TARIX VA HUQUQ FAN OYLIGIDA NAZARIY VA AMALIY BILIMLAR UYGʻUNLAShDI

Tariximizni oʻrganish – oʻzligimizni anglashdir. Zero, oʻz tarixiy ildizlarini teran bilmagan inson bugungi tinchlik, osoyishtalikning qadriga yetmaydi. Shu bois, mamlakatimiz taʼlim tizimida xalqimizning boy tarixini nafaqat oʻrganish, balki mustabid tuzum davrida soxtalashtirilgan moziy sahifalarini asliga qaytarish, koʻp millatli xalqimizning tarixi qanday boʻlsa, shundayligicha, bor mazmun-mohiyati bilan oʻsib kelayotgan yosh avlodni  tanishtirish, ular qalbida Vatanimiz tarixiga chuqur hurmat uygʻotish maqsadida innovatsion pedtexnologiyalardan keng foydalanilmoqda. Bu kabi saʼy-harakatlar, ayniqsa, umumtaʼlim maktablarida oʻtkazilayotgan fan oyliklarida oʻz ifodasini topmoqda.

Yanvar oyi umumtaʼlim fanlari orasida tarix va huquq fan oyligi sifatida oʻquvchi-yoshlar uchun taassurotlarga boy oʻtdi. Tumanimizdagi barcha umumtaʼlim maktablarida mazkur tadbirlar oʻquvchilarning nazariy va amaliy bilimlari uygʻunligida uyushqoqlik bilan oʻtkazilgani tahsinga loyiq.

“Moziyga qaytib ish koʻrmoq - xayrlidir” shiori ostida 22-sonli umumtaʼlim maktabida boʻlib oʻtgan tarix va huquq fan oyligi doirasida oʻtkazilgan maʼnaviy-maʼrifiy va adabiy-musiqiy tadbirda oʻquvchi-yoshlar orasida tarix va huquq fani bilimdonlari yanada koʻpligini, shu barobarida maktabda ushbu fanlarni oʻqitish boʻyicha oʻziga xos uslubga esa oʻqituvchilar, taʼlim-tarbiya sohasi fidoyilari mehnat qilishayotganini namoyon etdi.

Tadbirni ochib bergan maktab direktorining maʼnaviy-maʼrifiy ishlar boʻyicha oʻrinbosari Ikrom Jangaboyev mamlakatimiz tarixining har bir sahifasi xalqimizning buyuk qahramonlik eposi ekanligini, ajdodlarimiz bosib oʻtgan qahramonona shonli yoʻl har birimiz uchun ibrat, shu bilan birga iftixor ekanligini taʼkidladi.

Maktabning 6-,7-,8-10-,11-sinflar oʻquvchilari tomonidan tashkil etilgan tadbirda tariximizning turli bosqichlari haqida hikoya qiluvchi sahna koʻrinishlari, teatrlashtirilgan raqslar, sheʼriy kompozitsiyalar namoyish etildi.

Kichkintoy  bolajonlar – 1-sinf oʻquvchilari ijrosidagi shoʻx raqslar bilan  boshlangan tadbirning maʼnaviy-maʼrifiy qismida 6-sinf oʻquvchilari 5 ta muhim tashabbus haqidagi adabiy kompozitsiya orqali oʻz orzularini koʻrsatib berishdi. Ular 5 ta tashabbus haqida ham nazariy, ham amaliy tasavvurga ega ekanliklarini oʻz chiqishlari orqali ifodalab berdilar. Mazmunida 5 ta tashabbus jo boʻlgan maʼnaviy-maʼrifiy mavzudagi ashulalari orqali barcha tengdoshlarini olgʻa intilib yashashga, ilm oʻrganib, sport bilan shugʻullanishga, zamonaviy axborot texnologiyalarini puxta egallashga, kasb-hunarli boʻlishga daʼvat etishdi.

7-sinf oʻquvchilari talqinidagi buyuk ajdodlarimiz obrazlarining sahnaviy namoyishi hamda Oʻzbekiston xalq artisti Ozodbek Nazarbekovning “Mendirman” ashulasi asosida sahnalashtirilgan jangovar chiqishlari, Ikkinchi jahon urushi davridagi Shomahmudovlar oilasi hayotini aks ettiruvchi sahna koʻrinishi katta mahorat bilan koʻrsatib  berildi. Bunda oʻquvchilarning xalqimiz tarixiga cheksiz hurmat-eʼtibori aks etib, tadbir ishtirokchilarida faxr-iftixor tuygʻularini uygʻotdi.

Fan oyligi tadbirining adabiy-musiqiy qismida Husayn Boyqaro bilan Alisher Navoiy doʻstligiga muhim eʼtibor qaratilgani barchaga manzur boʻldi. Unda ikki buyuk siymo oʻz davrida nafaqat maʼnaviyatga, balki fiqh – huquqiy madaniyatga ham oʻta eʼtiborli boʻlganlari ularning suhbatlari orqali ifodalab berildi.
Tadbirda 6-7-sinf oʻquvchilari tomonidan tayyorlangan sahna koʻrinishlari, Erkin Vohidovning “Oʻzbegim” qasidasini ifodali oʻqish, “Mardlik afsonasi” haqidagi sheʼrlar, “Ajdodlar ruhi” qoʻshigʻi yangraganida barcha oʻquvchilar sheʼr va  qoʻshiqqa joʻr boʻlishib, qalblarda vatanparvarlik tuygʻulari yanada joʻsh urdi.

Yuksak mahorat, bilimdonlik aks etib turgan tarix va huquq fan oyligi doirasidagi mazkur tadbirni tashkil etishda fidoyilik qilgan tarix fani oʻqituvchisi Saltanat Toʻliboyevaning mehnati eʼtiborga molik. Shuningdek, tarix fani oʻqituvchilari Baxtiyor Oʻtaboyev, Aziz Bobojonov, huquq fani oʻqituvchisi Yunus Bekberganovlarning hamjihatlikdagi, oʻzaro tajriba almashuv asosida olib borayotgan faoliyatlari tufayli maktabda tarix va huquq fanlarini oʻqitishda oʻziga xos boy  tajribaning shakllangani bois, oʻquvchi-yoshlar ushbu fanlarni muvaffaqiyatli oʻzlashtirishga erishmoqdalar. Yuqoridagi fan oyligi doirasida oʻtkazilgan tadbir fikrimizning yaqqol isbotidir.

Robiya YOʻLDOShEVA.