Сайлов участкаларида тайёргарлик ишлари якунига етказилди
Айни кунларда мамлакатимизда муҳим ижтимоий-сиёсий жараён – Олий Мажлис Қонунчилик Палатаси, Қорақалпоғистон Республикаси Жўқорғи Кенгеси, халқ депутатлари вилоят ва шаҳар Кенгашларига бўлиб ўтадиган сайловларга тайёргарлик энг сўнгги паллага кирди. Барча сайлов участкаларида 22 декабрь – сайловлар кунини уюшқоқлик билан ўтказиш, бўлиб ўтадиган сайловларда очиқлик ва шаффофликни таъминлаш мақсадида сайловчилар учун зарурий шарт-шароитлар яратилди.
Тўлқин овули ҳудудидаги 124-сайлов участкаси 33-сонли мактаб биносида жойлашган. Сайловлар кунида овул ҳудудидаги “Туёқли”, “Чангалқалъа”, “Полвонбой” аҳоли пунктларида истиқомат қилувчи 1 минг 670 нафар аҳоли ўзлари танлаган партия номзодларини қўллаб-қувватлаб овоз берадилар. Сайловчиларнинг эмин-эркин овоз беришлари учун бу ерда зарур шарт-шароитлар яратилган.
Сайлов участкасида сайловчиларнинг муддатидан олдин овоз беришларини ташкил этиш, ҳудуддаги сайловчиларни сайлов қонунчилиги билан таништириш, уларга сайловга қачирув қоғозларини ўз вақтида етказиш, бешта сиёсий партияларнинг дастурлари ва партиялардан кўрсатилган номзодларнинг сайловолди дастурлари билан яқиндан танишишлари учун барча шароитлар яратилган.
***
Бештом маҳалласи ҳудудидаги 24-сонли мактаб биносида жойлашган 132-сайлов участкаси ҳам 22 декабрь – сайловлар кунига тахт қилиб қўйилди. Бешта сиёсий партиядан кўрсатилган номзодлар ҳақидаги маълумотлар, партияларнинг сайловолди ҳаракат дастурлари акс эттирилган баннерлар, сайлов қонунчилигига оид ижтимоий-сиёсий адабиётлар ва матбуот нашрлари билан таъминланган сайлов участкаси байрамона безатилган. Кексалар, оналар ва болалар учун хоналар, тиббиёт хонаси ҳамда овоз бериш бўлмалари зарур анжомлар билан жиҳозланган.
Бештом маҳалласи ҳудудидаги “Бештом” ва “Хўжакўл” аҳоли пунктларида истиқомат қилувчи 1 минг 512 нафар сайловчига 22 декабрь – сайловлар кунида ўз фуқаролик бурчларини адо этишлари учун чақирув қоғозлари тарқатилди. Участка сайлов комиссияси аъзоларининг ўзаро жипсликда, аниқ режа асосида иш олиб борганликлари боис, сайловлар кунида биринчи марта овоз берадиган 21 нафар ёш сайловчилар ўртасида тушунтириш-тарғибот ишлари олиб борилиб, уларни қизиқтирган барча саволларга ўз вақтида жавоб берилди.
Шунингдек, мазкур сайлов участкасида бир неча нафар сайловчилар ўз аризасига асосан муддатидан олдин овоз бериб, ўзлари танлаган номзодларни қўллаб-қувватладилар.
***
Қипчоқ овулидаги 129-сайлов участкаси ҳам сайловлар кунига тахт қилиб қўйилди. 18-сонли мактаб биносида жойлашган мазкур сайлов участкаси ҳудудига “Кўкчи”, “Қайировул” ва “Тараққиёт” аҳоли пунктининг жанубий қисми киради, сайловчилар сони эса 2 минг 750 нафарни ташкил этади.
Мазкур сайлов участкасида ҳам сайловлар кунига пухта ҳозирлик кўрилди.
Сайлов участкаси давлат рамзлари, замонавий ахборот технологиялари, сайлов қонунчилигига оид зарур адабиётлар, матбуот нашрлари, тарғибот баннерлари билан жиҳозланди. Ногиронлиги бўлган сайловчилар, кексалар, оналар ва болалар учун зарур шароитлар яратилиб, тиббиёт хонаси, сайлов қутилари ва овоз бериш бўлмалари тахт қилиб қўйилди.
Шунингдек мазкур сайлов участкасида илк марта овоз берадиган 165 нафар ёшлар, олдиндан овоз бериш истагида бўлган сайловчиларга зарур тушунчалар берилди.
Сайлов участкаси ҳудудида рўйхатга олинган сайловчилар ўзлари учун мақбул бўлган сиёсий партияларнинг сайловолди дастурлари ҳақида тўлиқ маълумотларга эга бўлиб, мазкур партиялар томонидан кўрсатилган номзодлар билан учрашувлар ўтказишди.
Участка сайлов комиссияси аъзолари уйма-уй юриб, сайловчиларнинг ягона электрон базага киритилганини текшириб, аниқлик киритгани эса сайлов кунида овоз берувчиларни рўйхатга олишда анча енгилликлар яратади.
Робия ЙЎЛДОШЕВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
