ҚУШ УЯСИДА КЎРГАНИНИ ҚИЛАДИ...(МИ)
Қиз бола бўлғуси оила бекаси, келажагимиз эгалари, деган сўзлар миллатимиз давомчилари бўлмиш қизларни жамиятга муносиб инсонлар қилиб вояга етказишга чақириқдай туюлади менинг назаримда. Чиндан-да бу ҳаётда ҳамманинг ҳам ўз ўрни бор. Айниқса , аёлнинг оила тинч- тотувлигини, ҳамжиҳатлигини таъминлашдаги, фарзанд тарбиясидаги ролини ҳеч нарсага қиёслаб бўлмайди. Донишмандларимиз аёлнинг фарзанд дунёга келтиришидаги чекадиган азобини икки дунё оралиғи, дея таърифлашган, уни вояга етказгунича тортадиган заҳматларини эса боқий дунё раҳматига сазовор бўлишга арзигулик амалларга менгзашган.
Қизларни ана шундай эътирофларга, шарафларга лойиқ қилиб тарбиялашда оналарнинг роли улкан. Боиси қуш уясида кўрганини қилади деганларидай, қизлар кўпинча ўз уйида онасидан кўрганларидан андоза олиб улғаяди. Шунинг учун оналар қизларига ибо- ҳаёни,кийиниш маданиятини, муомала маданиятини кичкиналигидан сингдириб, ўзлари уларга намуна бўлиб боришлари керак. Одобинг сенинг зийнатинг, хушхулқли қиз элда обрўли бўлади, деб уқтириб, ўз кўрсатмаларининг ижросини назорат қилиб борса, табиийки бу келажакда ўз мевасини беради.
Фарзанд, айниқса, қизлар тарбияси кўп қиррали меҳнатни талаб қилади. Бунда мактаб таълим- тарбиясининг, мактабда дарсдан ташқари ўтилган машғулотларда олинган билимларнинг ўрни катта. Мактаб бошланғич хотин - қизлар ташкилотлари бу борада фаол фаолият юритиб, одоб –ахлоқ, сўзлашиш, кийиниш, жамоат орасида ўзини тутиш маданияти ҳақида тез- тез суҳбатлар ўтказиб боришса, албатта, ўқувчиларга ижобий таъсир кўрсатади.Бундай тадбирларда фақат устоз маъруза қилиб, маслаҳат бераверса, ўқувчи эътиборини тортиш қийин. Аксинча, зериктириб қўяди. Шунинг учун тадбирда ўқитувчи ўзи сўз юритаётган мавзу юзасидан ўқувчиларнинг фикрини ҳам билишга қизиқса, баён этилган фикрлардан тегишли хулоса чиқариб, тавсия қилса, кутилган натижага эришиш мумкин. Сўзимнинг хулосаси сифатида шуни таъкидламоқчиманки, мақсадимиз ёшларни комил инсонлар қилиб тарбиялаш экан, бу йўлдаги ишларни ота – оналар билан мустаҳкам ҳамкорликда , бамаслаҳат олиб борсак, мақсадимизга етамиз.
Холбика ТЛЕНБОЕВА, 76 сонли мактаб ўқитувчиси,
бошланғич хотин- қизлар ташкилоти раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
