис 64-сонли умумтаълим мактабда ҳам ойлик доирасидаги тадбирлар юқори савияда ўтказилди.  
Мактабда тарих ва ҳуқуқ фани ойлиги доирасида 12 та намунавий дарс ташкил этилди. Фан ойлиги доирасида ҳар бир синфда алоҳида кроссвордлар танлови бўлиб ўтди. Мактабнинг чақириққача ёшларни тайёрлаш бўйича раҳбари Шуҳрат Отажонов томонидан ёшлар қалбида Ватанга дахлдорлик ҳисларини ошириш, ватанпарварлик туйғуларини юксалтириш мақсадида 9-11-синфлар ўртасида спорт мусобақаси ҳам ўтказилди.

Ундан ташқари, мактабнинг 10-синф ўқувчилари янги барпо этилган туман Фуқаролик ишлар бўйича туман суди ва Давлат хизматлари маркази биноларига экскурияга олиб борилди. Таътил даврида 5-синф ўқувчилари Нукус шаҳридаги Савицкий номидаги Қорақалпоқ давлат амалий-санъат музейига  экскурсияга олиб борилди.

Фан ойлиги муносабати билан мактабда тарихий ва ҳуқуқий асарлар кўргазмаси ҳам ташкил этилди. Ўзбекистон Республикаси биринчи Президенти Ислом Каримов туғилган кунининг 82 йиллиги муносабати билан мактаб кутубхоначиси Гулчеҳра Алламова томонидан “Буюк юртбошимиз ҳаёти барчамизга ибрат” мавзусида ўтказилган адабий-бадиий кечада эса ўқувчиларга Биринчи Президент томонидан амалга оширилган ислоҳотлар, эзгу ишлар ҳақида кенг маълумот берилди.
Ойлик давомида тарих фани ўқитувчиси Гўзал Қодирова томонидан 6-“А”, 6-“Б” синф ўқувчилари иштирокида “Сиз тарихни биласизми?” деб номланган беллашув ташкиллаштирилди. Беллашувда иккала синф ўқувчилари ҳам тарих фани бўйича ўз билимдонликларини намойиш этдилар. Шартларни аъло даражада уддалаган 6“А”-синф жамоаси беллашувда ғолиб деб топилди. Мактабнинг тарих фани ўқитувчиси Ойбек Қурбонов томонидан ҳам 5-синф ўқувчилари ўртасида беллашув ташкил этилиб, ўқувчиларнинг билимлари синовдан ўтказилди.

Ғолиб деб топилган жамоалар мактаб маъмурияти томонидан тайёрланган фахрий ёрлиқ ва совғалар билан тақдирланди.
Мактабда январь ойидан, яъни  учинчи чоракдан бошлаб, 10-11 синф ўқувчилари учун ихтисослаштирилган она тили ва тарих фанлари чуқур ўргатиладиган вариатив синфлари тажриба-синов тариқасида ташкил этилганлиги ҳам муҳим янгиликлардан бири бўлди.

Ойбек ҚУРБОНОВ, 64-сонли мактаб ўқитувчиси.