Ногиронлиги бўлган фуқаролар янги хонадонларга эга бўлишди

Президентимиз ташаббуси билан уйсиз, кам таъминланган, ногирон ва боқувчисини йўқотган оилаларни  уй-жой билан таъминлаш ишлари амалга оширилмоқда. Шаҳар ва туманларда бунёд этилаётган замонавий турар жойлар уларга имтиёзли равишда берилмоқда.
26 июнь куни Тошёп овулидаги “Янгиобод-1” мавзесида  “Амударё махсус қурилиш” масъулияти чекланган жамияти томонидан 4 млрд. 234 млн. сўмдан зиёд маблағ эвазига қуриб битказилган 2 қаватли, 16 хонадонли 2 та уй фойдаланишга топширилди. Шу муносабат билан ташкил этилган тантанали маросимда Ўзбекистон Республикаси бош прокурори ўринбосари Э.Тажиев, Қорақалпоғистон Республикаси прокурори Х.Каримов, Президентнинг Қорақалпоғистон Республикасидаги Халқ қабулхонаси бошлиғи Ҳ.Ҳалимов, Қорақалпоғистон Республикаси Хотин-қизлар қўмитаси раиси З.Ибрагимова,  туман ҳокими С.Йўлдашев ҳамда давлат ва жамоат ташкилотлари раҳбар ва масъул ходимлари қатнашишди.  

Тадбирда уй-жойга эҳтиёжманд ногиронлиги бўлган фуқароларнинг рўйхати тегишли ишчи гуруҳларнинг ўрганишлари, халқ қабулхоналари ва маҳаллий ҳокимликларга тушган мурожаатлар асосида махсус ишчи комиссия томонидан шакллантирилганлиги, Президентимиз раҳнамолигида мамлакатимиз бўйлаб амалга оширилаётган бундай эзгу ишлар барчага хурсандчилик бағишлаш билан бирга, ўзгалар кўмагига муҳтож инсонларнинг ҳаётга қизиқишини ошираётганлиги, эртанги кунга ишончни мустаҳкамлаётганлиги, рўй бераётган ўзгариш ва янгиланишлар, бунёдкорлик ишларида янада фаол иштирок этишга руҳлантираётганлиги ҳақида сўз юритилди.

Шундан сўнг, 16 нафар ногиронлиги бўлган ва ногирон фарзандлари бор фуқароларга Президент совғаси - янги хонадонларнинг калитлари топширилди. “Ёшлар ойлиги” доирасида 3 нафар ёш оилага ҳам мазкур турар жойлардан янги хонадонлар берилди.

Уй топшириш маросими катта тўй, шодиёнага айланди. Янги хонадон эгаларининг қувончи туман Маданият бўлими санъаткорлари ижросидаги шўх қўшиқ ва дилрабо рақсларга уланиб кетди.

 О.Худойберганова.