Болага эътибор – оилага ва миллат келажагига эҳтиром ифодаси

Оила жамиятнинг асосий бўғинидир ҳамда жамият ва давлат муҳофазасида бўлиш ҳуқуқига эга.

(Ўзбекистон Республикаси Конституциясининг 63-моддасидан)

Истиқлол йилларида ёшларга оила қуриш нақадар муҳим ва масъулиятли иш эканини англатиш, соғлом оилани шакллантириш, оилада юксак маънавий-ахлоқий муҳитни қарор топтириш учун зарур шарт-шароит яратиш энг устувор сиёсат даражасига кўтарилди.

Дарҳақиқат, оила – фуқаролик жамиятининг, давлатнинг энг муҳим ҳужайраси. Сабаби ҳар бир жамият аъзосининг тарбияси, энг аввало, оиладан бошланади. Ўсиб келаётган авлоднинг етуклигини ҳам, инқирозини ҳам оила муҳити белгилаб беради. Агар оила баркамол, ота-оналар маънавиятли, қадриятларимизга эътиборли бўлса, бундай оилада ёмон фарзанд тарбияланмайди.

Янги 2014 йилга муҳтарам Президентимиз томонидан "Соғлом бола йили” деб ном берилиши барча давлат  идоралари, нодавлат ва ижтимоий ташкилотлар қаторида фуқаролик ҳолати далолатномаларини ёзиш (ФҲДЁ) органлари зиммасига ҳам катта масъулият юклади.

Муҳтарам Президентимиз Ўзбекистон Республикаси Конституциясининг 21 йиллигига бағишланган тантанали йиғилишда сўзлаган маърузасида шундай деб таъкидладилар: "Маълумки, мамлакатимизда бўлғуси келин-куёвларни никоҳдан олдин тиббий кўрикдан ўтказиш тартиби жорий этилган бўлиб, бундан кўзланган асосий мақсад соғлом оила қуриш, соғлом болани дунёга келтириш билан боғлиқ. Лекин афсуски, инсоннинг ҳаёти, туғилажак фарзанднинг тақдирига бевосита дахлдор бу масалага баъзан масъулиятсизлик билан қараш, сохта ва юзаки хулосалар чиқариш, тиббий маълумотномаларни сотиб олиш каби ҳолатлар учраб туриши барчамизни ташвишга солиши зарур”.

Шундай экан, Вазирлар Маҳкамасининг 2003 йил 25 августда қабул қилинган "Никоҳланувчи шахсларни тиббий кўрикдан ўтказиш тўғрисидаги низомни тасдиқлаш ҳақида”ги Қарори ижросини таъминлашга алоҳида эътибор қаратишимиз лозим.  Оила қуриш арафасидаги ёшлар бир-бирининг  саломатлиги ҳақида аниқ маълумотга эга бўлишини таъминлаш орқали келгусида бефарзандлик, жисмоний, руҳий ривожланишида нуқсони бўлган бола туғилишининг олдини олишга,  ажралишларнинг камайишига эришилади.

Ана шу мақсадлардан келиб чиқиб, оила институтини янада такомиллаштириш, никоҳ масъулияти, ҳуқуқ ва мажбуриятлар тенглиги, қон-қариндошлик муносабаларининг аҳамияти ҳақида янада мазмунли, самарали тарғибот ишларини олиб бориш лозим. Бунда аввало, оиланинг муқаддаслиги ҳамда никоҳ масъулияти бўйича турмуш қураётган ёшларнинг билим ва тушунчаларини бойитишга алоҳида эътибор қаратиш, хусусан, оила қуриш ҳар бир инсон ҳаётида улкан ҳодиса эканлиги, бу масала шахсий, хусусий  доирадан чиқиб, ижтимоий-ҳуқуқий аҳамият касб этишини тушунтириш, иккинчидан, вояга етаётган ўсмирлар онгида оила масъулияти, уларни турмуш қуришга тайёрлаш, ёш оилаларининг ҳуқуқий саводхонлигини тубдан яхшилаш, оилада боланинг қонуний ҳуқуқ ва манфаатлари ҳимояси бўйича тадбирлар ташкил қилиш бўйича тегишли мутахассислар иштирокида тушунтириш ишларини олиб бориш зарур.

Хулоса ўрнида шуни айтиш жоизки, ҳам маънан, ҳам жисмонан соғлом оиланинг вужудга келиши юрт ва миллат тақдирига дахлдор масаладир.

Зеро, Юртбошимиз таъкидлаганларидек, "Соғлом бола – аввало, соғлом ва аҳил оиланинг мевасидир. Биз таянчимиз ва суянчимиз, ғуруримиз ва ифтихоримиз бўлмиш болаларимизга ишонч билан, ҳурмат-эътибор билан қарашни келажагимизга бўлган ишонч, миллатимизга, халқимизга бўлган ҳурмат-эҳтиром ифодаси деб биламиз”.

Зулҳумор БОЛТАБОЕВА,

туман ФҲДЁ бўлими инспектори, 3-даражали ҳуқуқшунос.