ТАРИХ ВА ҲУҚУҚ ФАН ОЙЛИГИДА НАЗАРИЙ ВА АМАЛИЙ БИЛИМЛАР УЙҒУНЛАШДИ

Тарихимизни ўрганиш – ўзлигимизни англашдир. Зеро, ўз тарихий илдизларини теран билмаган инсон бугунги тинчлик, осойишталикнинг қадрига етмайди. Шу боис, мамлакатимиз таълим тизимида халқимизнинг бой тарихини нафақат ўрганиш, балки мустабид тузум даврида сохталаштирилган мозий саҳифаларини аслига қайтариш, кўп миллатли халқимизнинг тарихи қандай бўлса, шундайлигича, бор мазмун-моҳияти билан ўсиб келаётган ёш авлодни  таништириш, улар қалбида Ватанимиз тарихига чуқур ҳурмат уйғотиш мақсадида инновацион педтехнологиялардан кенг фойдаланилмоқда. Бу каби саъй-ҳаракатлар, айниқса, умумтаълим мактабларида ўтказилаётган фан ойликларида ўз ифодасини топмоқда.

Январь ойи умумтаълим фанлари орасида тарих ва ҳуқуқ фан ойлиги сифатида ўқувчи-ёшлар учун таассуротларга бой ўтди. Туманимиздаги барча умумтаълим мактабларида мазкур тадбирлар ўқувчиларнинг назарий ва амалий билимлари уйғунлигида уюшқоқлик билан ўтказилгани таҳсинга лойиқ.

“Мозийга қайтиб иш кўрмоқ - хайрлидир” шиори остида 22-сонли умумтаълим мактабида бўлиб ўтган тарих ва ҳуқуқ фан ойлиги доирасида ўтказилган маънавий-маърифий ва адабий-мусиқий тадбирда ўқувчи-ёшлар орасида тарих ва ҳуқуқ фани билимдонлари янада кўплигини, шу баробарида мактабда ушбу фанларни ўқитиш бўйича ўзига хос услубга эса ўқитувчилар, таълим-тарбия соҳаси фидойилари меҳнат қилишаётганини намоён этди.

Тадбирни очиб берган мактаб директорининг маънавий-маърифий ишлар бўйича ўринбосари Икром Жангабоев мамлакатимиз тарихининг ҳар бир саҳифаси халқимизнинг буюк қаҳрамонлик эпоси эканлигини, аждодларимиз босиб ўтган қаҳрамонона шонли йўл ҳар биримиз учун ибрат, шу билан бирга ифтихор эканлигини таъкидлади.

Мактабнинг 6-,7-,8-10-,11-синфлар ўқувчилари томонидан ташкил этилган тадбирда тарихимизнинг турли босқичлари ҳақида ҳикоя қилувчи саҳна кўринишлари, театрлаштирилган рақслар, шеърий композициялар намойиш этилди.

Кичкинтой  болажонлар – 1-синф ўқувчилари ижросидаги шўх рақслар билан  бошланган тадбирнинг маънавий-маърифий қисмида 6-синф ўқувчилари 5 та муҳим ташаббус ҳақидаги адабий композиция орқали ўз орзуларини кўрсатиб беришди. Улар 5 та ташаббус ҳақида ҳам назарий, ҳам амалий тасаввурга эга эканликларини ўз чиқишлари орқали ифодалаб бердилар. Мазмунида 5 та ташаббус жо бўлган маънавий-маърифий мавзудаги ашулалари орқали барча тенгдошларини олға интилиб яшашга, илм ўрганиб, спорт билан шуғулланишга, замонавий ахборот технологияларини пухта эгаллашга, касб-ҳунарли бўлишга даъват этишди.

7-синф ўқувчилари талқинидаги буюк аждодларимиз образларининг саҳнавий намойиши ҳамда Ўзбекистон халқ артисти Озодбек Назарбековнинг “Мендирман” ашуласи асосида саҳналаштирилган жанговар чиқишлари, Иккинчи жаҳон уруши давридаги Шомаҳмудовлар оиласи ҳаётини акс эттирувчи саҳна кўриниши катта маҳорат билан кўрсатиб  берилди. Бунда ўқувчиларнинг халқимиз тарихига чексиз ҳурмат-эътибори акс этиб, тадбир иштирокчиларида фахр-ифтихор туйғуларини уйғотди.

Фан ойлиги тадбирининг адабий-мусиқий қисмида Ҳусайн Бойқаро билан Алишер Навоий дўстлигига муҳим эътибор қаратилгани барчага манзур бўлди. Унда икки буюк сиймо ўз даврида нафақат маънавиятга, балки фиқҳ – ҳуқуқий маданиятга ҳам ўта эътиборли бўлганлари уларнинг суҳбатлари орқали ифодалаб берилди.
Тадбирда 6-7-синф ўқувчилари томонидан тайёрланган саҳна кўринишлари, Эркин Воҳидовнинг “Ўзбегим” қасидасини ифодали ўқиш, “Мардлик афсонаси” ҳақидаги шеърлар, “Аждодлар руҳи” қўшиғи янграганида барча ўқувчилар шеър ва  қўшиққа жўр бўлишиб, қалбларда ватанпарварлик туйғулари янада жўш урди.

Юксак маҳорат, билимдонлик акс этиб турган тарих ва ҳуқуқ фан ойлиги доирасидаги мазкур тадбирни ташкил этишда фидойилик қилган тарих фани ўқитувчиси Салтанат Тўлибоеванинг меҳнати эътиборга молик. Шунингдек, тарих фани ўқитувчилари Бахтиёр Ўтабоев, Азиз Бобожонов, ҳуқуқ фани ўқитувчиси Юнус Бекбергановларнинг ҳамжиҳатликдаги, ўзаро тажриба алмашув асосида олиб бораётган фаолиятлари туфайли мактабда тарих ва ҳуқуқ фанларини ўқитишда ўзига хос бой  тажрибанинг шакллангани боис, ўқувчи-ёшлар ушбу фанларни муваффақиятли ўзлаштиришга эришмоқдалар. Юқоридаги фан ойлиги доирасида ўтказилган тадбир фикримизнинг яққол исботидир.

Робия ЙЎЛДОШЕВА.