Пробация ҳисобида турган маҳкумларни озод этишга доир сайёр суд мажлиси бўлиб ўтди

Бугунги кунда мамлакатимизда жиноятчилик ва ҳуқуқбузарликларнинг олдини олиш мақсадида аҳоли ўртасида кенг кўламли профилактик тадбирлар амалга оширилмоқда. Шу мақсадда ҳудудларда сайёр суд мажлислари ўтказилмоқда. Таъкидлаш жоизки, бундай чора-тадбирлар жуда катта самара бермоқда.

Ўтган йил давомида тумандаги ҳуқуқни муҳофаза қилувчи органлар томонидан амалга оширилган профилактик тадбирлар натижасида жиноят ва ҳуқуқбузарликларнинг сони сезиларли даражада камайди. Хусусан, туманимизда барча йўналишларда содир этилган жиноятлар ўтган йилнинг шу даврига нисбатан 19,3 фоизга, жиноят қидирув йўналишида содир этилган жиноятлар эса 40 фоизга камайишига эришилди.

29 январь куни ИИБ мажлислар залида очиқ сайёр суд мажлиси бўлиб ўтди.
Сайёр суд мажлисида Жиноят ишлари бўйича туман суди раиси Султонмурод Давлетмуродов, туман прокурори Жавлон Муфтуллаев, туман ИИБ бошлиғи подполковник Улуғбек Худойберганов, Ўзбекистон Ёшлар Иттифоқи туман Кенгаши бош мутахассиси Сардор Исмоилов, туман Пробация гуруҳи ходимлари ҳамда ёшлар иштирок этдилар.

Сайёр суд мажлисида туман ИИБ бошлиғи Улуғбек Худойберганов ҳамда Ўзбекистон Ёшлар Иттифоқи туман Кенгаши бош мутахассиси Сардор Исмоиловлар сўзга чиқиб, жиноятчилик ва ҳуқуқбузарликларнинг оқибатлари, уларнинг олдини олиш ҳаётий зарурат эканлигини сўзлаб ўтди.

Шунингдек, сайёр суд мажлислари бевосита кенг жамоатчилик кўз ўнгида ўтказилаётгани аҳоли учун ибрат мактаби вазифасини бажараётганлиги ҳақида сўз юритишди. Бундай аҳамиятли тадбирлар юртимизда жиноят ва жиноятчиликни камайтириш омилига, мамлакатимиз одил судлов тизимидаги ижобий воқеликларнинг муҳим бир жиҳатига айланаётганини таъкидлашди.

Мажлис давомида масъуллар давлатимиз Раҳбарининг ташаббуси билан юртимиздаги бир қатор жамоат ташкилотлари, Ёшлар Иттифоқи, Хотин-қизлар қўмитаси, "Нуроний" жамғармаси, ушбу ташкилотларнинг жойлардаги бўлим ва бўлинмалари, маҳаллий ўзини ўзи бошқариш органларига судланаётган шахсни жиноят йўлига қайта кирмаслиги учун кафилликка олиш, шу аснода оиласи бағрида қолдирилган фуқароларни қайта тарбиялаш ваколати берилганлиги, бу бора туманда амалга оширилаётган ишлар хусусида кенг тўхталиб, батафсил маълумот беришди.

Суд мажлисида туман Ички ишлар бўлими ҳисобида турган 8 нафар маҳкумнинг ўрнатилган тартиб-қоида талабларини бажарганлиги ва меҳнатга ҳалол муносабатда бўлганлиги алоҳида эътироф этилди. Тегишли тартибга кўра бу эътиборга олинганлиги сабабли, маҳкумлар Ўзбекистон Республикаси Жиноят Кодексининг 73-моддасига асосан шартли равишда белгиланган жазо муддатидан илгари озод қилинди.

Давлатимиздаги амал қилинаётган кечиримлилик, бағрикенглик тамойилларидан мамнун бўлган бу фуқаролар ҳаётда фақат тўғри йўлдан юришга аҳд қилганини айтиб, ўз миннатдорчиликларини билдирдилар.

Чарос Арслонова, туман ҳокимлигининг Ахборот хизмати.