СОҒЛОМ, МАРД, САДОҚАТЛИ ВА ФИДОЙИ ЎҒЛОНЛАР ҲАРБИЙ ХИЗМАТГА ТАНЛОВ АСОСИДА ҚАБУЛ ҚИЛИНАДИ

Ҳар тонг чор-атрофимиздаги осудалик, осойишталикдан, фарзандларимиз бағримизда безавотир улғаяётганидан ва юртимиз осмони тинч, эканлигидан кўнглимиз хотиржам бўлиб, дориломон кунларимизга чексиз шукроналар айтамиз. Шундай дамларда мамлакатимизда умргузаронлик қилаётган барча фуқароларнинг тинч-осойишталигини ишончли қўриқлаб, ҳар қандай таҳдидларга қарши тура оладиган, юртимиз сарҳадларини сергаклик билан ҳимоя қилаётган, Қуролли Кучлар сафида хизмат қилаётган ҳарбий хизматчиларни, муддатли ҳарбий хизмат бурчини ўтаётган аскарларни дуо қиламиз.

Муддатли ҳарбий хизмат – ҳар бир йигитнинг муқаддас бурчидир. Бу борадаги илк билимлар йигитларга умумий ўрта таълим мактабларида чақириққа қадар тайёргарлик фани орқали сингдирилади ва ёшларда юрт тақдирига дахлдорлик, хизматига шай туриш хислатлари шакллантирилади.

Шу боисдан ҳам ҳар йили чақирув ёшидаги фуқаролар ҳарбий хизматга бориш истагида Мудофаа ишлари бўйича бўлимларга мурожаат қиладилар ва бу борадаги синовлардан муваффақиятли ўтишга ҳаракат қиладилар.

Муддатли ҳарбий хизматга чақирилувчилар Ўзбекистон Республикаси Вазирлар Маҳкамасининг “Чақирилувчиларни ҳарбий-техника мутахассисликлари бўйича тайёрлаш ва муддатли ҳарбий хизматни ўташ учун танлаб олиш тартиби тўғрисидаги Низомни тасдиқлаш ҳақида”ги Қарорига мувофиқ қабул қилинган Низом талабларига мувофиқ танлов асосида қабул қилинади.

Танлов – бу чақирув ёшидаги Ўзбекистон Республикаси фуқаролари билан умумжисмоний тайёргарлик, касбий танлов, шунингдек, якка тартибда суҳбат ўтказишга оид тадбирлар комплексини ўз ичига олади. Бундан кўзланган мақсад Қуролли Кучларимиз таркибини интеллектуал салоҳиятли, дунёқараши кенг, соғлом, ватанпарвар, фидойи ва садоқатли чақирилувчилар билан тўлдириш, Ватанимиз тарихи, улуғ саркарда боболаримиз ҳаёти ҳақида эгаллаган билимларини, фикрлаш қобилиятини ва умумжисмоний тайёргарлик даражасини баҳолашдир. Танловда асосан уларнинг Ватан олдидаги масъулияти ва бурчларини онгли равишда англаган ҳолда қатнашишларига алоҳида эътибор қаратилади.

Туман Мудофаа ишлари бўйича бўлимида ҳам Низомга мувофиқ 2019 йилнинг 10 августидан буён чақирилувчиларнинг ҳужжатларини тайёрлаш, уларни махсус тузилган тиббий комиссиянинг босқичма-босқич кўрикларидан ўтишларини ташкил этиш ишлари бошланиб кетди. Комиссия хулосасига кўра, 2020 йилнинг 10 февраль кунига қадар тиббий кўриклар жараёнида соғлом деб топилган йигитлар махсус тузилган танлов кенгаш томонидан умумжисмоний, касбий тайёргарлиги ва якка тартибдаги суҳбат орқали муддатли ҳарбий хизматга танлаб олинади. Жараён тугагач, март, апрель ойларида танловдан муваффақиятли  ўтган чақирилувчилар муддатли ҳарбий хизматга олинади.

Танловдан ўта олмаган йигитлар эса сафарбарлик чақирув резервига тайинланади.

Амалга оширилаётган бу саъй-ҳаракатлар Қуролли Кучлар таркибини илмли, юксак салоҳиятли ва фидойи ўғлонлар билан тўлдиришга қаратилгани билан аҳамиятли. Боиси, муносиб ўғлонларгина юртимизнинг тинч-осойишталигини асрашга қодирдир.

Музаффар МАДРАИМОВ, туман Мудофаа ишлари бўлимининг

ҳарбий хизматга чақирув бўлинмаси бошлиғи.