ПЕНСИЯ ТАЪМИНОТИ ТАКОМИЛЛАШТИРИЛМОҚДА
Туманимизда 2019 йил 1 октябрь ҳолатига пенсия, ижтимоий нафақа олувчи пенсионерлар 21983 нафарни ташкил этади. Ёшга доир пенсия олувчилар 16335 нафар, ногиронлик бўйича пенсия олувчилар 2450 нафар, боқувчисини йўқотганлик пенсиясини олувчилар 961 нафар, пенсия тайинлаш учун зарур иш стажига эга бўлмаган қариялар ва боқувчисини йўқотганлик учун ижтимоий нафақа олувчилар 2240 нафардан иборат.
Молия вазирлиги ҳузуридаги бюджетдан ташқари Пенсия жамғармаси туман бўлими томонидан фуқароларга пенсия ва ижтимоий нафақалар тайинлаш масалалари жараёнида пенсияларнинг қонун талаблари асосида тўғри тайинланишига алоҳида эътибор қаратилади. Шу сабабли, корхона-ташкилотлар, архив идоралари томонидан иш стажи, иш ҳақи тўғрисидаги маълумотларнинг тўғри белгиланганлиги жойларга чиқиб текширилиб, кейин тўлов ўтказилади. Ундан ташқари, пенсияни тайинлаш, молиялаштириш ва унинг ўз вақтида етказиб берилиши мунтазам назорат қилиб борилади.
Пенсия ва нафақалар тўловлари Халқ банки орқали амалга оширилмоқда. Фуқаролар йиғинлари кесимида туман бўйича 13970 нафар пенсия ва нафақа олувчиларнинг тўлов рўйхатлари шакллантирилиб, ўртача ойига 8,3 млрд. сўмлик тўлов ведомостлари Халқ банки туман филиалига ўз муддатида етказилмоқда. Шунингдек, туман бўйича якка-ёлғиз яшовчи, ётиб қолган, кам таъминланган ва 1-, 2-гуруҳ ногиронлиги бўлган шахслардан 6173 нафарининг рўйхатлари алоҳида шакллантирилди. Айни пайтда Халқ банки туман бўлими билан ҳамкорликда уларнинг хонадонларига пенсия ва нафақа пуллари биринчи навбатда етказиб берилмоқда. Туманда 14300 нафар пенсия ва нафақа олувчи фуқаро “SMS-pensiya” хизматидан фойдаланмоқда.
Нуроний отахон ва онахонлар, ногиронлиги бўлган фуқаролар, турли тоифадаги нафақа олувчилар билан мулоқот қилиш мақсадида жойларга чиқиб, аҳоли ўртасида суҳбатлар ўтказилмоқда. Ўтган давр мобайнида фуқаролар йиғинларида 37 марта сайёр қабуллар ўтказилди.
Шу йилнинг 1 октябридан ун ва қолипли нон харид қилиш бўйича қўшимча харажатларни қоплаш учун ҳар ойлик пул компенсацияси 22 минг 300 сўмдан 50 минг сўмга оширилди. Компенсация маблағлари ёшга доир, ногиронлик, боқувчисини йўқотганлик нафақасини олувчилар, боқувчисини йўқотганлик пенсиясини олувчиларга берилади. Шу қаторда ногиронлиги бўлган 16 ёшгача, 18 ёшгача ОИВни юқтирган шахсларга нафақа олувчилар, болаликдан ногирон бўлган 16 ёшдан катта нафақа олувчилар, энг кам ёшга доир пенсия миқдорида ва ундан кам пенсия олувчиларга ҳам компенсация маблағлари тўланади.
Шунингдек, туманимизда ун ва нон маҳсулотлари учун компенсация маблағлари нақд пул шаклида Халқ банкининг сайёр кассалари томонидан маҳалла фуқаролар йиғинларига борган ҳолда етказилмоқда.
Давлатимиз томонидан амалга оширилаётган бундай ташкилий ишлар пенсия олувчиларнинг барча муаммоларини хал этишга, уларни ортиқча ташвишга қўймай хотиржам турмуш кечиришларини таъминлашга қаратилганлиги билан аҳамиятлидир. Юртимиз аҳолиси пенсия таъминоти тизимининг тобора такомиллашаётганидан ниҳоятда мамнун.
Зокиржон Халиллаев,
Бюджетдан ташқари Пенсия жамғармаси
туман бўлими бошлиғи ўринбосари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
