Saylov uchastkalarida tayyorgarlik ishlari yakuniga yetkazildi

Ayni kunlarda mamlakatimizda muhim ijtimoiy-siyosiy  jarayon – Oliy Majlis Qonunchilik Palatasi, Qoraqalpogʻiston Respublikasi Joʻqorgʻi Kengesi, xalq deputatlari viloyat va shahar Kengashlariga boʻlib oʻtadigan saylovlarga tayyorgarlik eng soʻnggi pallaga kirdi. Barcha saylov uchastkalarida 22-dekabr – saylovlar kunini uyushqoqlik bilan oʻtkazish, boʻlib oʻtadigan saylovlarda ochiqlik va shaffoflikni taʼminlash maqsadida saylovchilar uchun zaruriy shart-sharoitlar yaratildi.

Toʻlqin ovuli hududidagi 124-saylov uchastkasi 33-sonli maktab binosida joylashgan. Saylovlar kunida ovul hududidagi “Tuyoqli”, “Changalqalʼa”, “Polvonboy” aholi punktlarida istiqomat qiluvchi 1 ming 670 nafar aholi oʻzlari tanlagan partiya nomzodlarini qoʻllab-quvvatlab ovoz beradilar. Saylovchilarning emin-erkin ovoz berishlari uchun bu yerda zarur shart-sharoitlar yaratilgan.

Saylov uchastkasida saylovchilarning muddatidan oldin ovoz berishlarini tashkil etish, hududdagi saylovchilarni saylov qonunchiligi bilan tanishtirish, ularga saylovga qachiruv qogʻozlarini oʻz vaqtida yetkazish, beshta siyosiy partiyalarning dasturlari va partiyalardan koʻrsatilgan nomzodlarning saylovoldi dasturlari bilan yaqindan tanishishlari uchun barcha sharoitlar yaratilgan.

***

Beshtom mahallasi hududidagi 24-sonli maktab binosida joylashgan 132-saylov uchastkasi ham 22-dekabr – saylovlar kuniga taxt qilib qoʻyildi. Beshta siyosiy partiyadan koʻrsatilgan nomzodlar haqidagi maʼlumotlar, partiyalarning saylovoldi harakat dasturlari aks ettirilgan bannerlar, saylov qonunchiligiga oid ijtimoiy-siyosiy adabiyotlar va matbuot nashrlari bilan taʼminlangan saylov uchastkasi bayramona bezatilgan. Keksalar, onalar va bolalar uchun xonalar, tibbiyot xonasi hamda ovoz berish boʻlmalari zarur anjomlar bilan jihozlangan.

Beshtom mahallasi hududidagi “Beshtom” va “Xoʻjakoʻl” aholi punktlarida istiqomat qiluvchi 1 ming 512 nafar saylovchiga 22-dekabr – saylovlar kunida oʻz fuqarolik burchlarini ado etishlari uchun chaqiruv qogʻozlari tarqatildi. Uchastka saylov komissiyasi aʼzolarining oʻzaro jipslikda, aniq reja asosida ish olib borganliklari bois, saylovlar kunida birinchi marta ovoz beradigan 21 nafar yosh saylovchilar oʻrtasida tushuntirish-targʻibot ishlari olib borilib, ularni qiziqtirgan barcha savollarga oʻz vaqtida javob berildi.

Shuningdek, mazkur saylov uchastkasida bir necha nafar saylovchilar oʻz arizasiga asosan muddatidan oldin ovoz berib, oʻzlari tanlagan nomzodlarni qoʻllab-quvvatladilar.

***

Qipchoq ovulidagi 129-saylov uchastkasi ham saylovlar kuniga taxt qilib qoʻyildi. 18-sonli maktab binosida joylashgan mazkur saylov uchastkasi hududiga “Koʻkchi”, “Qayirovul” va “Taraqqiyot” aholi punktining  janubiy qismi kiradi, saylovchilar soni esa 2 ming 750 nafarni tashkil etadi.

Mazkur saylov uchastkasida ham saylovlar kuniga puxta hozirlik koʻrildi.

Saylov uchastkasi davlat  ramzlari, zamonaviy axborot texnologiyalari, saylov qonunchiligiga oid zarur adabiyotlar, matbuot nashrlari, targʻibot bannerlari bilan jihozlandi. Nogironligi boʻlgan saylovchilar, keksalar, onalar va bolalar uchun zarur sharoitlar yaratilib, tibbiyot xonasi, saylov qutilari va ovoz berish boʻlmalari taxt qilib qoʻyildi.

Shuningdek mazkur saylov uchastkasida ilk marta ovoz beradigan 165 nafar yoshlar, oldindan ovoz berish istagida boʻlgan saylovchilarga zarur tushunchalar berildi.

Saylov uchastkasi hududida roʻyxatga olingan saylovchilar oʻzlari uchun maqbul boʻlgan siyosiy partiyalarning saylovoldi dasturlari haqida toʻliq maʼlumotlarga ega boʻlib, mazkur partiyalar tomonidan koʻrsatilgan nomzodlar bilan uchrashuvlar oʻtkazishdi.

Uchastka saylov komissiyasi aʼzolari uyma-uy yurib, saylovchilarning yagona elektron bazaga kiritilganini tekshirib, aniqlik kiritgani esa saylov kunida ovoz beruvchilarni roʻyxatga olishda ancha yengilliklar yaratadi.

Robiya YOʻLDOShEVA