Ичимлик суви таъминоти бўйича кўрсатилаётган хизматлар сифати ўрганилмоқда

Коммунал хизматлар сифати аҳоли турмуш даражасини белгилайдиган асосий мезонлардан бири саналади. Тоза ичимлик суви таъминоти ва оқова сув тизимининг узлуксиз ишлаши эса шу мезоннинг энг асосий қисми ҳисобланади. Шу боис соҳада давлат назорати йилдан-йилга кучайтирилиб, амалий текширувлар ҳудудларда мунтазам тус олмоқда.

Қорақалпоғистон Республикаси қурилиш ва уй-жой коммунал хўжалиги соҳасида назорат қилиш инспекцияси томонидан истеъмолчиларга етказиб берилаётган ичимлик суви ҳамда уларга кўрсатилаётган оқова сув хизматларининг сифати доимий равишда назорат қилиб борилмоқда. Бу йўналишдаги ишлар туманлар кесимида навбат билан, тасдиқланган жадвал асосида олиб борилмоқда. Навбатдаги ўрганиш ишлари Амударё туманида амалга оширилди.

“Қорақалпоқ сув таъминоти” акциядорлик жамияти ходимлари ҳамкорлигида ўтказилган тадбир давомида жисмоний ва юридик шахсларга қарашли бинолар кўздан кечирилди. Хусусан, истеъмолчиларнинг тармоққа қонуний уланганлик ҳолати, тўлов интизоми ҳамда хавфсизлик талабларига риоя қилиниши таҳлил этилди.

Шунингдек, аҳоли ва тадбиркорлик субъектлари орасида хизматлар ҳақини ўз вақтида тўлаш ва табиий ресурслардан тежамкорлик билан фойдаланиш тарғиб қилинди.

Маълумот ўрнида айтиш жоизки, 2026 йилнинг ўтган етти ойи давомида инспекция томонидан Қорақалпоғистон Республикаси бўйича жами 319 та ноқонуний уланиш аниқланган. Шундан 144 таси ичимлик сув тармоқларига, 3 таси оқова сув тармоқларига уланиш, 172 таси эса сув ҳисоблагичларидаги пломбаларга оид ҳолатлардир.

Кўриниб турибдики, аниқланган ҳолатларнинг ярмидан кўпи айнан ҳисоблаш ускуналари билан боғлиқ. Ушбу ҳолатлар натижасида “Қорақалпоқ сув таъминоти” акциядорлик жамиятига етказилган зарар миқдори салкам 300 миллион сўмни ташкил этган.

Шу билан бирга, республика ҳудудида жойлашган бюджет ташкилотларида ичимлик сувидан фойдаланиш қоидаларига амал қилиниши юзасидан 231 та ўрганишлар ўтказилган. Натижаларга кўра, 23 та ташкилотда камчиликлар қайд этилган. Улардан 3 тасига камчиликларни бартараф этиш юзасидан кўрсатма киритилган, 20 тасига нисбатан эса умумий қиймати 102,1 миллион сўмлик маъмурий жарималар расмийлаштирилган.

Бундай текширувлар сув ресурсларидан фойдаланишда тартибни мустаҳкамлаш, ҳисоб-китоб аниқлигини таъминлаш ва ҳалол истеъмолчилар манфаатини ҳимоя қилишга йўналтирилгани билан аҳамиятлидир. Ноқонуний уланишларнинг олдини олиш эса тизимнинг молиявий барқарорлигини сақлашга, шу орқали хизмат сифатини яхшилашга хизмат қилади. Айни пайтда ҳудудларда назорат билан бир қаторда тарғибот ишлари ҳам узлуксиз давом эттирилмоқда.