Қиличбой овулида Ватан ҳимоячилари кунига бағишлаб катта тадбир ўтказилди

2019 йил 13 декабрда “ўзбекистон Республикаси Қуролли Кучлари ташкил этилганлигининг 28 йиллиги ҳамда Ватан ҳимоячилари кунини нишонлашга тайёргарлик кўриш ва ўтказиш чора тадбирлари тўғрисида” мамлакатимизнинг Президенти Ш.Мирзиёевнинг фармойиши эълон қилинган эди. Ушбу фармойишга кўра тасдиқланган тадбирлар дастурига мувофиқ мамлакатимизнинг барча ҳудудларида аҳоли орасида “Ватанпарварлик – миллий юксалиш кафолати” шиори остида маданий, маънавий-маърифий тадбирлар ўтказиш орқали халқимиз кўнглига Қуролли Кучларимизга бўлган фахр-ифтихор туйғуларини сингдириш назарда тутилган. Шунингдек, ҳар бир фуқарога Ватан ҳимоячилари куни байрамининг аҳамияти фуқаролик жамиятини шакллантириш ва ривожлантиришда, ёшларни ватанпарварлик руҳида тарбиялашда Ўзбекистон Қуролли Кучларининг ўрни ва аҳамиятини кенг тушунтириш белгиланган.

Бутун мамлакатимизда бўлгани каби айни кунларда туманимизда ҳам 2019 йил 15 декабрь – 2020 йил 15 январь оралиғида ўтказилаётган ватанпарварлик ойлиги доирасида юқорида таъкидланган фармойишга асосан умумий ўрта таълим, мактабгача таълим ташкилотларида, овул ва маҳаллаларда, корхона-ташкилотларда ҳарбий ватанпарварлик мавзусига бағишланган маданий, маънавий-маърифий тадбирлар бўлиб ўтмоқда.

Шу йилнинг 8 январида Қиличбой овулидаги Қиличбой маданият марказида ҳам “Армия – тинчлик қалқони” деб номланган тадбир бўлиб ўтди. Унда туман ҳокимлиги, ўзини ўзи бошқариш органлари фаолиятини мувофиқлаштириш бўйича туман Кенгаши ва туман Мудофаа бўлими масъуллари, Қиличбой овули ҳудудидаги мактаблар фаол ўқувчилари, ҳудудда жойлашган ҳарбий қисм ҳарбий хизматчилари, айни кунда ўзларининг муддатли ҳарбий хизмат бурчини ўтаётган қиличбойлик 16 нафар аскарларнинг  ота-оналари иштирок этдилар.
Тадбирни Қиличбой  овул фуқаролар йиғини раиси Баҳром Қодиров очди ва барчани яқинлашиб келаётган Ватан ҳимоячилари куни билан қизғин қутлади. Шундан сўнг, Ўзини ўзи бошқариш органлари фаолиятини мувофиқлаштириш бўйича туман Кенгаши раисининг кексалар ва нуронийлар бўйича ўринбосари Бахтиёр Шомуродов, туман Мудофаа бўлими ходими Зокир Саъдуллаевлар ҳам байрам билан табриклаб, Миллий армиямиз қудрати, ҳарбийларга яратилаётган шарт-шароитлар, юрт сарҳадларини қўриқлаётган мард ўғлонлар, Ватанимизнинг жасур ҳимоячилари кўрсатган қаҳрамонликлар ҳақида сўз юритдилар. Ҳозирги тинч, осуда ва фаровон ҳаётнинг қадрига етиш, уни асраб авайлашга ҳар бир фуқаро масъуллигини ҳам таъкидлаб ўтдилар. Шунингдек, мустақиллигимизни мустаҳкамлаш учун фидойилик билан меҳнат қилиш, бунинг учун тинмай ўқиб ўрганиш, изланиш, билим, малака ва тажрибаларини ошириб бориш асосида эл-юртга, Ватанга садоқат билан хизмат қилиш кераклиги хусусида гапирдилар.

Тадбирда Қиличбой маданият маркази бадиий ҳаваскорлик жамоалари ва 27-, 22-мактабгача таълим ташкилотлари тарбияланувчилари, шунингдек, 83- ва 15-сонли мактаблар ўқувчилари иштирокида тайёрланган концерт дастури намойиш этилди. Она Ватанни севишга, тинчлигини, осойишталигини бутун борлиғи билан асрашга даъват этувчи, мардлик жасурлик, фидойиликни улуғловчи жанговар қўшиқлар барчага манзур бўлди, мактабгача таълим ташкилотларида тарбияланувчи жажжи болажонларнинг ҳарбий либосда шахдам қадамлар билан рақс тушишлари кўнгилларда завқ уйғотди.

Ватанпарварлик ойлиги доирасидаги тадбирлар туманимизнинг барча ҳудудларида бўлиб ўтмоқда.

О.РАЖАБОВА.