QUSh UYaSIDA KOʻRGANINI QILADI...(MI)

Qiz bola boʻlgʻusi oila bekasi, kelajagimiz egalari, degan soʻzlar millatimiz davomchilari boʻlmish qizlarni jamiyatga munosib insonlar qilib voyaga yetkazishga chaqiriqday tuyuladi mening nazarimda. Chindan-da bu hayotda hammaning ham oʻz oʻrni bor. Ayniqsa , ayolning oila tinch- totuvligini, hamjihatligini taʼminlashdagi, farzand tarbiyasidagi rolini hech narsaga qiyoslab boʻlmaydi. Donishmandlarimiz ayolning farzand dunyoga keltirishidagi chekadigan azobini ikki dunyo oraligʻi, deya taʼriflashgan, uni voyaga yetkazgunicha tortadigan zahmatlarini esa boqiy dunyo rahmatiga sazovor boʻlishga arzigulik amallarga mengzashgan.

Qizlarni ana shunday eʼtiroflarga, sharaflarga loyiq qilib tarbiyalashda onalarning roli ulkan. Boisi qush uyasida koʻrganini qiladi deganlariday, qizlar koʻpincha oʻz uyida onasidan koʻrganlaridan andoza olib ulgʻayadi. Shuning uchun onalar qizlariga ibo- hayoni,kiyinish madaniyatini, muomala madaniyatini kichkinaligidan singdirib, oʻzlari ularga namuna boʻlib borishlari kerak. Odobing sening ziynating, xushxulqli qiz elda obroʻli boʻladi, deb uqtirib, oʻz koʻrsatmalarining ijrosini nazorat qilib borsa, tabiiyki bu kelajakda oʻz mevasini beradi.

Farzand, ayniqsa, qizlar tarbiyasi koʻp qirrali mehnatni talab qiladi. Bunda maktab taʼlim- tarbiyasining, maktabda darsdan tashqari oʻtilgan mashgʻulotlarda olingan bilimlarning oʻrni katta. Maktab boshlangʻich xotin - qizlar tashkilotlari bu borada faol faoliyat yuritib, odob –axloq, soʻzlashish, kiyinish, jamoat orasida oʻzini tutish madaniyati haqida tez- tez suhbatlar oʻtkazib borishsa, albatta, oʻquvchilarga ijobiy taʼsir koʻrsatadi.Bunday tadbirlarda faqat ustoz maʼruza qilib, maslahat beraversa, oʻquvchi eʼtiborini tortish qiyin. Aksincha, zeriktirib qoʻyadi. Shuning uchun tadbirda oʻqituvchi oʻzi soʻz yuritayotgan mavzu yuzasidan oʻquvchilarning fikrini ham bilishga qiziqsa, bayon etilgan fikrlardan tegishli xulosa chiqarib, tavsiya qilsa, kutilgan natijaga erishish mumkin. Soʻzimning xulosasi sifatida shuni taʼkidlamoqchimanki, maqsadimiz yoshlarni komil insonlar qilib tarbiyalash ekan, bu yoʻldagi ishlarni ota – onalar bilan mustahkam hamkorlikda , bamaslahat olib borsak, maqsadimizga yetamiz.

Xolbika TLENBOYeVA, 76-sonli maktab oʻqituvchisi,

boshlangʻich xotin- qizlar tashkiloti raisi.