Fan oyligi davomida oʻquvchilarning tarix va huquq fanlari boʻyicha bilimlari mustahkamlandi

Yurtimiz tarixi, milliy qadriyatlarimiz, shuningdek, huquqiy bilimlarni yanada oshirish maqsadida taʼlim muassasalarida har yili tarix va huquq fani oyligi oʻtkaziladi. Fan oyligi davomida oʻquvchilarning tarix va huquq fanlari boʻyicha bilimlari mustahkamlanadi. Shuningdek, ularda vatanparvarlik tuygʻulari yanada yuksaltirilib, huquqiy madaniyat shakllantiriladi.

Yanvar oyi tarix va huquq fanlari oyligi etib belgilanganligi bois 64-sonli umumtaʼlim maktabda ham oylik doirasidagi tadbirlar yuqori saviyada oʻtkazildi.  
Maktabda tarix va huquq fani oyligi doirasida 12 ta namunaviy dars tashkil etildi. Fan oyligi doirasida har bir sinfda alohida krossvordlar tanlovi boʻlib oʻtdi. Maktabning chaqiriqqacha yoshlarni tayyorlash boʻyicha rahbari Shuhrat Otajonov tomonidan yoshlar qalbida Vatanga daxldorlik hislarini oshirish, vatanparvarlik tuygʻularini yuksaltirish maqsadida 9-11-sinflar oʻrtasida sport musobaqasi ham oʻtkazildi.

Undan tashqari, maktabning 10-sinf oʻquvchilari yangi barpo etilgan tuman Fuqarolik ishlar boʻyicha tuman sudi va Davlat xizmatlari markazi binolariga ekskuriyaga olib borildi. Taʼtil davrida 5-sinf oʻquvchilari Nukus shahridagi Savitskiy nomidagi Qoraqalpoq davlat amaliy-sanʼat muzeyiga  ekskursiyaga olib borildi.

Fan oyligi munosabati bilan maktabda tarixiy va huquqiy asarlar koʻrgazmasi ham tashkil etildi. Oʻzbekiston Respublikasi birinchi Prezidenti Islom Karimov tugʻilgan kunining 82 yilligi munosabati bilan maktab kutubxonachisi Gulchehra Allamova tomonidan “Buyuk yurtboshimiz hayoti barchamizga ibrat” mavzusida oʻtkazilgan adabiy-badiiy kechada esa oʻquvchilarga Birinchi Prezident tomonidan amalga oshirilgan islohotlar, ezgu ishlar haqida keng maʼlumot berildi.
Oylik davomida tarix fani oʻqituvchisi Goʻzal Qodirova tomonidan 6-“A”, 6-“B” sinf oʻquvchilari ishtirokida “Siz tarixni bilasizmi?” deb nomlangan bellashuv tashkillashtirildi. Bellashuvda ikkala sinf oʻquvchilari ham tarix fani boʻyicha oʻz bilimdonliklarini namoyish etdilar. Shartlarni aʼlo darajada uddalagan 6“A”-sinf jamoasi bellashuvda gʻolib deb topildi. Maktabning tarix fani oʻqituvchisi Oybek Qurbonov tomonidan ham 5-sinf oʻquvchilari oʻrtasida bellashuv tashkil etilib, oʻquvchilarning bilimlari sinovdan oʻtkazildi.

Gʻolib deb topilgan jamoalar maktab maʼmuriyati tomonidan tayyorlangan faxriy yorliq va sovgʻalar bilan taqdirlandi.
Maktabda yanvar oyidan, yaʼni  uchinchi chorakdan boshlab, 10-11-sinf oʻquvchilari uchun ixtisoslashtirilgan ona tili va tarix fanlari chuqur oʻrgatiladigan variativ sinflari tajriba-sinov tariqasida tashkil etilganligi ham muhim yangiliklardan biri boʻldi.

Oybek QURBONOV, 64-sonli maktab oʻqituvchisi.