Mahallam - iftixorim

Odamzot yaralganidan beri to hozirgacha guruh boʻlib yashab keladi. Zamonlar osha shakllangan ijtimoiy guruhlar birlashib, davlatlar paydo boʻldi. Soʻng davlatlar hududidagi keng birlik -  mahalla paydo boʻldi. Biz bilamizki, davlatning eng muhim va eng kichik birligi – bu oiladir. Oila – bu jamiyat. Mahalla esa davlatning yuzi hisoblanadi. Yoshlarning toʻgʻri kamol topishi, oilalardagi hamjihatlik, tinch-totuv va osoyishtaligi koʻp jihatdan mahallalarning faoliyatiga bogʻliq. Bizning "Chordara” mahallamiz 1998 yilda tashkil topgan  boʻlib, Mangʻit shahrining eng koʻrkam mahallalaridan biri hisoblanadi. Men oʻzim yashayotgan mahalla bilan hamisha faxrlanaman. Mahallamizda 5 ta sektor – taʼlim-tarbiya, salomatlik, oilaga kirish, jinoyatchilik profilaktikasi va bandlik sektorlari ish olib boradi.

Sektorlarga yuklatilgan vazifalarni bajarish esa Jumamurod Yerimbetov, Feruza Jumamurodova, Tursunboy Serikboyev, Ilhom Abutov, Kamar Saidova kabi mahalla faollarining zimmasida. Joriy yil muhtaram Yurtboshimiz tomonidan "Sogʻlom bola yili” deb eʼlon qilindi. "Chordara” mahallasida esa yil munosabati bilan bir qancha tadbirlar oʻtkazildi. Bulardan eng ahamiyatlisi mahalla maslahatchisi Feruza opa Olloberganova tomonidan har haftaning chorshanba kunida oʻtkazilayotgan "Orasta qizlar” toʻgaragi tadbirlaridir.

- Biz yaqinda ushbu toʻgarakni tashkil etdik, - deydi MFY diniy maʼrifat va maʼnaviy-axloqiy tarbiya masalalari boʻyicha maslahatchi Feruza opa.  - Toʻgarakda asosan yosh qizlarimizni oilaviy hayotga tayyorlash, erta turmush qurishning oldini olish borasida yoshlar oʻrtasida tibbiy va maʼnaviy-maʼrifiy suhbatlar olib borayapmiz.

- Bu yil Prezidentimiz tomonidan "Sogʻlom bola yili” deb eʼlon qilindi, - deydi MFY raisi T.Serikboyev. – Biz esa eng birinchi navbatda sogʻlom bola dunyoga kelishi uchun harakat qilishimiz kerak. Sogʻlom bola esa  sogʻlom ota va sogʻlom onadan dunyoga keladi. Mana, saʼy-harakatlarimiz tufayli yaqinda mahallamizda  erta uzatilayotgan qizning toʻyi qoldirildi. Bu ham bizning yutuq. Yana erta turmushning oldini olish uchun ota-onalar bilan ham alohida suhbatlar oʻtkazilmoqda.

MFY raisining soʻzlarini tinglar ekanman, mahallada olib borilayotgan ishlarning nechogʻlik ahamiyatga ega ekanligiga yana bir bor amin boʻldim. Mahallada maʼnaviy-maʼrifiy targʻibot qancha kuchli boʻlsa, shu elning oʻgʻil-qizlari barkamol avlod boʻlib voyaga yetadi. Barkamol farzandlar esa millat tayanchi. Ularning ota-onasi, tarbiyachisi, ustozi va doʻst-u yori esa mahalladir.

Siroj OLIMOV,