SOGʻLOM, MARD, SADOQATLI VA FIDOYI OʻGʻLONLAR HARBIY XIZMATGA TANLOV ASOSIDA QABUL QILINADI

Har tong chor-atrofimizdagi osudalik, osoyishtalikdan, farzandlarimiz bagʻrimizda bezavotir ulgʻayayotganidan va yurtimiz osmoni tinch, ekanligidan koʻnglimiz xotirjam boʻlib, dorilomon kunlarimizga cheksiz shukronalar aytamiz. Shunday damlarda mamlakatimizda umrguzaronlik qilayotgan barcha fuqarolarning tinch-osoyishtaligini ishonchli qoʻriqlab, har qanday tahdidlarga qarshi tura oladigan, yurtimiz sarhadlarini sergaklik bilan himoya qilayotgan, Qurolli Kuchlar safida xizmat qilayotgan harbiy xizmatchilarni, muddatli harbiy xizmat burchini oʻtayotgan askarlarni duo qilamiz.

Muddatli harbiy xizmat – har bir yigitning muqaddas burchidir. Bu boradagi ilk bilimlar yigitlarga umumiy oʻrta taʼlim maktablarida chaqiriqqa qadar tayyorgarlik fani orqali singdiriladi va yoshlarda yurt taqdiriga daxldorlik, xizmatiga shay turish xislatlari shakllantiriladi.

Shu boisdan ham har yili chaqiruv yoshidagi fuqarolar harbiy xizmatga borish istagida Mudofaa ishlari boʻyicha boʻlimlarga murojaat qiladilar va bu boradagi sinovlardan muvaffaqiyatli oʻtishga harakat qiladilar.

Muddatli harbiy xizmatga chaqiriluvchilar Oʻzbekiston Respublikasi Vazirlar Mahkamasining “Chaqiriluvchilarni harbiy-texnika mutaxassisliklari boʻyicha tayyorlash va muddatli harbiy xizmatni oʻtash uchun tanlab olish tartibi toʻgʻrisidagi Nizomni tasdiqlash haqida”gi Qaroriga muvofiq qabul qilingan Nizom talablariga muvofiq tanlov asosida qabul qilinadi.

Tanlov – bu chaqiruv yoshidagi Oʻzbekiston Respublikasi fuqarolari bilan umumjismoniy tayyorgarlik, kasbiy tanlov, shuningdek, yakka tartibda suhbat oʻtkazishga oid tadbirlar kompleksini oʻz ichiga oladi. Bundan koʻzlangan maqsad Qurolli Kuchlarimiz tarkibini intellektual salohiyatli, dunyoqarashi keng, sogʻlom, vatanparvar, fidoyi va sadoqatli chaqiriluvchilar bilan toʻldirish, Vatanimiz tarixi, ulugʻ sarkarda bobolarimiz hayoti haqida egallagan bilimlarini, fikrlash qobiliyatini va umumjismoniy tayyorgarlik darajasini baholashdir. Tanlovda asosan ularning Vatan oldidagi masʼuliyati va burchlarini ongli ravishda anglagan holda qatnashishlariga alohida eʼtibor qaratiladi.

Tuman Mudofaa ishlari boʻyicha boʻlimida ham Nizomga muvofiq 2019-yilning 10-avgustidan buyon chaqiriluvchilarning hujjatlarini tayyorlash, ularni maxsus tuzilgan tibbiy komissiyaning bosqichma-bosqich koʻriklaridan oʻtishlarini tashkil etish ishlari boshlanib ketdi. Komissiya xulosasiga koʻra, 2020-yilning 10-fevral kuniga qadar tibbiy koʻriklar jarayonida sogʻlom deb topilgan yigitlar maxsus tuzilgan tanlov kengash tomonidan umumjismoniy, kasbiy tayyorgarligi va yakka tartibdagi suhbat orqali muddatli harbiy xizmatga tanlab olinadi. Jarayon tugagach, mart, aprel oylarida tanlovdan muvaffaqiyatli  oʻtgan chaqiriluvchilar muddatli harbiy xizmatga olinadi.

Tanlovdan oʻta olmagan yigitlar esa safarbarlik chaqiruv rezerviga tayinlanadi.

Amalga oshirilayotgan bu saʼy-harakatlar Qurolli Kuchlar tarkibini ilmli, yuksak salohiyatli va fidoyi oʻgʻlonlar bilan toʻldirishga qaratilgani bilan ahamiyatli. Boisi, munosib oʻgʻlonlargina yurtimizning tinch-osoyishtaligini asrashga qodirdir.

Muzaffar MADRAIMOV, tuman Mudofaa ishlari boʻlimining

harbiy xizmatga chaqiruv boʻlinmasi boshligʻi.