Маҳаллам - ифтихорим

Одамзот яралганидан бери то ҳозиргача гуруҳ бўлиб яшаб келади. Замонлар оша шаклланган ижтимоий гуруҳлар бирлашиб, давлатлар пайдо бўлди. Сўнг давлатлар ҳудудидаги кенг бирлик -  маҳалла пайдо бўлди. Биз биламизки, давлатнинг энг муҳим ва энг кичик бирлиги – бу оиладир. Оила – бу жамият. Маҳалла эса давлатнинг юзи ҳисобланади. Ёшларнинг тўғри камол топиши, оилалардаги ҳамжиҳатлик, тинч-тотув ва осойишталиги кўп жиҳатдан маҳаллаларнинг фаолиятига боғлиқ. Бизнинг "Чордара” маҳалламиз 1998 йилда ташкил топган  бўлиб, Манғит шаҳрининг энг кўркам маҳаллаларидан бири ҳисобланади. Мен ўзим яшаётган маҳалла билан ҳамиша фахрланаман. Маҳалламизда 5 та сектор – таълим-тарбия, саломатлик, оилага кириш, жиноятчилик профилактикаси ва бандлик секторлари иш олиб боради.

Секторларга юклатилган вазифаларни бажариш эса Жумамурод Еримбетов, Феруза Жумамуродова, Турсунбой Серикбоев, Илҳом Абутов, Камар Саидова каби маҳалла фаолларининг зиммасида. Жорий йил муҳтарам Юртбошимиз томонидан "Соғлом бола йили” деб эълон қилинди. "Чордара” маҳалласида эса йил муносабати билан бир қанча тадбирлар ўтказилди. Булардан энг аҳамиятлиси маҳалла маслаҳатчиси Феруза опа Оллоберганова томонидан ҳар ҳафтанинг чоршанба кунида ўтказилаётган "Ораста қизлар” тўгараги тадбирларидир.

- Биз яқинда ушбу тўгаракни ташкил этдик, - дейди МФЙ диний маърифат ва маънавий-ахлоқий тарбия масалалари бўйича маслаҳатчи Феруза опа.  - Тўгаракда асосан ёш қизларимизни оилавий ҳаётга тайёрлаш, эрта турмуш қуришнинг олдини олиш борасида ёшлар ўртасида тиббий ва маънавий-маърифий суҳбатлар олиб бораяпмиз.

- Бу йил Президентимиз томонидан "Соғлом бола йили” деб эълон қилинди, - дейди МФЙ раиси Т.Серикбоев. – Биз эса энг биринчи навбатда соғлом бола дунёга келиши учун ҳаракат қилишимиз керак. Соғлом бола эса  соғлом ота ва соғлом онадан дунёга келади. Мана, саъй-ҳаракатларимиз туфайли яқинда маҳалламизда  эрта узатилаётган қизнинг тўйи қолдирилди. Бу ҳам бизнинг ютуқ. Яна эрта турмушнинг олдини олиш учун ота-оналар билан ҳам алоҳида суҳбатлар ўтказилмоқда.

МФЙ раисининг сўзларини тинглар эканман, маҳаллада олиб борилаётган ишларнинг нечоғлик аҳамиятга эга эканлигига яна бир бор амин бўлдим. Маҳаллада маънавий-маърифий тарғибот қанча кучли бўлса, шу элнинг ўғил-қизлари баркамол авлод бўлиб вояга етади. Баркамол фарзандлар эса миллат таянчи. Уларнинг ота-онаси, тарбиячиси, устози ва дўст-у ёри эса маҳалладир.

Сирож ОЛИМОВ,