РЕСПУБЛИКА ИШЧИ ГУРУҲИ АЪЗОЛАРИ ДАРЁ БЎЙИ МАҲАЛЛАСИ ЁШЛАРИ БИЛАН УЧРАШДИ

Ёшларга эътибор – келажакка эътибор! Бу шунчаки баландпарвоз гап эмас. Бугунги тезкор, янгиланишлар шиддат билан кечаётган даврда ёшларнинг интеллектуал ва ижодий салоҳиятини  юксалтириш, мамлакатимизда амалга оширилаётган кенг қамровли ислоҳотларга дахлдорлигини, масъулиятини ошириш жуда муҳим. Боиси, замонавий билим ва кўникмаларга эга, маънан етук, жисмонан кучли, матонатли, садоқатли  ёшларгина мамлакат  келажаги учун жавобгарликни ўз зиммаларига ола оладилар, юрт корига  ярайдилар.  Шу сабабдан жамиятимизнинг асосий ҳаракатлантирувчи кучи ҳисобланмиш  ёш авлод таълим-тарбиясини, уларнинг маънавий-маърифий, руҳий, ижтимоий, жисмоний салоҳиятини ошришга улкан аҳамият қаратилмоқда.

Бу борада амалга оширилаётган ишлар натижаси билан яқиндан танишиш ва муаммоли масалаларда амалий ёрдамлар бериш мақсадида  туманимизга ташриф буюрган Республика ишчи гуруҳи аъзолари барча ҳудудларда ёшлар билан учрашувлар ташкиллаштирдилар, мактабларда, меҳнат жамоаларида бўлдилар, тадбиркор ёшлар фаолияти билан танишиб, ижодкор ёшлар мушоираларини ўтказдилар

Ишчи гуруҳ аъзоси, “ЎзАвтойўл” қўмитаси бўлим бошлиғи Отаназар Жуманиёзов  Қипчоқ овул фуқаролар йиғини таркибидаги  Дарё бўйи маҳалласида истиқомат қилувчи Зарифбой Хўжамуродов хонадонида бўлиб, ушбу хонадоннинг ва қўни- қўшниларининг  фарзандлари билан суҳбатда бўлди.

Меҳмон суҳбат чоғида ёшларнинг қизиқишлари, ўқишлари, турмуш тарзи билан танишди. Хонадонга  йиғилган ўн нафардан зиёд болалар иштирокида бўлган дарсдан бўш вақтларида нималар билан шуғулланишлари, қайси шоир, ёзувчилар ижодини севиб ўқиши, хуллас, адабиёт, санъат, спорт  борасидаги суҳбат  жуда қизиқарли ўтди. Айниқса,  Отаназар Жуманиёзовга болаларнинг ҳозирги давр ва мумтоз  адабиётимиз намуналарини  ифодали, ёддан айтиши,  расмлар чизиши, мусиқа асбобларини чалиши ва қўшиқлар ижро этиши жуда манзур бўлди.

Хабардор қилинмасдан, тўсатдан кириб борган хонадонида  ёшгина йигитнинг испанча операни маҳорат билан  куйлагани  меҳмонни бироз ҳайратлантирди ҳам. У Нукусдаги санъат  коллежини битириб келиб, яқиндагина 21-сонли Болалар мусиқа ва санъат мактабида  опера хонандалиги гуруҳида мураббийлик фаолиятини бошлаган,  иқтидорли йигит Шерхон Ўтамуродов эди.  Учрашув  сўнгида 21-сонли Болалар мусиқа ва санъат мактаби  директори Нураддин Ёқубов ижросидаги шўх қўшиққа  мезбон-у меҳмонлар рақсга тушдилар.

        Дарё бўйи маҳалласи ёшлари билан ўтказилган учрашув Республика ишчи гуруҳи аъзоларида илиқ таассуротлар қолдирди. Бу мамлакатимизда ёшларнинг муносиб бўлиб улғайишларига қаратилаётган эътибор  мевасидир.

          Ойгул РАЖАБОВА.