Бир келиб кетинг маҳалламизга...

Бу маҳаллада қачон қарасанг қурилиш, янгиланиш, бунёдкорлик, одамлари ишнинг кўзини биладиган, тиниб-тинчимас ва шу билан биргаликда содда ва самимий! Кўчаларини кезсанг ҳақиқий ўзбек маҳалласидаги файзни ҳис этасан... Ҳа, бу таърифлар Манғит шаҳрига кираверишда жойлашган Гулзор МФЙга тегишли. Одатда, қайсидир ҳудудга ташриф буюрганимизда ўша ҳудудга кираверишдаги овул ёки маҳалла эътиборимизни кўпроқ тортади. Яни улар ҳудуднинг моддий ва маънавий ҳаётидан ҳикоя қилгандай бўлади, одамда илк таассурот уйғотади. Шуни ҳисобга оладиган бўлсак, Манғитимизга ташриф буюрган меҳмоннинг кўнглидан Гулзор МФЙ ёнидан ўтаётиб, шаҳримиз ҳақида ижобий таассуротлар кечса ажаб эмас.

Амударё телевидениеси таҳририятининг “Юксак маънавиятли ва ахлоқли ёшлар келажак пойдевори” номли грант лойиҳаси эса бизни ушбу МФЙ фаолияти билан яқиндан танишишга чорлади.

Гулзор МФЙда 858 та хонадон мавжуд, шунингдек, ушбу хонадонларда 1062 та оила ва уларда 4085 нафар аҳоли истиқомат қилади. Маҳаллага Баҳром Юлдашов раислик қилади. Чинданда, юрт дарди билан яшайдиган, чинакам фидойи инсонгина маҳалла раиси бўлишга лойиқ. Бу инсон ҳам ўз ҳаётини, дард-у, ташвишларини ўзи раҳбарлик қилаётган маҳалла билан боғлаган. Ҳар куни унинг олдига турли хил мурожаат ва таклифлар билан ёки маҳалладан кўмак сўраб келаётган фуқароларнинг муаммоларини тинглаш, жойида ҳал этиш унинг бош мақсади.

Маҳалланинг ривожланишида, аҳолисининг иш билан таъминланганлик даражасининг ўсишида албатта маҳалладаги ҳоким ёрдамчиларининг ўрни алоҳида. Гулзор МФЙ ҳоким ёрдамчиси Акбаржон Ражапов ҳам маҳаллада тадбиркорларнинг сафи кенгайишида ҳормай, толмай меҳнат қилиб келмоқда. Тадбиркорлик қилиш истагида олдига келган ҳар бир фуқаро билан самимий муносабатда бўлиб, унинг тадбиркорлик бўйича бирорта таклиф ёки мурожаатини эътибордан четда қолдирмайди. Кредит олишда, ўз бизнесини яратишда астойдил ҳаракат қилади.

Маҳалланинг асосий ўсиш драйвери аҳолига савдо ва хизмат кўрсатиш бўлиб, ҳозирги кунда маҳаллада 60 дан ортиқ савдо ва хизмат кўрсатиш шохобчалари фаолият кўрсатмоқда. Шунингдек, 2023 йил маҳаллада 6,3 км узунликда Аваз Ўтар, Истиқбол, Усмон Носир кўчаларига тош ётқизилиб Истиқбол кўчасига трансформатор ўрнатилди. Бундан ташқари маҳаллага ажратилган 500 миллион сўмга Огаҳий кўчасига пиёдалар йўлакчаси билан тунги ёритқич чироқлари ўрнатилди, кўп қаватли уйлар кириб чиқиш қисмига замонавий камералар ўрнатилди.

Ҳа, Гулзорни ҳақиқатан тадбиркорлар элати, дейиш мумкин. Маҳаллада 2023-йил давомида 168 та фуқароларга тегишли давлат дастурлари асосида 2 млрд 300 миллион сўмлик кредитлар ажратилди. Жумладан, ҳоким ёрдамчиси кўмагида “Қурилиш хизмат” МЧЖга акфа эшик дераза ромлари ишлаб чиқариш ускунаси сотиб олиш учун 33 миллион сўм ажратилиб, бугунги кунда ўз фаолиятини давом эттириб келмоқда. Масканда ишлаб чиқарилаётган эшик ва дераза ромлари халқимизнинг оғирини енгил қилмоқда.

Сув – поклик рамзи. Юртдошларимизни тоза ичимлик суви билан таъминлаш эса ҳам савобли, ҳам даромадли иш. Фуқаро Икром Базарбаевга амалий ёрдам кўрсатилиб, 33 миллион сўм имтиёзли кредит олиб ўз тадбиркорлик фаолиятини бошлаб юборишига кўмаклашилди. Тадбиркор ҳозирда тозаланган сув ишлаб чиқариш ускунаси ортидан даромад топмоқда.

Шу билан биргаликда, маҳаллада яна 220 нафар фуқаролар хар хил тадбиркорлик йўналишида ўзини ўзи банд қилишига эришилган. МФЙда ёшларнинг бандлигини таъминлаш ва тадбиркорлик ғояларини қўллаб қувватлаш мақсадида 40 дан ортиқ ёшларга имтиёзли кредитлар ажратилиб ўзини ўзи банд қилди, шундан ишсиз ёш Юлдашева Марҳабо имтиёзли кредит олиб томорқасига иссиқхона қуриб хар хил кўкатлар ва кўчатлар етиштирмоқда. Тадбиркорнинг иссиқхонасида асосан, кўк пиёз, редиска каби полиз маҳсулотлари етиштирилиб, оила истеъмолидан ортган қисмини бозорга олиб чиқиб сотади, даромад қилади.

Шунингдек, ёшлар ўртасида жиноятчиликнинг олдини олиш, бўш вақтларини мазмунли ташкил қилишда маҳалланинг ёшлар етакчиси Жаҳонгир Ҳайитбоевнинг ўз ўрни бор.

Маҳалла қадриятлар бешиги. Халқимизнинг яхши ёмон кунини, тўй маракаларини маҳалла аҳлисиз тасаввур қила олмаймиз. Чунки одам ОДАМ билан тирик, кўнгил кўнгилдан сув ичиб яшайди мудом.

Халқни бирлаштириш, унинг дард-у ташвиши-ю, қувончини биргаликда баҳам кўриш эса МФЙлари зиммасидаги улкан масъулият. Ана шу масъулиятни ҳис этиб, шу юрт, шу эл учун фидокорона меҳнат қилиб келаётган маҳалла бешлигининг келгусидаги фаолиятига омад ёр бўлсин, деймиз.

Азиза МАДРАҲИМОВА